Read Konyak Naga TÜOWELAIHEM 65 Bible Online

TÜOWELAIHEM 65 - Konyak Naga bible

TÜOWELAIHEM 65

¹O Kahwang, toman-e nangte Zion me yihlulaka shu nang hüyange toman-e nangte janyangpuwa anglak.

²Hangjingne yoppute nange janyangki. Ükenphe mepu kahtalan nang tangte peilak.

³Aope ünu toishaowe toman naotamyange ngoh, toman-e püohpinpute nange ümeng winpha.

⁴Aoyinne nang le yahyangki, iman mongmeilak, aoyin nange nang üjao nyoi me nyoine yahpei. Nenok mepu toimei lamme, nangjing üjaopa khümjing moimanpuwe toman-a monghahlak.

⁵Tomante okpupa phapu kaiye nange tomante janpha hüyange toman yinlak jingne nange yashanyalipu toi lingtüoh. Kahtoknyu nopu mepu kahtalan hüyange yengching kaiye taiye ngohpalan-e nangte ütinglak nang.

⁶Nang mepu ütahpa üngan hüowe, nang wonge nange kahtanglan nyoijing ngaine tam.

⁷Nange yengchinglan hooke ongpu hüyange yengching yungpu ngaowüng, ümokh hümtam nang; nange kahtalan shih khahpu ümokh hümtam nang.

⁸Kahtoknyu nopuwa nange lingpu toi üyong jingne nyampu phei yashanne yongnang. Nange lingpu toishaowe kahtoknyu üshuk ja mepu jaye ngoiye mongmei üngwünpu yah peinang.

⁹Kahtokte wai shonne tampu kaiye nange paowe tükpu hüonang; nange tüopa-a kahtok üyao phei hüyange ühakne linge tamnang. Nange yengyinlante yenge maatam nang; nange kahtokte deiha liha ngaitam nang. Hatüo hüke nange ling.

¹⁰Kahlüoh yangpu kahte nange wangmanne wai shonnang hüyange yeng hüpne tamnang; wai yütte tampuwe nange kahtok khai ne tamnang hüyange phümha weangyong jongne tamnang.

¹¹Nang meimapuwe peng ün meipu hangke phatam! Ümekente nang tailakei tüoken me phümphang-phong!

¹²Hahnyoilan-a mantoop üngang phei; kahtang ye-a mongmeipuwe maayange ngohnang.

¹³Kahko ye-a nyeelan-e maayange; kahjee lan-a tahlick-e maayange ngohnang. Khongkümpuwe mongmeipuwe üngwünne loknang.