Read Konyak Naga TÜOWELAIHEM 68 Bible Online

TÜOWELAIHEM 68 - Konyak Naga bible

TÜOWELAIHEM 68

¹Kahwang yayongtüoh hüyange I wepalan yanne tamtüoh. Aoyinne Ite nu yenao okpe phette yan tamtüoh.

²Vünkhuh puwe teipu kih-e, Iye iman jange tei; vün sheshao me pondi jupu kih-e, tüokih-e ümenglan Kahwang sheshao me mahnang.

³Hüpoi khakshupalan-a mongmei nang hüyange I shong me hoongli mongong nang; iman mongmei nang hüyange mongongpuwe üngwün nang.

⁴Kahwangte loktüoh, I min yongpu hem loktüoh; aowe wangphom me ongnang I jingne lamnyu tümtüoh. I min-a Youngwanpa, I shongme mong meitüoh!

⁵Kahwang, aohipa yoi üjao khümjing me ngohnang. Iye khahalan jingne paowe tüknang hüyange wamnyulan yintam nang.

⁶Yafün yenangpalante Iye ngohlak nok phanang, hüyange küpnok me ngohpalan lantam yange mongmei pha nang; hüpoi ümeng ngaitampalan-a kahtok ümeng me nyoilak.

⁷O Kahwang aope nange nang kahtalan woiyapeih, aope nang wanwüng jeng kaiye yayonge ngai, Oyaih

⁸kahtok po nang, hüyange wangdange wai yütte tamnang, hangjingne ima-a Sinai Kahwang peipu jingne! Hüyange Israel Kahwang peipu jingne!

⁹Nange wai wangman-e keine tam hüyange heam-e mengtepu nang kahtok linge ye;

¹⁰nang kahtalan-e iman nok tüome ling; nang meimapuwe nange toihalante phawe tam.

¹¹Youngwanpawe ngaokeng pha, hüyange shekolan maapuwe ngaolan ponge yan.

¹²“Ahngpalan hüyange iman naomeilan phette yannang!” Nok me ngohpu shekolan-e nyieye yepulan tamme hannang:

¹³Awshu yangtengte khüm-e shitte phoyange, hanghepa jing shemeipupa hon phei phihlang nang. (Tüokih-e numan ütam shapju nyih me nyeekhok me nyoipu a?)

¹⁴Aope Ütahpa Kahwange Zalmon Kahtang me ahngpalan yanne tam, Iye tüoken me yi yeine tam.

¹⁵Bashan-a hangke wongnangpu kahtang, kahmüoh kahtüo üngang pheipu Bashan kahtang!

¹⁶Kahwange hanghepa kahtang me ngohlak jingne le, tüote hangne numan wongnangpu kahmüohlan mepu müktakpu phei leipu? Youngwanpa-a tüoken me jin jinte ngohlak!

¹⁷I jing wongnangpu pongtongtoi haja tokte haja üngang phei Sinai mepu Youngwanpa üjao nyoite peinang.

¹⁸Phowe yahpalan üngang I phei woiyange I shedaopupa te ongnang; hokkewepu kahtalan mepu hünghao Iye yahnang. Youngwanpa Kahwang tüoken me ngohlak.

¹⁹Youngwanpa yihlu tüoh, aowe nyih jeih she teman hangki yih kiye yahnang. I-a Kahwang aowe teman yintam.

²⁰Kahwang aowe yintam nang hatüowa teman Kahwang; I-a Youngwanpa, teman Youngwanpa; aowe teman lilak mepu yintamnang.

²¹Hüpoi Kahwange ütingme I wepalan shang paitamlak, aoyin iman ünu lamme yelakpe kemnang!

²²Youngwanpawe iyangki, “Taowe Bashan mepu numan wepalan yahyelak; taowe iman yengching ümong mepu yah yelak;

²³hümme nakshih iman iy tangme numan kemlak, hüyange numanjing kuihalan-e iman-e okpu shinne yailak.”

²⁴O Kahwang, nang okpu ngeye yayongpuwa khongkümpuwe ngeteki; I üjao nyoite, ü-Kahwang, khünglengpu:

²⁵Hemlokpalan-a shaoye me, kongtoi phei hemlokpalan-a tokphei me, tüonipa me naoyhalan-e phemkao kongpu pit.

²⁶“I jing kahtalan phei hüopu nyoi me Kahwangte yihlupu hem loktüoh; numan Israel huhayimlan khongkümpuwe Youngwanpate yihlutüoh!”

²⁷Üwangpa me Benjamin, sheshoipupa nokphong, tüophei me Judah woipalan, iman ükhong phei jamme, Zebulun hüyange Naphtali woipalan woi pei.

²⁸Nang üngan wong hüotüoh, O Kahwang; toman nanleiye nange jonyangpu wong,

²⁹Jerusalem mepu nang khümjing me, ümeken me ahngpalan-e nangte hünghao yahpei.

³⁰Ngeihyan yo me ngohpu phao yinmok, Egypt te teetamtüoh; iman ühalan phei jamme mahu üpong yompalan jatlante teetüoh. Iman khongkümpuwe ümme mankhüm mankhüm hüyange nangte poon manpha manpha teetüoh. Aoyin kahtalan-e wehok ngailak te kennang iman yantam tüoh!

³¹Egypt mepu lampulan peilak; Sudanlan-e Kahwangte yoppe iman yak nolak.

³²Kahtoknyu ahngchinglan, Kahwangte loktüoh, Youngwanpate yihlu hem loktüoh; Oyaih

³³ao tangme wangme wangdang ülangpa tokme wangdanglan shotnang. Ütahpa me waopu üngwünpu Ite jaitüoh.

³⁴Kahwangpa wong pongtam tüoh; I okkeshangpu Israel tangme ngohnang, I wongnangpuwa wangdanglan me.

³⁵I yoi üjaopa nyoi mepu ngaiwante Kahwangpate hangshin nyam lakpa, Israel Kahwang! Iye yoi kahtalante üngan hei wong phanang. Kahwang yihlutüoh!