Read Konyak Naga TÜOWELAIHEM 69 Bible Online

TÜOWELAIHEM 69 - Konyak Naga bible

TÜOWELAIHEM 69

¹O Kahwang, tao yinpha! Hangjingne yeng-a ü-üng ngoiteki,

²Tao sham yo me hüngnangki, hüyange kahtok ümei hango yenang; taowa yeng lupu me, hüyange yengmuleampuwe taowa payei she ngohnang.

³Jamlak jingne nyikpuwe tao khaiye mahteki, hüyange ü-üngte muteki. Ü-Kahwange jamphalak te leipuwe ü-mük yoongteki.

⁴Hango üjepute aoyinne üte nu iman-a ü-shang mepu shangmin phei shephong. Ü-wepalan-e ngaoleih ngao; iman-a wong nangnang hüyange tao toihu nang. Iman-e üte taowe yekuhpu toi leihyelak jingne linge tamnang.

⁵O Kahwang, ü-ünuwa nang mepu lowe yenang; tao hangshin üngapa ne ngohyangki nange shingnang.

⁶Aoyinne nangte ütinglak nang iman üjeng jeng me wüotüone tahtam, Ütahpa wongnangpupa Youngwanpa! Aoyinne nangte yoppe khümnang, tao kaiye mongmeng peine tahtam, O Israel Kahwang!

⁷Hatüowa nangjingne üte teeyangki, hüyange taowa wüokhüw yange ngohnang.

⁸Ü-jeiheinaolan shongme taowa yinpa ja, hüyange tenok shao me taowa kahhengpa ja leye ngohnang.

⁹Nang khümjing me taowe nangte phünne phapuwe üte vün jakke tampu kih-e sheamteki; hüyange nangte teetampu hanghepawe mayah tam hatüo ü-tangme yeiteki.

¹⁰Aope tao shapyoong hüyange nyaole, hüke lingpu jingne iman-e üte nyiyaitam.

¹¹Aope taowe ü-nying nyingke monnye in, kahtalan-e üte haihowe tam.

¹²Aoyin peten pongme shot ü-jeng ngao, hüyange yujokpalan-e ü-jenga hemne lok.

¹³Hüpoi üjingnepa-a, taowe nangte hei yoplak, Youngwanpa; yahlak hipak me nange üte janpha, Kahwang. Hangjingne nange kenpu üyong ngohtepuwe üte janpha; hangjingne nange yinlak she janpu nange angnang.

¹⁴Shamnoongte hünge tapu mepu tao yinpha; ü-wepalan mepu tao yinne angpha, yeng ülu mepu tao yinpha.

¹⁵Ü-tangme muleampu peine tah tampha; ülute tao yeine tahtam yejema-a kahsate hüngne tahtam.

¹⁶Nange üte yelakpe kenpu meimapu kaiye janpha, Youngwanpa; nange shüpsheye teihpu üyong phei ü-tangte lüppe yekei!

¹⁷Nang shaoshanpa mepu nang nying nyingke tah lo, tao shangpu üyong phei ngohnang, sha-a üte janpha!

¹⁸Ü-tangte owe peikei hüyange tao yinpha; ü-wepalan mepu tao yinpha.

¹⁹Üte hangke teetam nange shingnang, hangke üte wüotüone tam hüyange ye-i-yeshe; ü-wepalan kümme nange ngenang.

²⁰Teetampuwe ü-mongjang paiteki, hüyange taowa khai mahteki. Üte jamme pongkülak jingne monghümme teih, hüpoi ao-o yenang; toloimeiye tamphalak she yam, hüpoi taowe ao-o yetüo.

²¹Aope tao seanyao, iman-e üte soihüng pha; aope tao yengle, iman-e üte üshi yeng pha.

²²Iman mongmeimo-e iman pa ne tamshih, iman üjao mowe iman yeitampu ngaitam shih.

²³Mükmüo ne tamme imante shet tüoh! Iman tokwaan jinte khaine tamtüoh!

²⁴Iman tangme nang mongshih ngaipu shoktam tüoh; nange mong yehahpu üyonge iman naotam tüoh.

²⁵Iman lakjinga wüngmakke tüoh shih; iman nyenok me ao-o üyin me tahtüoh tam.

²⁶Aoyinte nange shaoshi yatengne tam tüolante imane-o shangne tam, aoyinte nange mako sha tüolan shaoshipu jeng iman-e ngaonang.

²⁷Iman ünu jeng khongkümpu nyanne angshih; nange yinyetampu me iman meitam hango tah pha.

²⁸Üyin laitep mepu iman min phutte winshih; khakshupu kahtalan min nyanpu me iman omne tahtam tüoh.

²⁹Hüpoi taowa daktinpu phei hüyange khaiteki, üdangte tao no inpha, O Kahwang, hüyange tao yinpha!

³⁰Taowe hem phei Kahwangte yihlulak; Ite minyong phapu kaiye taowe I yongelüopu pongtamlak.

³¹Hatüowe yinmok ja dopu phei shenyei she, üwong pheipu mahu üpong toidopu phei shenyei she Youngwanpa monghah lak.

³²Aope shaoshi tampalan-e tüopa ngelakei, iman mongmeilak; aoyinne Kahwang te yoppe khümnang iman ünyei hengpu tüolak.

³³Aoyin toinan nang imante Youngwanpawe jainang, hüyange küpnok mepu I kahtalan peye yetüoh.

³⁴Kahwangte yihlutüoh, O kahtok hüyange wangdang, yengchinglan hüyange tüome ngohpu mokh-ha khongküm!

³⁵Hangjingne Kahwange Zion yinlak hüyange Judah chingnyulan linge yelak. I kahtalan tüome nyoilak hüyange kahmük-a iman-e omlak;

³⁶I shaoshanpalan huhayimlan-e tüopa mothleilak, hüyange aoyinne Ite ken iman tüome nyoilak.