Read Konyak Naga TÜOWELAIHEM 71 Bible Online

TÜOWELAIHEM 71 - Konyak Naga bible

TÜOWELAIHEM 71

¹Nang me, O Youngwanpa, tao jongwanne tamlak jingne peinang; tao aope-o wüotüone tahtam pha.

²Hangjingne nanga khakshupupa, üte jampha hüyange tao yintam pha. Üte jaipha hüyange tao yinpha!

³Ü-lojing ümei ne mengpha, hüyange tao yinlak jingne wongnangpu jongwanpa ne mengpha; nanga ü-longnyu hüyange tientampa.

⁴Ü-Kahwang, ümeng kahtalan mepu tao yintam pha, mengshipu hüyange ümeng kahtalan wong mepu yinpha.

⁵Youngwanpa, taowe ümong hümpu nangme angnang; tao nahawante muh O Youngwanpa nangte ütinglak yangki.

⁶Ü-üyin jin kümme taowe nang me mongnyeng yangki; tao puhpu nyih memuh nange tao jongwanne ang. Taowe jinte nang yihlulak.

⁷Ü-üyin-a maapulan jingne leppu ja ne ngohyangki, hangjingne ima-a nanga üjingne yeonge wong nange tienpa ne ngoh.

⁸Nyihlao hipak taowe nang min yongnang, hüyange nang müktishiwapu pongtam nang.

⁹Sha-a tao wupa ne mengwante tao winne tahtüoh; sha-a tao wong yenangpe peiwante tao tahwin.

¹⁰Ü-wepalan-e tao toi hunang; iman-e ngaonang hüyange ü-phei tüi-e konkon nang.

¹¹Iman-e inang, “Kahwange I winteki; I phei te jange taihah hüyange phohah; I yinlak jingne ao-o yenangja.”

¹²Teshinne jaiye taiye tahngoh, O Kahwang; Ü-Kahwang, üte jamlak jingne mamyah!

¹³Aoyinne üte shümnang iman naone tamshih hüyange menge tamshih. Aoyinne üte maapha ne ngang nang iman wüotüone tamyange teetam shih.

¹⁴Hüpoi taowepa-a hipak phe me ümonghümpu nang me anglak; taowe nangte ünyei ünyei yihlulak.

¹⁵Nang khakshupu jeng taowe ilak; nyihlao hipak taowe nange yinye-e tampu jeng ngaolak; hatüo jeng taowe shingpu phei shenyei she ngohyahpoi:

¹⁶Okkeshangpupa Youngwanpa, taowe nang wongte yihlulak; nangjing shaha, nang khakshupu jeng taowe pongtamlak.

¹⁷O Kahwang tao naha ne ngohwante muh nange üte nyüowe tam, hüyange taowe sha-ate ngoiye nang yashanyali toishao jeng inang.

¹⁸Sha-a tao wupa ne mengteki hüyange ü-shang shaoteki, tao tahwin tüohpha, O Kahwang! Ngoikülak jin khongkümpu jingne taowe nang khakshupu hei okkeshangpu pongtamwante ü-phei ngohkei.

¹⁹Kahwang, nang khakshupuwe wang yüoteki. Nange toinyu üyong lingteki; nang kihpu ao-o yenang.

²⁰Nange ü-tangme shaoshi hüyange shangpongpu shontamyapoi; hüpoi nange ü-üyin üne-o tükke anglak; Kahmong shelupupa mepu nange tao üne-o loiyahlak.

²¹Lintepu hipak phei sheyong she nange tao üyongpa ne linglak; nange tao üne-o toloimeine tampha.

²²Taowe nangte kongki ümtük phei yihlulak; Nang ngaotingpa jeng taowe minyonglak, O ü-Kahwang; Ü-kongki ümtük-e taowe, nangmin yongpu hem loklak, Israel üjaopate.

²³Taowe nang jingne konge lokwante mongmei puwe taowe üngwünlak; ü-wong sotkümme taowe loklak, hangjingne ima-a nange tao yinyangki.

²⁴Nyihlao hipak ü-yee-e nang khakshupu jeng ngaolak, hangjingne ima-a aoyinne üte yemeipe lingne teih imante nange naone tam hüyange teeyangki.