Read Konyak Naga TÜOWELAIHEM 72 Bible Online

TÜOWELAIHEM 72 - Konyak Naga bible

TÜOWELAIHEM 72

¹Nang khakshupu me kahphünlak jingne ahngpate nyüotamtüoh, O Kahwang; nangjing ütingpa Ahngha phei tamme hanshih;

²hümme nakshih nang kahtalan tangme ütingpa phei wanglam lamlak, hüyange toinanpalan tangme khakshupu phei wanglam lamlak.

³Kahmüoh kahtang me jaalunpu ngaitamshih, khakshupu jeng üpong tüone tamshih.

⁴Ahngpawe toihalante meijange kahphün ne tamshih; toinanpalante Iye jam ne tamshih, hüyange imante yemeipe lingpalan naone tamshih.

⁵Wanghe nyu manmah manmah, linnyuwe leta phapu manmah manmah, ngoikülak jin khongkümpu me Iye nangte yoppe khümne tamshih.

⁶Ahngpa-a kahte keipu wai kih-e, kahmükte yütpu waishuya kih-e ngoh shih.

⁷I üyin jin me khakshupu jaalunshih, hüyange jaalunpuwa linnyuwe leta phapu manmah manmah ngohshih.

⁸I ahngchinga yengching jaye mepu jaye ngoiye, yengyin mepu kahtok üküm ngoiye ngohlak.

⁹Wanwüng jengme ngohpu kahtalan-e I sheshao me ümme khümlak; I wepalan iman nying nyingke kahtokte yeilak.

¹⁰Spain (Tarshish) hüyange dikhot ahngpalan-e Ite poon phalak; Arabia hei Ethiopia ahngpalan-e Ite hünghao yahpeilak.

¹¹Ahngpalan khongkümpuwe I sheshao me ümme khümlak; jatlan üsheiye I shaoshanlak.

¹²Hangjingne Iye toihalan aoyinne Ite nyiknang, hüyange aoyin toinan hüyange yeleipe tüoh, iman yintamlak.

¹³Iye wongyenang hüyange toinanpalante shüpshe teih nang; aoyin wongpongne yemeipu yafün me ngoh iman üyin Iye yintam nang.

¹⁴Shaoshi yatengne tamme hüyange yakphei lükpalan mepu Iye iman yintam nang; iman iy-a I jingne toinyu.

¹⁵Ahngpa jinlaowe ngohtüoh! Ite Arabia mepu hon phatam shih; hipak üshei me I jingne yoppu angtamtüoh; Kahwang moiman I tangme hipak phe me ngohtüoh!

¹⁶Kahmük me tahlick üngang ngaitam tüoh; kahtanglan-a ülick ngaipuwe maatamtüoh; Lebanon me lickpu shinne licktam tüoh. Kahjee me ngaipu hüng shinne, chingnyuwa kahtalan-e maatam shih.

¹⁷Ahngpa min aope-o yepelak; wanghenyu manmah manmah I okkeshangpu ngohtam shih. Jatlan üsheiye I min yongne tamshih, imante moimanlak jingne Kahwangte tongshih hüyange ahngpa jingne iman mongmei ne tamshih.

¹⁸Israel Kahwang, Youngwanpa yihlutüoh! I ja shinge tüolan yashan yali toi ling.

¹⁹Jin jinte müktishiwa I min yongtüoh! I müktishiwapuwe kahtoknyu nopu maatamshih. Amen! Hüyange Amen!

²⁰Hatüowa Jesse üha David-e yoppu shonang.