Read Konyak Naga TÜOWELAIHEM 73 Bible Online

TÜOWELAIHEM 73 - Konyak Naga bible

TÜOWELAIHEM 73

¹Ütingpa me Kahwang-a lsraelte meinang, aoyin me jaoshepu mongjang nyim.

²Hüpoi üjingne pa-a ü-ya-a yashah pa hüo she, ü-yafün pa shai she;

³hangjingne ima-a aope taowe ümenglan yafün shemei she taipu nge otapute taowe müktak.

⁴Hangjingne iman shaoshipu me yepong; iman pümta meiye hüyange wongnang.

⁵Ülao kahtalan kih-e iman shao yeshi; ülaolan me ngohpu kih-e iman shangshih yenang.

⁶Tüokhei yük (yükpu) kih-e iman-e otapu yük; hüyange yakphei lükpuwa inpu inkhek kih-e.

⁷Iman mongjange ümeng loonge ngai, hüyange iman kenmonga ümengpa linglak teihpuwe nanyengai.

⁸Iman-e nyiyaitam, hüyange yaole-e ngao; iman otapuwe ümeng pha ne nyamshao nang.

⁹Iman-e iman ju-a wangdang phei tüi-e ngao, hüyange iman yi-a kahtok jingne tümta.

¹⁰Tüokhei kahtalan iman tangte woinang, hüyange imante minyong pha nang; hüyange iman me püohpu yetüo.

¹¹Hüyange iman-e inang, “Kahwange hangke shingne? Ütahpawe tüopa jeng shingpu ngohlak a?”

¹²Ümengpalan-a hükih-e ngohnang. Iman me üngang ngohnang hüyange jinte ünyei ünyei tüonang.

¹³Hüma-a hangne-o üjelakte, taowe ü-nying nyingke ü-mongjang jaowe ang, hüyange noknga ne menge taowe ü-yak tuh.

¹⁴Nyihlao hipak tao shangne tam; napjeih she nange üte shangpongne tam.

¹⁵Taowe hükihpu ngaowe lingshihma-a, nang kahta ja leye taowe yelingpu ne menghah shepu.

¹⁶Taowe ü-nying nyingke tüopa jeng teihne ngang; hüpoi hatüowa üjingne mongshanglak toishao ja,

¹⁷tao nang Kahwang khümjingte manpei manpei jamloipu ne ngoh. Tüophei me nakshih ümenglante hanghe ngailak taowe shing.

¹⁸Ütingme nange iman-a leakke hüolak nyoijinglan me anglak hüyange iman mahlak jingne yeitamlak.

¹⁹Iman ütenjapu mongme hangke mahküm; iman yashanlakpa üküm yete ta mah.

²⁰Iman-a napning me yenangpe ngohpu shinmang kih; aope nang nying nyingke nang lüolakei, O Youngwanpa, iman yenangpe mah.

²¹Aope ü-yaha me khah-e ngohyapeih hüyange ü-juteihlan me mayah,

²²taowa yinmok ja leye üngapa ne meng; taowe nang shinge yeyah ok.

²³Tüoyangpoi tao hipak phe me nang shongme owe ngoh, hüyange nange ü-yakjah ye me tük.

²⁴Nange nyüowe tampu phei nange tao woilak hüyange ükümne nange taowa yihnoonpu phei yahlak.

²⁵Nang tokte taowe wangdang me ao ngohnang shi? Üme nang ngohpheima-a, kahtoknyu me taowe üne-o hanghe wongpong!

²⁶Ü-kenmong hüyange ü-püm wong yenangpe taine ok, hüpoi Kahwang-a ü-wong; ü-wongpong üshei-a I ja shing.

²⁷Aoyinne nang winne tüoh ütingme mahlak; aoyinne nangte üting yelak nange iman-a mahtamlak.

²⁸Hüpoi üjingnepa-a, Kahwang phinme ngohlak shemeipu! Ütahpa Youngwanpa me lojing tüolak, hüyange Iye lingyangpu khongküm ponge tamlak.