Read Konyak Naga TÜOWELAIHEM 74 Bible Online

TÜOWELAIHEM 74 - Konyak Naga bible

TÜOWELAIHEM 74

¹O Kahwang, hangne hüke nange toman jintepu jingne winpu? Hangne nang hahnyoi me ngohpu nangjing nyeelante nang mongshih loonge tüi-e yongpu?

²Aoyin nange üshongwante muh nangjingne she leyah, tüolan nang kahtalan teihtüoyah, nang jing nokphong ne menglak jingne aoyin nange rha yatuhshao mepu woipei. Ümeken me hipak ja me nang ngohyangki, tüopa Zion kahtang teihtüoyah.

³Lanshe menge tamtepu tüopa tangme nangya kemtüoh; üjao nyoi me ngohpu shemin lamphe toman wepalan-e menge tamteki.

⁴Nang khümjing me nang wepalan-e okpu ngeye üngwün teki; okpu ngepu füo hüowe iman-e imanjing keiphong hongteki.

⁵Iman-a imanjing wa phei pee akke taipu pee-akpalan kih-e ngenang.

⁶Pephei lingpu mieng lili iman wa hüyange yanmee phei iman-e khüw mengküm.

⁷Iman-e nang khümjing mengwin hüyange vün me jakke tam; ümeken me nangte yoppekhüm tüopa nyoi iman-e nuweshak teki.

⁸Iman-e toman-a lanshe mahne tamhu nang; kahmük me ngohpu üjao nyoi lili iman-e jakke winteki.

⁹Tomanjing üjao toishao lili shaaji yenang; hipalan ao-o towe yenang, hüyange hatüo kih hangshin linlak aowe-o yeshing.

¹⁰O Kahwang, hangshin laowe toman wepalan-e nangte nyitamlak! Iman-e nangmin-a jin jinte yaoweleye tamlak a?

¹¹Hangne nange nang yak a tokphei yeme pak angpu? Hangne nange nang jakuh me yak-khüp yange angpu?

¹²Hüpoi üwang memuh nanga toman ahngpa ne ngohyangki, O Kahwang; nange hipak lep iye toman yin yangki.

¹³Nang Ütahpa wong phei nange yengchinga ni ne tang hüyange nange yeng me khongkhai shang paitam;

¹⁴Nange wong pheipu khongkhai üyongpa shang paikhoih tam, hüyange I püm-a wanwüng jeng yinmoklante uhtam.

¹⁵Nange yengpeiwo hei shaoyin ngaine tam; yengyin üyonglan nange jüpne tam.

¹⁶Wangnyak hei wangngai nange linge ngai; linnyu hei wanghe iman nyoijing me nange shotne tam;

¹⁷Nange kahtoknyu tüolan mongme shotlak shepu linge tam; nange jüo hei eanyu ling.

¹⁸Hüpoi teihtüoyah, O Youngwanpa, nang wepalan-e nangte nyinangki; iman-e Kahwang yeshing hüyange nangte phoinang.

¹⁹Mengshipu wepalan yak me nangjing awshu üyin tahpha; shange pongpu nang kahtalan jintepu jingne tahpe tüoh!

²⁰Nange toman phei jiengjeppu teihtüoyah, kahmük me wangnyak ünuk kenphe me yakphei lükpulan ngohnang.

²¹Shangshih ponge ngohpalan wüotüo tamne tahtam; shangepongpu hüyange toinanpalan-e nang min yihlune tamtüoh.

²²Nang nying nyingke yayongtüoh, O Kahwang, hüyange nang yafün jeng ngaotüoh! Teihtüoyah Kahwang yeshingpu kahtalan-e nyihlao hipak nangte nyi-tamnang.

²³Nang wepalan-e mongshih-e üngwünpu, nangtepu wepalan-e yelakpe mop ngaitampu tahpe.