Read Konyak Naga TÜOWELAIHEM 78 Bible Online

TÜOWELAIHEM 78 - Konyak Naga bible

TÜOWELAIHEM 78

¹Taowe nyüopute jaiyah, O ü-kahtalan; hüyange taowe hanghe ngao tüote kentinge jaiyah.

²Taowe ngaolep phei ngaoning hüyange lintepu hipak me ngaipu yashanlakpa khoih iphaning;

³toman-e jaiye hüyange shingpu jeng, toman payimlan-e ngaowe angpu jeng.

⁴Toman-e toman hayimlan mepu tüopa tienne ye anglak; toman-e ünepupa jinte ilak Youngwanpa ünganwong jeng hüyange Iye lingpu toinyu üyong hüyange Iye lingyangpu yashan yalipu jeng.

⁵Iye Israellante ngaokhüm hüyange Jacob huhayimlante ngaokeng pha. Iman hayimlante I ngaokhüm nyüowe tamlak jingne Iye toman pajeiyonglante nyinge tam;

⁶tüokaiye ünepupa jin ne tüolan shinge yahlak, manpuhpu nahalan ne nehoi hüyange leihye-e iman hayimlante nyüolak.

⁷Tüokih-e linge imane-o Kahwangte üting laklak, hüyange Iye hanghe lingyangki yepelak, hüpoi jinte I ngaokenglan jailak.

⁸Iman-a iman jing pajeiyonglan kih-e hokke weye hüyange ngao yejaipu kahtalan ne yengohlak; aoyinne Kahwangte ütinglakpu aope-o monge yengoh hüyange aoyinne Ite ütinglakke yengoh ok!

⁹Ephraimlan, wenglah hei lahhan phei tümyange, shapju nyih phette yanmah.

¹⁰Iman-e Kahwang phei jiengjeppu iman-e ye-ang; I ngaokhüm yejonlak jingne iman-e lan.

¹¹Yashanyali toishao Iye lingpu iman-e ngepulan, Iye hanghe lingyangki iman-e pemei.

¹²Iye yashanyali toi Egypt kahtok Zoan kahjee me lingpute iman pajeiyonglan-e lei ngohyangki.

¹³Iye yengching ni ne tang hüyange tüopa kaiye iman woi; Iye yeng-a jan kih-e yongne tam.

¹⁴Nyihning me Iye iman-a wangphom phei hüyange wangnyak phapan vün wangngai phei woi.

¹⁵Wanwüng jengme Iye longnyuwa phüpne tam, hüyange tüopa ümong mepu yeng imante pha.

¹⁶Longnyu mepu shaoyin ngailak jingne Iye ling hüyange yengyin kih-e yeng yünne tam.

¹⁷Hüpoi iman-e Kahwang phei tüi-e ünu ompu yelak, hüyange wanwüng jengme üshei phei Ütahpa phei tüi-e iman yong.

¹⁸Iman-e hahhupu hahying yuwe iman-e Kahwangpate tokpu pha.

¹⁹Iman-e Kahwang phei tüi-e ngao hüyange i, “Wanwüng jeng me Kahwange hahying phapu oklak a?

²⁰Iye longnyute heap hüyange akshengyeng yongpu shinne yeng yinpuwa üting; hüpoi Iye üne-o temante nük hüyange I kahtalante mei phapu oklak a?”

²¹Tüokhei aope Youngwanpawe iman ngaolan jai, I yeonge mongshih ngai; Iye Jacob phei tüi-e vün phei shümme tai, hüyange Israel phei tüi-e I mongshih ünyei ngai;

²²hangjingne iman-e Kahwangte monghümpu yenang hüyange Ite iman yinphalak she üting yelak.

²³Tüoyangpoi wang ütangpa te Iye ngao, hüyange tüopa taküp eplak jingne ngao pha;

²⁴Iman-e hahlak jingne Iye manna yüt tam, wangmepu ülick Iye imante pha.

²⁵Hangko kahtawe wangdang shongmokpalan hahying hah, hüyange Iye imante iman-e lenge teihpu hahying üshei pha.

²⁶Iye üne-o heongye wangyang leine tam, hüyange I wong kaiye heyekao wangyang leihkheihne tam.

²⁷Iye mei kahmak kih-e, üyang pheipu awha yengchingnah pheih kih-e, iman tangme yüt tam.

²⁸Iye tüolan-a iman lakjing mongme, iman nyenok khongkümpu neikonne yüt ne tam.

²⁹Tüokhei iman-e hah hüyange seamoh, hangjingne Iye imante iman-e yoongpu pha.

³⁰Hüpoi iman-e yoongpu phei mongme manhutampe, hahyingpu üne-o iman ju me ngohwante,

³¹Kahwang mongshih iman phei tüi-e ngai, hüyange iman yo mepu wong shenangpu kahtalan toi, hüyange Israel naoshelan ümongte taitam.

³²Tüolan khongkümpu hüoyange-o, iman-e yelakpe ünu ling; Iye yashanyalipu lingpu ngeyang pheite Ite üting yelak.

³³Tüokhei Iye iman nyih hipaklan jajang jawe, hüyange iman üyinlan mokh shepu ütuh phei üküm ngoine tam.

³⁴Hangkih tingme Kahwange iman toitamlakei, iman-e I yam, hüyange iman monglüp hüyange mongpha puphei Ite yop.

³⁵Kahwang-a iman yintampa, hüyange ütahpa-a imante jamlak jingne pei she iman-e teihtüo.

³⁶Hüpoi iman ju me Ite ngaoleih me minyong; hüyange iman yee phei Ite tahleih i.

³⁷Iman mongjanga Ite ütingpa me yengoh; iman-e I phei jiengjep yangpu ütingpa me ye-ang.

³⁸Tüoyangpoi I yoi kahtalante shüpshe. Iye imante ünu win hüyange iman mahne yetam. Hipak phe me Iye yoi mongshih ngaipu lak hüyange I mengshiye shihkhahpu tükke ang.

³⁹Iman-a hangko kahta hei she, wangyang leiye peiyange linteiye ngohpu kihpu she Iye teihtüo.

⁴⁰Hangshin me iman-e wanwüng jeng me I phei tüi-e moppe yong; hüyange pheih kahtok me I mongmeng ne tam!

⁴¹Iman-e Kahwangte sha-a sha-a tokke lei, hüyange Israel Üjao Kahwang te mongmeng peitam.

⁴²Iman-e I wong üyong hüyange aope nyih Iye iman wepalan mepu yintam, mongme teih ye-ang;

⁴³Aope Egypt kahtok Zoan kahjee me I wongnangpu toishao hüyange yashan yalipu linge hüo, tüopa pemah.

⁴⁴Iye imanjing yengyin-a iy ne lingetam, hüyange iman-e yinglak yeng yenangpe ngoh.

⁴⁵Iye iman yo me hoi-üngang shontam, hangheye iman loishe shangne tam, hüyange lukh hangheye iman kahtok menge tam.

⁴⁶Iye iman deihaliha hahtamlak jingne yongwante pha, hüyange iman kah menge tamlak jingne Iye nyaodukh shon.

⁴⁷Iye iman jing wuwüngwu yilong phei hüyange imanjing yengphuk pee nyai phei mengne tam.

⁴⁸Iye imanjing tampu mahulan yilong phei, hüyange mantooplan wangyuwe toine tam.

⁴⁹Iye iman tangme I mongshihpu hüyange wünne kapu shokke tampu mahtamlak wangdang shongmokpalan kih pei ne tam-e mongmeng üyong ngaitam.

⁵⁰Iye yoi mongshih ngaipu lam tüm; Iye lilak mepu iman tükke ye-ang, hüpoi leamdak te iman üyin pha.

⁵¹Iye Egypt noksalan khongkümpu mepu üwangne puhpu netan halan toitam.

⁵²Tüophei me Iye nyeeyompa kih-e yoi kahtalan woi hüyange wanwüng jeng kaiye iman woitei.

⁵³Iye iman yemahtampe woi, hüyange iman yenyam; hüpoi iman wepalan tangme yengchinge phünge mah.

⁵⁴Iye iman yoi üjao kahtok ngoiye, hanghepa kahtang I yoi yakke om tüopa ngoiye yahpei.

⁵⁵I kahtalan ngoipu phei jam jamshe kahmük me nyoipalan Iye jange tei; iman kahtok Iye Israel nokphongte tam-e pha hüyange iman nok yoi kahtalante pha.

⁵⁶Hüpoi iman-e Ütahpa Kahwang phei tüi-e hokke we, hüyange Ite tokke tam. Iman-e I ngaokenglan yejon;

⁵⁷hüpoi iman payimlan kih-e mopngaipu phei hüyange wangshüm yehüope komküyakpu lahhan kih-e ütingpa me yehüo ok.

⁵⁸Iman-e ülao kahwanglante yoppe khümpuwe I mongshihne tam, hüyange iman-e lingpu peshao kaiye loishe I mengne tam.

⁵⁹Aope Kahwange tüopa nge, I mongshih ngai, tüokhei Iye yoi kahta Israellan lanshe winne tam.

⁶⁰Iye Shiloh mepu yoi khümjing nyenok, kahta yo me I ngohyangpu nyenok winne tüoh.

⁶¹Iye wepalante I wong hüyange müktishiwa ne angpu jiengjeppu ngaokhüm ghonu pho ne tam.

⁶²I yoijing kahtalante mongshih ngai, hüyange iman-a wepalan-e toitamlak jingne tam.

⁶³Iman jing naoshelan vün-e shuküm, hüyange iman jing naoyhalan-e nokyam hem yelok.

⁶⁴Iman jing ngengpalan yanglow-e toi ne tam, iman-e tüohpu wamnyulan-e mang yeshap.

⁶⁵Hüwante shipu mepu laopu kih-e, yuwe jokyange wongnangpalan-e üngwünpu kih-e, Youngwanpa lüo.

⁶⁶Iye yoi pheipu wepalan jange yene tam, hüyange jinte wüopuphei ngohne naowe tam.

⁶⁷Iye Joseph huhayimlan winne tüoh; Iye Ephraim nokphong mepu yele.

⁶⁸Hüleima-a Iye Judah nokphong, hüyange Iye meiyange kenpu Zion Kahtang le.

⁶⁹Tüoken me Iye wangdang mepu yoi nok kih-e yoi khümjing we; Iye hatüowa jinte yemahpe ngoh oklak ne, kahtoknyu kih-e muh mongne tam.

⁷⁰Iye yoi shaoshanpa David le; Iye I-a hahnyoi me yomme ngohpu yah;

⁷¹Düamyeng ngaipu nyee pheite woipu mepu, Iye yoi kahta Jacob hüyange I moth Israel nyeeyomlak jingne Iye woipei.

⁷²David-e iman-a yenüngneipe phünne phawe paowe tük, hüyange wongnangpu yak phei Iye iman woi.