Read Konyak Naga TÜOWELAIHEM 81 Bible Online

TÜOWELAIHEM 81 - Konyak Naga bible

TÜOWELAIHEM 81

¹Teman wongnangtampa Kahwangte, üngwünne hem loktüoh; Jacob Kahwangte mongmei ngaowüng wentüoh!

²Hem wangtüoh hüyange pheamkao te kongtüoh; üyin shinne kongki ümtük hüyange kongki lahha wüngtüoh.

³Leatla me, hüyange aope leat toi meilakei, teman mopu nyih, nyawong wüngtüoh.

⁴Hatüowa Israel jingne ngaokhüm Jacob Kahwang mepu ngaokeng ngohnang.

⁵Aope I Egypt te shüm ne tai, ümeken me toman-e yeshingpu ngao toman-e jai, Iye Joseph jingne linglak toishao ja ne ngaitam.

⁶Taowe nang phaktang mepu hangki yih yahtam; jaklong pheipu nang hangki taowe ngehtam.

⁷Aope nang shangpu phei ngoh, nange üte nyik, hüyange taowe nang yintam. Wangyang wangyi me tao lowe ngohjing nyoi mepu taowe nangte jan. Meribah yeng me taowe nangte tokke tam. Oyaih

⁸O Ü-kahtalan, Taowe phapu deingaote jaiyah; O Israel, nangte Taowe hangshin me ü-ngao jaine tamhupu!

⁹Numan yo me ülao kahwang ye-anglak; numan yo me yeshingpu Kahwang ja te numan-e tahyop tahkhüm.

¹⁰Taowa nang Kahwang Youngwanpa, aowe Egypt kahtok mepu nang yah ngai. Nang juka tüoh, hüyange Taowe uh tampha ning.

¹¹“Hüpoi Ü-kahtalan-e ü-ngaote yejai; Israel-e ü-nyingme yeyah.

¹²Tüokhei Taowe imante üngei ne menglak mongjang pha, hüyange iman-e hanghe leng lingne tam.

¹³O ü-kahtalan-e üte jaishih phang; Israel-e ü-lamnyu me kemshih phang!

¹⁴Taowe iman wepalan mamshe naone tamhah shepu hüyange iman phei tokteipalan phei tüi-e ü-yak nohah shepu!

¹⁵Aoyinne Youngwanpate nuyapeih, nyampuwe ü-sheshaome ümme khümlak; hüyange iman shaoshi ne tampuwa jinte ngohlak.

¹⁶Hüpoi Taowe nanga shemeipupa wheat tah phei uhyinglak, hüyange longnyu mepu zahtai jelo phei nanga moh tamlak!”