Read Konyak Naga TÜOWELAIHEM 86 Bible Online

TÜOWELAIHEM 86 - Konyak Naga bible

TÜOWELAIHEM 86

¹Üte jaipha, O Youngwanpa, hüyange üte janpha; hangjingne taowa toinan hüyange wong yenang.

²Ü-üyin yompha, hangjingne taowe nangte phün phanang. Nanga ü-Kahwang; Nang shaoshanpa aoheye nangte ütinglak yinpha.

³O Youngwanpa, üte shüpshe pha; hangjingne nyihlao hipak tao nangte shapyoong nang.

⁴Nang shaoshanpa mongmei ne tampha O Youngwanpa, hangjingne taowe yoppuwa nang tangte ongnang.

⁵Nanga meinang hüyange ümeng winnang, O Youngwanpa, aoyinne nangte yop khongkümpute yelakpe kenpuwe maatamnang.

⁶Jaipha, O Youngwanpa, taowe yoppute jamlak jingne taowe üngwünpu jaipha,

⁷Shaoshipu hipak me taowe nangte nyik, hangjingne taowe yoppute nange jankülak.

⁸Nang kihpu Kahwang ao-o yenang, O Youngwanpa, nange hanghe lingyangki tüokih-e ao-o yeling ok.

⁹Nange linge ngaipu jatlan üshei peilak hüyange nangte ümme khümlak! O Youngwanpa, iman-e nang kheyongpute yihlulak.

¹⁰Hangjingne Nanga wongnangpupa hüyange yashan yali toi lingnang; nangja shing Kahwang.

¹¹Üte nyüopha, Youngwanpa, nange üte hanghe lingne tamhu nang, hüyange taowe nangte ütinglak-e ngao jailak. Lanshe phünne phawe nang shaoshanlak jingne üte nyüopha.

¹²Ü-mongjang üsheiye nangte yihlulak, O Youngwanpa ü-Kahwang; nang kheyongpu taowe jinte pongtamlak.

¹³Hangjingne Nange üte yelakpe kenpuwa hangshin yongpu! Mangjong nyoi mepu nange tao yinne tamyangki.

¹⁴Otapu kahtalan ü-phei tüi-e peinang, O Kahwang; kuhleihpa mengshi kahtalan-e tao toilak jingne ngang nang, nangte aoyinne mong yepha tüolan kahtawe.

¹⁵Hüpoi nang, O Youngwanpa, shüpshe pheipu hüyange kenne teihpu Kahwang, wangpangpute nün-okpu, hipak phe me yayeng hüyange ütingpa phei.

¹⁶Ü-yekaote lüpkei hüyange üte shüpshe pha; nang shaoshanpa wongnangne tampha hüyange yinpha; Nang shaoshannyu üha yintampha.

¹⁷Nange meimapu toiyehüowe üte hüopha, Youngwanpa! Aope üte nupalan-e nange üte toloimei tampu hüyange jampu ngelakei wüotüolak.