Read Konyak Naga TÜOWELAIHEM 88 Bible Online

TÜOWELAIHEM 88 - Konyak Naga bible

TÜOWELAIHEM 88

¹O Youngwanpa, ü-yintampa Kahwang; tao nang sheshao me wangnyak wangngai shapyangki.

²Taowe yoppu nang tangte peine tamtüoh: Tao shapyoongpute nang na shongpha.

³Hangjingne ü-yaha-a shaoshipuwe maawe ngohnang. Hüyange ü-üyin-a yimshon shongte owe wen nang.

⁴Aoyin jhomsa me yütnang, iman phei tao-o om tamnang. Taowa jamlak ao-o yenangpu kahta ja kih-e ngohnang.

⁵Litepulan yo me taowa ngohte ki; taowa toiyange iman mangjong me angpulan kih-e, aoyin nange lanshe pemei, aoyin shaaji nange yejam oklak ne tüoh.

⁶Shelupu kahsate nange tao shüpteki, shenyakpu hüyange shelupupa kahsa te!

⁷Nang mongshih ngaipuwe üte loishe shüngetai nang, hüyange nang yengyungpu pa me tao shüpteki. Oyaih

⁸Nange ü-shümpalante tao winne tam; nange taowa ümeng ngaipa ne imante lingetam. Taowa ümongme küppe angteki hüyange taine ye-ok.

⁹Shaoshipuwe ü-mük-a kuimah teki. Youngwanpa, nyih jeih she taowe nangte nyiknang hüyange nangte yoppe ü-yak hongnang.

¹⁰Litepulan jingne nange yashanyali toi linglak a? Iman yange yeyange nangte yihlulak a? Oyaih

¹¹Mangjong me nange yelakpe kenpu jeng, yejema-a Abaddon me nange monghüm-e teihpu ngaolak a?

¹²Wangnyak nyoi me nange lingpu yashanyali yejema-a pemeitepu kahtok me nange meimapu ngelak a?

¹³Hüpoi, Youngwanpa, taowe nangte jamlak jingne nyiknang; napning taowe yoppu nang tangte peinang.

¹⁴O Youngwanpa, hangne nange tao yeyahpu? Hangne ü-mepu nang lüppe tainangki?

¹⁵Naha mepu muh, tao shangyangki hüyange pali she ngoh yangki; nange shaoshine tampu hangki yih kaiye taowa khai mengpu weih.

¹⁶Nyamlakpa nang mongshih ngaipuwe tao khaine tam; nyamlak ne nange shümme taipuwe tao mahne tam.

¹⁷Muleampu kih-e nyihlao hipak iman-e tao neikon; ünuk phe mepu iman ü-shongte owe peinang.

¹⁸Ü-shümpa ümeiye nehoi tao winne tüohlak ne nange linge tam, hüyange wangnyak-a ü-eihalan ne mengnang.