Read Konyak Naga TÜOWELAIHEM 89 Bible Online

TÜOWELAIHEM 89 - Konyak Naga bible

TÜOWELAIHEM 89

¹O Youngwanpa, nange yelakpe kenpu taowe jinte loklak; Ü-ju-me jin khongkümpu me taowe nange nyakkenpu pongtamlak.

²Taowe shingnang nange kenpuwe jinte yelakpe ngohlak, hüke nang ütingpa-a wangdang hangke yepope ngoh hüke ngoh nang.

³Nange iyangki, “Taowe lepu kahta phei taowe jiengjeppu lingyangki; taowe ü-shaoshanpa David phei janyangki:

⁴‘Nang mepu huhayimlan-a jinte ahngne menglak; nang ahngching taowe jintepu jingne linglak.’ ” Oyaih

⁵Wangdanglan-e nange lingpu yashan yali toishaolan jingne loktam tüoh; iman-e nang ütingpa jingne loknang, Youngwanpa.

⁶Hangjingne wangme ngohpu aoheye Youngwanpa phei phinpu oklak? Wangdang pinhalan yo me Youngwanpa kih-e aohe ngohnang shi?

⁷Üjaolan jempu ngengtüp me Kahwang-a yeonge nyamlakpa; hüyange I neikon-e aoyin ngoh khongkümpuwe Ite ünyei nyamlak.

⁸O Youngwanpa ütahpa Kahwang, nang kih-e wongnangpu ao ngohlak? Nanga wongnangpu phei, O Youngwanpa, hüyange nang ütingpawe nanga neikon nang.

⁹Wongnangpu yengching tangme nange wanglam lamnang; I mongshih ngaiye yungpu nange laktam nang.

¹⁰Nange Rahab khongkhai te tiengtam hüyange toitam; nang wong üyong phei nange nang wepalan naotam;

¹¹Wangdanglan nangjing, kahtok-o nangjing; nange kahtoknyu hüyange tüome ngohpu sheminlamphe ling.

¹²Nange apyekao hüyange heyekao lingengai; Tabor kahtang hüyange Hermon kahtange mongmeipuwe nangte hem loknang.

¹³Nang me wongnangpu yaksea ngohnang, wongnangpu-a nang yak, nang yakjahye-a no-in-nang.

¹⁴Nang ahngchinga khakshupu hüyange ütingpa me ngaiyangki; nange lingpu khongkümpu me kenpu hüyange ütingpa me hüonang.

¹⁵Kahtalan aoyinne nangte hem phei yoppe khümnang, aoyin ne nang yayeng shüpshe wangngai phangme nyoinang, iman hangshin mongmeilak!

¹⁶Nangjingne iman nyihlao hipak mongmei nang, hüyange iman-e nang khakshupupa jingne nangte yihlunang.

¹⁷Hangjingne nange tomante okpu üyong phayangki; nange kenpu phangme nange tomante okpu ngene tamyangki.

¹⁸Hangjingne toman ree-a Youngwanpa jing, toman Ahngpa Israel üjaopa-a I jing.

¹⁹Hipak ja me himang me nange nang monghümpu shaoshanpate i, “Naomei ütah ja te taowe jampu phayangki; kahta yo mepu taowe lepu naoshe jate taowe nowe inyangki.

²⁰Taowe ü-shaoshanpa David tüo, Ite Ü-üjao minnga phowe ahngne menge tamyangki.

²¹Ü-wonga I phei jinte ngohlak, ü-ünganwonge I wongnang ne tamlak.

²²I wepalan-e aope-o Ite naowe tampu yengohlak; ümenglan-e I yenaotamlak.

²³Iphei yemeipalan taowe tien-e tamlak, hüyange Ite aoyinne nulakei moilan toilak.

²⁴Taowe Ite kenlak hüyange Ite monghahpu anglak; taowe Ite jinte okpu ngene tamlak.

²⁵Taowe I yak-a yengching tang me, hüyange I yakjah ye-a yengyinlan tang me anglak.

²⁶Iye üte ilak: ‘Nanga Üpa hüyange Ü-Kahwang; nanga ü-longnyu hüyange yinyepa!’

²⁷Taowe I-a üwangne puhpupa ü-halom ne hüyange kahtoknyu ahnglan yo me sheyongpupa ne linge tamlak.

²⁸Taowe jinte Ite Taowe janyangpu anglak, hüyange Iphei Taowe jiengjeppu jinte anglak.

²⁹Taowe I ahngchinga wangdang hangke yepope ngoh hüke ngohtamlak; I mepu huhayim jinte ahngne menglak;

³⁰Hüpoi I huhayimlan-e Ü-ngaokhüm yejonma-a, hüyange ü-ngaokeng kih-e yenyoima-a,

³¹taowe nyüowetampu ye-i-yeshepe lingma-a, hüyange ü-ngaokenglan yejonma-a,

³²hüwante iman ünu jingne Taowe imante shaoshi ne tamlak; iman-e püohyangpu jingne Taowe iman shangne tamlak.

³³Hüpoi, Taowe Ite kenyangpu yah yeteilak, yejema-a Taowe Ite janyangpu yelingpe yengohlak,

³⁴Taowe Iphei jiengjep yangpu yemenglak yejema-a Taowe Ite janyangpu ja nehoi yeyah teilak.

³⁵Ü-üjaopa min me Taowe jintepu jingne ja me janyangpu, Taowe Davidte aope-o ngaoleihne linge yetamlak.

³⁶Ime jinte huhayim ngohlak, hüyange I ahngchinga wanghe kih-e ü-sheshao me ngohlak.

³⁷Wangme hangke ütingpa me saki phawe linnyu jinte ngohyapeih tüokih-e ngohlak.” Oyaih

³⁸Hüpoi sha-a nanga nange minnga phowe lepu tangme mongshih nang! Nange I wüngmakke tüoh hüyange yeyah.

³⁹Nang shaoshanpa phei nange jiengjeppu nange meng, hüyange I ahngpa shaoshaoh-a shamyo te shüp.

⁴⁰I jing chingnyu jantpenyulan nange menge tam, hüyange I jing yomtep heamne tam.

⁴¹Aoyin linne tai khongkümpuwe I jing kuh yah; Itepu chingyo yupilan-e Ite nyitam.

⁴²Nange ü-wepalante okpu pha; nange iman khongküm mongmeine tam

⁴³Nange Ijing yonglah jajang japu ne mengetam hüyange nange shapju me Ite yejam.

⁴⁴Nange I mepu ahngpa hon shengshaoh yahtei, hüyange I ahngpa shotjing kahtokte toitai.

⁴⁵Nange I naoshewan nyih hipak shoh ne tam; Nange Ite wüokhüwpuwe khopne tam. Oyaih

⁴⁶O Youngwanpa, hangshin laowe? Nange nang nying nyingke jinte üküm yenangpe lowe ngohlak a? Nang mongshih vün kih-e hangshin laowe loonglak?

⁴⁷Ü-üyin jin hangshin shoh, teih tüoyah; teihtüoyah toman khongküm nange hangko kahta ja nehei lingengai!

⁴⁸Aope-o yelilak ne ao ngohpu oklak? Kahta jawe I nying nyingke mangjong mepu hangke tükke oklak? Oyaih

⁴⁹Youngwanpa, üwangne nange kenyangpulan-a üpu? Nange Davidte janyangpulan-a üpu?

⁵⁰Nang shaoshanpa, üte hangke yaolene tamnang, tahpe tüoh: Kahwangte yemengpalan-e phoiwüm tampu taowe hangke nün oklak!

⁵¹Nang wepalan-e yaoleye tam nang, O Youngwanpa! Ümekente I tailakei iman-e nange minnga phowe lepupa yaole tamnang.

⁵²Youngwanpa jinjinte yihlu tüoh! Amen! Hüyange Amen!