Read Konyak Naga TÜOWELAIHEM 9 Bible Online

TÜOWELAIHEM 9 - Konyak Naga bible

TÜOWELAIHEM 9

¹Taowe nangmin yongning, Youngwanpa, ü-mongjang üsheiye, nange lingpu yashan yalipu khongkümpu jeng taowe ngaolak.

²Nangjing ne taowe hoongli mongongpu phei lokning. Taowe nang min yongpu hem lokning, O Ütahpa Kahwang.

³Aope nang peingoi, ü-wepalan leihye mah: iman toita hüyange li.

⁴Nange ngaophünpu me nanga khakshuwe hüyange yepüoh yepin, hüyange nange üte meishe ngao phün.

⁵Nange jatlante teetam, hüyange ümenglan mahtam; nange iman min-a jin jintepu jingne phut win.

⁶Toman wepalan-a jintepu jingne küm-e shoteki; nange iman chingnyulan mahtam; hüyange iman jaoshe-e pemah teki.

⁷Hüpoi Youngwanpa-a jinjintepu jingne ahngpa; ngaophünlak jingne Iye yoi ahngpa shotjing tümteki.

⁸Iye kahtoknyute ütingpa me khakshuwe wanglam lamnang; Iye jatlan ütingpa me ngao phün nang.

⁹Youngwanpa-a shaoshi phangme ngohpalan jingne lojing; shanghah shaoshi hipak me yinpu nyoi.

¹⁰Youngwanpa, aoyinne nang shing, iman-e nangte monghümlak, aoyin nang tangte peinang nange iman yewintüoh.

¹¹Youngwanpate minyong hem loktüoh, aowe Zion me wanglam lamnang! Jatlan lilite Iye hanghe ling pongtam tüoh!

¹²Aoyin shaoshinang, Kahwange teihtüo nang; iman üngwünpu Iye yepetüoh, hüyange aoyinne imante yeshupe ling Iye shaoshi phanang.

¹³Üte shüpshepha, O Youngwanpa! Ü-wepalan-e üte peitampu shaoshipu te leipha! Lilak peten mepu tao yintamlak-a nang hei ngohnang;

¹⁴hümme nakshih tao Zion kahtalan sheshao me yongpu oklak; hüyange hanghe jingne taowe nangte minyong pha toishaolan khongkümpu jeng imante ilak. Tao mongmeilak hangjingne nange tao yinne tam.

¹⁵Jatlan-e jhom shao hüyange tüome yei; iman yoi tün me iman nying nyingke li.

¹⁶Youngwanpa I nying nyingke yoi ütingpa ngao phünpu me ütahte ngai, hüyange ümenglan-a yoi toishaowe iman pho. Oyaih

¹⁷Ümenglan-a yimshonte tailak, Kahwang pemeipu jatlan khongküm.

¹⁸Toinanpalan jinte shappe yetüohlak; toinanpalan monghümpuwa jintepa-a yemah tamlak.

¹⁹Peikei, Youngwanpa! Kahtalan-e nangte naone tahtam! Jatlan nang sheshao me peitam tüoh, hüyange imante ngaophün phatüoh.

²⁰Iman nyamne tamtüoh, O Youngwanpa; imante iman-a hangko kahta ja hei she shingne tamtüoh. Oyaih