Read Konyak Naga TÜOWELAIHEM 92 Bible Online

TÜOWELAIHEM 92 - Konyak Naga bible

TÜOWELAIHEM 92

¹O Youngwanpa, nangte minyong phalak hangshin meipu, nangte yihlupu hem lokne, O üshei phei Ütahpa Kahwang;

²Napjeih she nange yelakpe kenpu jeng pongtamlak hüyange yajeih she nange ütinglak-e teihpu,

³yanlah pheipu kongtoi hemwüng phei hüyange kongki ümtük phei üng wüng meiye;

⁴Hangjingne Nang ütahpa toishaowe, O Youngwanpa, tao mongmei ne tamnang; nange hanghe lingyangki tüopa jingne, taowe mongmei phei lok nang.

⁵O Youngwanpa, nange lingpu toishaolan-a hangshin yongpu! Nang juteih-a hangshin lupu!

⁶Hatüowa üngapawe yeshingpu, kahta ükhuwe shinge ye-okpu ja ngohnang;

⁷hüng jongpu kih-e ümenglan jongne ok, aoyinne yeshupu toi ling iman jaalun ne ok; tüoyangpoi iman lanshe mahne tamlak.

⁸Hüpoi O Youngwanpa nanga jinte Ütahpa me no-in-nang.

⁹Hangjingne Nang wepalan lilak she toman-e shingnang, hüyange ümenglan khongküm naotamlak.

¹⁰Nange ü-wonga Pongwa shin-e wongnange lingtam; Nange ü-tang me sheminlamphe minnga shoktam.

¹¹Ü-wepalan-e yenaopu taowe nge, hüyange ümenglan üngwünpu taowe jai.

¹²Khakshupulan-a logpee kih-e jaalunlak; iman-a Lebanon mepu cedar kih-e jonglak.

¹³Iman-a Youngwanpa nokme deipu pee kih-e, hangheyin teman Kahwang khümjing me jong ya nang.

¹⁴Iman wu-khang tepheite ülick licknang, hüyange iman-a jinte hü-ünge hüyange wongnang ngohnang.

¹⁵Tüo kaiye Youngwanpa-a tingkhakke ngohnang she hüonang; I-a ü-longnyu, tao yintamlak jingne I me ye-ok yeshangpu hango yenang.