Read Konyak Naga TÜOWELAIHEM 94 Bible Online

TÜOWELAIHEM 94 - Konyak Naga bible

TÜOWELAIHEM 94

¹O Youngwanpa, aowe shaoshi phanang hatüo Kahwang-a nang ngohnang; nang mongshih Ütahte ngaitam tüoh!

²Yayongtüoh, O kahtok ngaophünpa; otapalante iman-e tüolak hanghe shunang phatüoh!

³O Youngwanpa, ümenglan hangshin laowe, hangshin laowe, mongmei ne tamlak shi?

⁴Toilange ümeng lingpalan hangshin laowe ota ne tamlak, hüyange iman ümengpa jingne yongelüolak?

⁵Iman-e nang kahtalan pülüptainetam, Youngwanpa; aoyin nangjing ngohnang tüolante iman-e shangne tamnang.

⁶Iman-e wamnyu hei yinpalan toinang, hüyange iman-e khah-ha lan mahtam nang.

⁷hüyange iman-e inang, “Youngwanpawe teman ye-nge ja; Jacob Kahwange shingo yeshing ja.”

⁸Kahta yo me numan üngapalan, shingyahtüoh; hüyange numan ükhulan, hangkihpu tingme numan deitalak?

⁹I aoheye na jhottam, Iye yejailak a? I aoheye mük nyimtam, Iye ye-ngelak a?

¹⁰I aoheye jatlan ngao phünnang, I aoheye kahtanyuha te manlam nyüotam nang, Iye yeteetamlak a?

¹¹Youngwanpawe kahtalan teihpu shingnang; iman me hangshin juteih yenangpe ngaonang Iye shingnang.

¹²Youngwanpa, nange nyüoweleiye tampu ao te nange nang ngaokhümlan nyüowe tam, hangshin mongmei lak!

¹³Shaoshipu nyih mepu ümenglan pholak jingne kahsa manshao manshao Ite toloimei phatüoh.

¹⁴Hangjingne Youngwanpawe yoi kahtalan winne yetüohlak; aoyin I jing ngohnang Iye wüngmakke yetüohlak.

¹⁵Ütingpa me ngaophünpu gho me üne-o ngelak, hüyange khakshupu kahtalan khongkümpuwe tüopate jamlak.

¹⁶Ümenglan phei tüi-e ü-jingne ao yong! Ünu lingpalan phei tüi-e ao ü-ne meng?

¹⁷Youngwanpawe üte yejemshihma-a, taowa mamshe hango yejaipu kahtokte taiteiye ngoh hahshepu.

¹⁸Aope taowe i, “Ü-ya leaknangki,” hüpoi nange yelakpe kenpuwe, O Youngwanpa, tao nowe yah.

¹⁹Hangkih tingme tao loishe mongshang, nange tao toloimeitam hüyange tao mongmei ne tam.

²⁰Ünu ahngpa shotjing, hangheye ünu ngaokeng lingtam nang, tüopawe nang phei shüpjempu ngohlak a?

²¹Iman-e kahta ümei phei tüi-e konmeng kon nang, hüyange hang ümengo yenangpalan li ne tamnang.

²²Hüpoi Youngwanpawe tao shaoyinne ang; Ü-Kahwange tao jongwanne ang.

²³Iye imante iman ünu toishao jingne shangne tamlak hüyange iman ünu jingne iman mahtam lak; teman Kahwang Youngwanpawe iman mahtamlak.