Read Konyak Naga TÜOWELAIHEM 96 Bible Online

TÜOWELAIHEM 96 - Konyak Naga bible

TÜOWELAIHEM 96

¹Youngwanpate hem üla ja loktam tüoh! Kahtok üsheiye Youngwanpate loktam tüoh!

²Youngwanpate loktam tüoh, hüyange Ite minyongtüoh! Iye teman yintampu ngaolan ümei nyih jeih she pongtam tüoh.

³Jatlante I müktishiwapu, kahtalan üsheite I wongnangpu I toishao pongtam tüoh.

⁴Youngwanpa-a yongnang hüyange ütahpa me yihlu phalak yang; ülao kahwanglan üshei phei shenyei she Ite yihnoonlak yang.

⁵Ülao jatlan kahwanglan-a khongküm mieng shaha, hüpoi Youngwanpawe wangdanglan linge ngaiyangki.

⁶Müktishiwa hei ütingpawe I neikonne; ünganwong hei shemeiyaoma puwe I khümjing maa ngoh nang.

⁷Youngwanpa yihlutüoh, kahtok me ngohpu kahta üshei; I müktishiwa hei wongte yihlutüoh.

⁸Youngwanpa müktishiwa yihlutüoh; dopu yahyah hüyange I ghonyoite peikei.

⁹I phihlangpu üjaopa sheshao me Youngwanpate ümme khümtüoh; I sheshao me nintüoh, kahtok üshei!

¹⁰Jatlan üsheite itüoh, “Youngwanpawe wanglam lamnang! Kahtoknyu-a nyoi ja me mongjüonge nyimnang hüyange po ne ye-oklak; Iye kahtalan-a ngaotingpa phei ngaophün lak.”

¹¹Kahtok mongmei tüoh, hüyange wangdang mongongtüoh; Yengching hooktüoh, hüyange nangme ngohpu mokh-ha liliye waotüoh;

¹²kahko, hüyange nangme ngohpu shemin lamphe mongmei tüoh! Phao mepu peelan-e mongmei puwe üngwünlak,

¹³kahtoknyute wanglam lamlak jingne Youngwanpa peiküki; Iye kahtoknyu me ngohpu kahtalante khakshupu phei hüyange meijange wanglam lamlak.