Read Konyak Naga DETNGAO 1 Bible Online

DETNGAO 1 - Konyak Naga bible

DETNGAO 1

¹Hatüowa Solomon, David üha hüyange Israel ahngpa detngaolan ngohnang.

²Hatüo me konjong hei hengpu ümei shinge yahlak jingne, hüyange iye angpu ngao ülu phei shinglak nangte jamlak detngaolan ngoh nang.

³Tüolan-e nangte hangke konnangpu phei hüyange hangke nyim meilak, ütingpa me, hüyange meiye nyoilak nyüo phalak.

⁴Tüolan-e yeshing yemanpu kahtalan üdeipane hüyange jinlalante hangke iye okkeshangpa ne menglak nyüolak.

⁵Tüolan detngaowe kentamongtingpu kahtalan tepu manlam te nehoi hüyange shinge manpalante nehoi lamwoipu phanang.

⁶Tüokaiye kentamongtingpu kahtalan-e yeshingokpu jeng hüyange detngao me yeshing okpe lowe ngohpu ülam shinge ngene tamnang.

⁷Youngwanpate nyamlepuwa manlam ükong wangpu ngoh nang. Ükhulan-e konjongte hüyange nyüowelei tampute yao lenang.

⁸Ü-ha, nangpawe nyüoleipu jaitüoh, hüyange nangnyuwe winshaipu win-e tah ang.

⁹Iman-e nyüopuwe nang nyoingoh shangnyeihkhek ümei kih-e yejema-a yükkih-e nang shemei yaomawe tamlak.

¹⁰Üha aope ünulan-e nangte toklakei, tüopate pha ne tah ong.

¹¹Iman-e ilak, “Taihahkei toilak jingne ütam ja yamhah! Wonne wanglak jingne ümeng yenangpu kahta ütamte shümhah!

¹²Yimshon-e lingpukih teman-e iman-a üyin me, hüyange jhomsate ongpulan kih-e lünge taihah.

¹³Teman-e toinyu nanha ülam lili tüolak hüyange teman noksa me nyieleih-e yepuwe maalak!

¹⁴Kei toman phei omkei hüyange teman-e nyieyah yepuwe teman liliye tam-e yahlak!”

¹⁵Ü-ha, hükihpu kahtalan phei tah tai. Iman mepu yan-e ngohtüoh.

¹⁶Hangjingne ümengpa linglak jingne iman ya mam nang. Iman-a hipak phe me toilak jingne tümyange ngohkülak.

¹⁷Aope nange phohupu awhalan-e ngeye shaan saalakei yemei.

¹⁸Hüpoi hükihpu kahtalan-a hanghepa tün me iman lilak ngohnang, iman nying nyingke tüopa tünkam me shot nang.

¹⁹Kuhleih-e peipuwe hipak phe me nyieleihpalan üyin ngohnang. Hatüowa yakphei lükke nyoipu üyin khongkümpute ngainang.

²⁰Konjonge chingkeng lamme hüyange pheeileih nyoilan mepu nyik ngaining;

²¹Chingnyu petenlan me hüyange ümeken nyoi me kahtalan jemnang üngwünne nyiknang:

²²“Kahta ü-ngalan numan hangshin laowe üngapa ne menghupu? Numan hangshin laowe shingemanpu tangte phoiwümpuwe shokke tam-e ngohlak? Numan-e aope-o yeshing oklak a?

²³Taowe aope nangte mengetee jaiyah; taowe nangte hengpu ümei phalak hüyange taowe ü-manlam numan phei tam-e hanlak.

²⁴Hangjingne taowe numante nyikyangki, hüpoi numan-e yejai. Aope Taowe üyak hong. Numan-e üte mong yepha.

²⁵Numan-e taowe hengpu hango yeyah hüyange taowe numante tinge tamlak numan-e yemong.

²⁶Tüokhei numan aope shangpu hüolakei taowe numante nyitamlak. Aope ümengpawe numante phoitamlak.

²⁷Aope numan tangte tüopa wangyang kih-e, wangyang ümeng shangpu peilakeih, hüyange numan dakpu hüyange ponghahpu peilakeih taowe phoitamlak.

²⁸Hüwante iman-e üte nyiklak, hüpoi Taowe yejanlak. Iman-e mongpha-e Ü-yamlak, hüpoi yetüolak.

²⁹Hangjingne iman-e shingemanpute nu hüyange Youngwanpate nyamlelak yele.

³⁰Taowe hengetampu yeyah yejema-a taowe tinge tampute aope-o mong yepha.

³¹Iman-e hanghe tüolakne shu tüopa tüolak; hüyange iman yoi toishao kaiye iman lilak.

³²Hangjingne ngohpu liline ngohtepuwe iman toine tamlak; hüyange ükhulan jenanghahpu ne laile she ngohpu jingne iman mahlak.

³³Hüpoi aoyinne üte jaiyapeih iman yinne ngohpu oklak. I yinlak, nyamlak ülam hango yenanglak.”