Read Konyak Naga DETNGAO 10 Bible Online

DETNGAO 10 - Konyak Naga bible

DETNGAO 10

¹Hatüolan-a Solomon detngao: Kentamongting hawe yoipa maohe tamnang; ngawoopu hawe yoi nyu mongshang ne tamnang.

²Üting ye-i-pe tüopu moth me küw yenang, hüpoi khakshupupawe hei nang yintamlak.

³Youngwanpawe khakshupume ngohpalan nyaowelene yetam, hüpoi ümenglan iman-e waopu mepu yantamnang.

⁴Jook woopu yak-e nang toinan nang, hüpoi toi ngange lingpuwe nang hakengai nang.

⁵Ju ngoiwante mongtapawe tümtanang, hüpoi tahyahpu hipak linne shi ngohpa-a wüo tüonang.

⁶Khakshupuwe moiman tüolak, ümeng kahta ja ngao me mop ngailak wanglam jüoyange ngoh nang.

⁷Khakshupu kahtalan-a moiman ja ne teih ngohlak, hüpoi ümenglan-a mamshe pemah lak.

⁸Mongtapalan-e hengpu ümei yahnang. Kahta aoyinne ngawoopu ngaonang iman yeimah lak.

⁹Üting ngohpu kahtalan-a yawin mong ye-aope yinne ngoh nang, hüpoi ütingpa me yengohpalan-a haolak.

¹⁰Aowe mük shaha leiyange ngoh, tüowe ütuh ngainang, hüpoi aowe ngaiphaih-e ngao, chingmei peinang.

¹¹Khakshupa kahta ngaowa üyin yengpeiwo, hüpoi ümeng kahta ja ngao me mopngailak wanglam jüoyange ngohnang.

¹²Khah teihpuwe ütuh ngaitam nang, hüpoi kenpuwe ümeng lanshe büange tüohnang.

¹³Jelo pheipu kahtawe juteih phei ngaonang, hüpoi kahta ükhu ümenglante shaoshi ne tamlak wongpong.

¹⁴Kentamongting pa lan-e okpu shin-e manyangpu tüonang, hüpoi ükhupalan ngao me ütuh owe ngohnang.

¹⁵Hakpalan mepu moth-a chingtuk penyu, toinanpuwe toihalan mahne tamnang.

¹⁶Khakshuwe lingpu hünghaowa üyin, hüpoi ünuwe ünyei ünu püonang.

¹⁷Imante tinge tampute jaipu kahtalan üyin ngohlak, hüpoi aoyinne iman yetingja she yejan ok iman-a ütuh me ngohnang.

¹⁸Kahta ja aowe Iye nupu lowe anglakei tahleipa. Aowe ngaopapa woonge yannang üngapa.

¹⁹Nange hangshin me ngao, teshinne nange ünu omne ok; hüpoi aoheye yoi yee tük-e ok kentamongtingpa.

²⁰Khakshupu kahta ngaowa ghümjao lenang; kahta ümeng juteih-a angsa.

²¹Kahta ümeija ngaowe kahta üngang küw tüolak, hüpoi ükhupa-a konjong waowe linang.

²²Nang moth-a Youngwanpa moiman ngoh nang. Hüyange tüopa tangme Iye mongshanglak yepüotam ja.

²³Püoh-e lingpute mongmeilak-a üngapa. Hüpoi dei tapu kahtalan-a konjong me hoongli nang.

²⁴Khakshupulan-e iman-e waupu tüonang, hüpoi ümenglan-e hanghepate iman shenyam tüo hüonang.

²⁵Aope yipnyeih peinang, hüyange ümenglan-a puwe teinang, hüpoi khakshupu kahtalan-a wangpangpute yinnang.

²⁶Nang toi ütamja lingne aope-o jookpa kahta tah yah; I-a nang fajümlak üshiyeng yejema-a nang mük me vünkhuh kih-e ngoh phalak.

²⁷Youngwanpate nyamleyah, hüyange nang jin laowe ngohlak. Ümenglan-a yoi hipak ngoishao me linang.

²⁸Khakshupu kahtalan monghüm-a üküm yenangpu mongmei ngohnang, ümeng kahtalan monghüm-a lanshe jajang japu.

²⁹Youngwanpawe khakshupu kahtalan yinnang, hüpoi aoyinne yeshupu ling tüolan mahtam nang.

³⁰Khakshupu kahtalan-a wangpangpute yawin mongye-a-lak, hüpoi ümenglan-a tüopa kahtok me yeyinlak.

³¹Khakshupu kahtalan-e konjong ngaonang, hüpoi ünu ngaopu yi-a lakke tamlak.

³²Khakshupu jupen-e yayeng ngao ilak shingnang, hüpoi ümenglan-e wangpangpute taklak ngao ngaonang.