Read Konyak Naga DETNGAO 11 Bible Online

DETNGAO 11 - Konyak Naga bible

DETNGAO 11

¹Üting yejepu toklak jonpalante Youngwanpawe haainang. Ütingpa toklak jonpalante I mongmei nang.

²Aope maohepu pei nang mamshe wüotüolak. Hüpoi innenyaipa ne menglaka kentamongtingpu.

³Mei ngohma-a, nanga khakshuwe woipupawe woinang. Kahta aoyinte üting yelak ok iman-a yoi ütingpa me yengohpuwe yei tamnang.

⁴Nang lipu hüopu nyih me toinyu nanhawe nangte hang ümei-o yeling oklak; hüpoi khakshuwe ngohpuwe lilak mepu yinlak.

⁵Khakshuwe ngohpuwe kahta ümei ja üyin nyaishüm-e linge tamnang, hüpoi ümeng kahtawe yoi yeipu hüonang.

⁶Üjaopawe khakshupu kahta yinnang, hüpoi ütam ja aoyinte üting yelak ok iman-a I yoi ünyei yah-hupu me küpnang.

⁷Aope ümeng kahta ja lilakei, I monghümpu-o I phei linang, Hakke yongpute monghüm-e ngohpuwa hanghe-o yemeng.

⁸Khakshupulan ümeng mepu büang nang. Tüoleiye tüopa-a ümenglante shah nang.

⁹Kahwang yeshingpu kahtalan ngaowe iman yupilan menge tamne ok, hüpoi ütingpa khakshupuwe nang yin oklak.

¹⁰Aope khakshupu kahtalante shao meipu ngailakei chingnyu ja-a mongmei nang, tüoyangpoi aope ümeng kahtalan lilakei mongmei üngwün nang.

¹¹Aope khakshupu kahtalan-e yoi moiman phalakei chingnyu ja-a yonge tam nang; hüpoi ümenglan ngaowe chingnyu te menglak yah pei nang.

¹²Mih jeng phoiwümpuwe maawe ngaolaka ngawoopa. Nang mongtapa ne mengma-a, nang jünge ngohlak.

¹³Tahlo ngaopawe ngaopapa woonge teinang; hünyihi ütamja ao me kenting shakpu ngoh tüopawe jünge angnang.

¹⁴Ümeken me jongit lamshempa yenanglakeih jat ja-a yei tanang. Nyüoleipa maapuwa yawin mong ye aolak.

¹⁵Mih-hüng pheeisea shümhahma she janküma-a phei me nang mong menglak. Hüpoi hüke minling she lantamküma-a yinpu oklak.

¹⁶Shüpshe pheipu shekote wangshüm hüonang, hüpoi wanglam yenangpu shekowa wüokhüw nang. Jookpu kahta jawe aope-o ngin yengohlak, hüpoi kahta ü-shi-üngün hak külak.

¹⁷Yayeng pheipu kahtawe yoi nying nyingke ümeipa ling nang. Hüpoi mengshi yahma-a, yoi nying nyingke ma yah nang.

¹⁸Ümeng kahtalan-e ütingme hang küw-o yetüo, hüpoi aoyinne khakshupu dei ütingpa khintak tüonang.

¹⁹Aoyinne khakshuwe linglak jingne teih nang üyin ngohlak, hüpoi aoyinne püohpu linglakte ngang nang lilak.

²⁰Ünu kenmong pheipu kahtalante Youngwanpawe nunang, hüpoi aoyinne ütingpa ling ken nang.

²¹Nange tüo shingyah, ünu kahtate shangne yetampe yetüohlak, hüpoi khakshupu kahta-a yangne tamlak.

²²Nyoingoh wanglam yemeipute naoyha meipu shekowa ak nateang me hon wentong küntampu kih ngohnang.

²³Khakshupu kahtawe hanghe wao wangpang pute ümei peinang; hüwante kahta ümenglan-e iman-e hanghe yahhu tüoyange moilan mongshih ngai ne tamnang.

²⁴Kahta ütam-e iman ngin-a yekheihpe win nang hüyange yelakpe muh hak nang. Ülao lan-e kentinge jonnang, tüoyangpoi shetoi she toinang.

²⁵Phahupu mong ngohyah, hüyange nang tüoponglak. Eihate jamtüoh, hüyange nange-o jampu tüolak.

²⁶Kahta aowe tah hei cee bung lowe ang kahta lan-e phoi nang; hüpoi aowe yüolak jingne ngaiye tamnang Ite iman-e yihnoon nang.

²⁷Aoyinne meimapu yam, meimapu tüonang, hüpoi aowe mopshaklak yam iman-e hüke tüonang.

²⁸Aowe yoi toinyunanha tangme monghümnang, kui mahlak; hüpoi khakshupulan-a phümyoi meipu kih-e jalunlak.

²⁹Kahta aowe yoi noksa me mopshakpu yah peiyapeih ükümne I jingne hango yenanglak. Ngawoopa lan-a wangpangpute kenta mongtingpalan shao shanpa ne mengnang.

³⁰Khakshupupa ülick-a üyin pee, hüpoi teelakpuwe üyin yahtei nang.

³¹Khakshupalante kahtoknyu me hünghao phama-a, hüma-a Kahwang yeshingpalan hei ünulante phoiwümpu hangshin yonglak!