Read Konyak Naga DETNGAO 12 Bible Online

DETNGAO 12 - Konyak Naga bible

DETNGAO 12

¹Aoyinne manlamte kennang aope I püoh-e tainang tinge tamne tamhu nang; hüpoi tinge tampute nupuwa ükhupa.

²Kahta ümeilante Youngwanpa monghah nang, hüpoi aoyinne ümengpa tüm iman yeitam nang.

³Ümengpawe yinne tampu yepha ok, hüpoi khakshupu kahtalan mongjüonge yong nang.

⁴Shekonyu ümei ja-a yha netanpa jingne ahngpa shaoshaoh; hüpoi shekonyu aowe yoi netanpate wüokhüw tamnang, yha-a I jingne waan me seanampu kih ngoh nang.

⁵Khakshupulan juteih-a meinang; hüpoi ümengpalan-e winshaipu-a lolamphalak.

⁶Ümeng kahtalan ngaowe-a toitam nang, hüpoi khakshupu ngaowe-a aoyin mengne ngoh yinne tam nang.

⁷Ümeng kahtalan iman yeimah nang hüyange huhayimlan yetüoh, hüpoi khakshupu kahtalan noksalan-a yelakpe ngoh tainang.

⁸Kahta ja-a Ime nangpu konjong phei phin-e yihlunang; hüpoi juteih ükhu phei ngohma-a, kahtalan-e ye-i-yeshelak.

⁹Kahta üyong ja ne hüoyange hahlak yenangpe ngohleima-a, yoi jingne ngoh okjange toi linge hah ngohpu kahta shemeipu.

¹⁰Khakshupu kahtawe yoi yinmokte namno nang, hüpoi kahta ümenge yinmoklante mengshi nang.

¹¹Toi ngange lingpu kahhampa ja me hahlak üngang ngoh nang, hüpoi yahlak wongpong yenangpu toishao me hipak winpuwa üngapa.

¹²Ümeng kahtawe yah hupu khongkümpuwa ünu toi linglak jingne yam-e tüo hupu, hüpoi khakshupu lan-a mongjüonge yong nang.

¹³Kahta ümeng ja-a yoi ngao tün me linang, hüpoi khakshupu kahta ja-a yoi nying nyingke shangshih mepu taiye oknang.

¹⁴Nangtepu ülick-a nang juwe hanghe i hüyange nange hanghe ling tüome hei ngohkülak; nange hanghe lingyangki nange tüolak.

¹⁵Kahta ükhulan-e iman-a tinge ngoh nang she teih nang. Hüpoi kentamongtingpa lan-e hengpute jai nang.

¹⁶Üngapalan-e iman ngayounpu mamshe hüonang; hüpoi juteih pheipu kahtawe teetampute hangko yeteihpe tüoh nang.

¹⁷Aoyinne ngaotingpa ngaoyapeih khakshupu toishao ngainang; hüpoi ngaoleih saki ngaowe lolam tamnang.

¹⁸Juteih yenangpu ngaowe yanglow-e kopu phei shelu she ko nang, hüpoi kentamongtingpu yee-e meiye tamnang.

¹⁹Tahleih yee nyimpuwe üyin shohtam nang, hüpoi ngaotingpa juwa jinjinte ngoh nang.

²⁰Aoyinne ünu linglak jingne tümnang iman-e honglapu nyoingoh-e mokh ne tamnang, hüpoi aoyinne ümei jingne lingnang iman-e mongmei tüolak.

²¹Khakshupulante ümeng hango yengai, hüpoi ümenglan me hango yenangyapoi hüpoi shangshih shaha.

²²Tahleih ipu jupen te Youngwanpawe nunang, hüpoi aoyinne iman ngao mongjüonge ange oknang imante moiman nang.

²³Juteih pheipu kahtalan-e iman-e hanghe shing jünge yengaipe angnang, hüpoi ükhulan-e iman yeshing yemanpu ponge tamnang.

²⁴Ngange toi lingpu yakte wong yaphalak; jookpa ne mengpuwe-a nang rha ne mengpha lak.

²⁵Mongshang puwe nang mongmei yah teitephalak, hüpoi yayeng ngaowe nangte loiye tamphalak.

²⁶Khakshupu kahta-a I shümpa jingne lamwoipa, hüpoi ümengpa lamnyu hüopuwe iman ünyong yete woinang.

²⁷Nang jookpa ne mengma-a, nange hanghe jingne ngang nang nange aope-o yetüolak, hüpoi nange ngange toi lingma-a, nange yatuhshao ümei tüolak.

²⁸Khakshupupa üyin jingne lamnyu; ümengpa-a lilak yete lamnyu.