Read Konyak Naga DETNGAO 13 Bible Online

DETNGAO 13 - Konyak Naga bible

DETNGAO 13

¹Kentamongtingpu hawe Ipawe tinge tampute mongphawe jai nang, hüpoi jam loipoipu kahtawe aope-o yeshu she yeteih ok.

²Kahta ümeilan-a iman juwe hanghe iyangki tüojingne ümei tüolak, hüpoi lowelampalan yak phei lük hupuwe lahnyik teiye ngoh nang.

³Aoyinne yoi jume ngao yepang, Iye üyin tüknang; hüpoi aoyinne iman jupong loishe epnang mahshümpu pei nang.

⁴Jookpa jawe hangshin yonge yah hu hangne-o yemeng, Iye hatüo aope-o yetüolak. Ngange toi lingpa jawe Iye hanghe yahhu tüolak.

⁵Ngaotingpa kahtawe tahleih te nunang hüpoi ümeng kahtalan ngaowa wüolakpa ne hüyange mongmenglakpa.

⁶Khakshuwe ngohpuwe hango yeshingpu büang nang; ümengpawe ünulan yeitam nang.

⁷Kahta ütam-e haknangpu kih-e hüonang, hüpoi hango yenang. Ütam-e hakyang pheite toipa ne hüonang.

⁸Hakpa kahta jawe I yinlak jingne yoi ngin jonnang, hüpoi toiha kahta jate aohi-o nyam yeshao.

⁹Khakshupulan-a yeonge meiye teepu wangngai kih-e; ümenglan-a mahtapu vüntük kih-e ngoh nang.

¹⁰Loipoipuwe hango ye-ngaitam hüpoi mopshak tamnang. Henge tamkhu she tongpupa kentamong shetingpu.

¹¹Moth hangshin owe tüo, teshin-e owe nange mahlak. Tüolak jingne hangshin wanne tüo, teshin-e nangme wangman-e ngohlak.

¹²Aope monghümpu me mayahlakei, mongjang-o mayah nang, hüpoi ütingpa teihpu peipuwe üyinpe mongmeiye maanang.

¹³Aoyinne hengpu ümei yeyah, iman-e shange pongpu te nyik nang; hengpu ümeite woiyahma-a nanga yinpu.

¹⁴Kentamongting palan-e nyüopuwa üyin yenglok; tüokaiye lilak tün mepu yinpu oklak.

¹⁵Jelo pheipuwe yihnoonpu tüonang, hüpoi aoyinte üting yelak oklak ne ngoh tüolan-a menglak lamnyu me.

¹⁶Deitahpu kahtawe iman-e lingshao me hipak phe me teih lei nang, hüpoi ükhulan-e iman-e yeshing yemanpu üngwünne pongtam nang.

¹⁷Ngaolan kipa ümenge shangshih yahpeinang; hüpoi monghümpu ngaolan kipawe, meitampu pei tamnang.

¹⁸Aowe nyüowe tampute mong yephalakei toinanpu hüyange mongmenglak. Hüpoi aowe tinge tampute jailakei Ite wangshüm hüonang.

¹⁹Nang yahawe hanghe yahhu tüolaka hangshin meipu! Ükhulan-e ünu mepu lüppe yelak yemong.

²⁰Kentamongtingpalan phei nang püangtüoh hüyange nang kentamong tingpa ne menglak; Nange ükhulan phei shümpa ne mengma-a, nanga menge tampha lak.

²¹Ünulan pheite kenphe me moppu woinang, hüpoi khakshupu kahtalante shemeipupa toilam-e hünghao phalak.

²²Kahta ümei me yoi huyimlante tüohlak ne moth ngoh nang, hüpoi ünulan moth-a khakshupulan jingne jemnang.

²³Toinanpa kahta kahme hahying üngang ngaine ok; hüpoi tüopa-a ngaoting ye-ipupawe moiteinang.

²⁴Aoyinne hanti yejon iman-e hayimlante nunang, hüpoi aoyinne imante ken nyinghapu phei imante winjai ne tamnang.

²⁵Khakshupulan wangman-e hahyinge ngohnang, hüpoi ümenglan seanyu-a ükeng.