Read Konyak Naga DETNGAO 15 Bible Online

DETNGAO 15 - Konyak Naga bible

DETNGAO 15

¹Jünge ngaojanpuwe mongshih ngaipu lakne tamnang, hüpoi wong me janpuwe mongshih ünyei ngaine tamnang.

²Kentamongting palan yee-e ngaowa yahhukei-e linge tam nang, hüpoi ükhulan-e yepah yewai ngai tamnang.

³Youngwanpa mük-e üken phe me hanghe ngai nge nang; ümei hei ümeng lingpute, Iye yomlei ngohnang.

⁴Innyaipu yee-a üyin pee, hüpoi mengshipu yee-e yaha te ümeng shatam nang.

⁵Ngawoopawe yoipawe tingtampute nunang. Hüpoi aoheye teetampute ngao jai I kentamongtingpa.

⁶Khakshupu kahtalan nok me moth üngang ngohnang; hüpoi ümeng kahtalan-e küo tüowe peipu me shangshih ngohnang.

⁷Kentamongtingpu jupen-e shingmanpu pongtamnang, ngawoopa kenmong me tüo yenang.

⁸Kahta ümeilan-e yoppute Youngwanpa mong hahnang, hüpoi ümeng kahtalan-e yah peipu toidopute nunang.

⁹Ünu kahtalan lamte Youngwanpawe nunang, hüpoi aoyinne khakshupu ling imante Iye kennang.

¹⁰Hanghe yeshu tüopa nange lingma-a, nangte menge shaoshi tamlak; nange nang nying nyingke tinge yetamma-a nanga lilak.

¹¹Yimshon hüyange Abaddon nehoi tüome hanghe ngoh Youngwanpa sheshao me lowe angpu ye-ok; hüma-a hangke kahta jawe I juteih Kahwang mepu lowe oklak?

¹²Yoi hei ütahpa she teihpu kahtalan-e imante tingne yetamhu; aoyin kentamongting nang tüolan mepu hengpu iman-e aope-o yeleng.

¹³Aope kahtalan mongmei lakei, iman nyinang, hüpoi aope iman mong menglakei, iman sheta nyaknang.

¹⁴Deitahpu kahtalan-e shinge yahhu nang, hüpoi ükhulan-e iman shumupute monghah-e ngoh nang.

¹⁵Toinanpa üyin-a yelakpe shange pongpu phei pongnang, hüpoi mongmei pheipu kahtalan-a hipak phe me mongmeiye ngoh nang.

¹⁶Hakpa ne mengyange shange ngohleima, toiha ne mengyange Youngwanpate nyammelepu shemei.

¹⁷Ümeken me müktakpu ngoh tüoken me shemeipupa mei phei hahleima, ümeken me kenpu ngoh tüoken me hoilai phei hahpu shemei.

¹⁸Oloh-e mongshih ngaipuwe ngaomoppu hei ngai nang, hüpoi nünne okpuwe teelapu ümok hümtamnang.

¹⁹Jookpa tailam ma-a huhphei tienyange, hüpoi ütingpalan lamnyu-a lailepu tongkeng lam.

²⁰Kentamongtingpu hawe yoipa mongmei ne tamnang, hüpoi ngawoopawe yoinyute nunang.

²¹Kahta ükhulan-a iman ngawoo yahpute mongmei nang, hüpoi kentamongting palan-e hanghe shupu ngohnang hatüo lingnang.

²²Okpu shinne henge tampu yahtüoh, hüyange nange okpu ngelak; hüpoi tüo yenangma-a nanga okpu ye-ngelak.

²³Khakshupu hipak jingne khakshupu ngao tüopu hatüowa hangshin mongmei lak!

²⁴Kentamongtingpu kahtalan-a ütangye üyin lamnyute woipu yete kemnang, üphangye yimshon lamte woipute yeje.

²⁵Otapu kahtalan nok-a Youngwanpawe menge tamlak, hüpoi wamnyulan toinan-a Iye tükke anglak.

²⁶Ünu juteihlante Youngwanpawe nunang, hüpoi I-a chingmei ngaote monghah nang.

²⁷Hahnyakpu kahtawe yoi noksa me shangshih yah peinang, hüpoi aoyinne yakjaite nu üyin ngohlak.

²⁸Kahta ümeilan-e iman-e janshao me teih leinang. Hüpoi ümeng kahtalan-e mamme jannang hüpoi tüokaiye mop ngai nang.

²⁹Ümenglan mepu Youngwanpa-a yeonge jai-e; hüpoi khakshupulan-e yoppu Iye jainang.

³⁰Mongmei shetawe nang mongmei tam nang, hüyange ngaolan ümeiye nang te shemei she linge tam nang.

³¹Aope nangte tinge tamlakei hüwante nange mongphawe jaima-a, nanga kentamongtingpa.

³²Nange shinge yahlak jingne yemongma-a nange nang nying nyingke mayah nang. Hüpoi tinge tampu nange yahma-a, nanga kentamongtingpa ne menglak.

³³Youngwanpate nyamlepuwa konjong tüopu ne mengnang. Nange yihnoonpu tüoshao me nang inne nyailak yang.