Read Konyak Naga DETNGAO 16 Bible Online

DETNGAO 16 - Konyak Naga bible

DETNGAO 16

¹Kenmongme juteih tümlak-a kahta, hüpoi yi-e janpu tüolaka Youngwanpa mepu.

²Kahtawe lingpu khongküm shunang she Iye teihne ok, hüpoi nyoi ngoh wanglam-a Youngwanpawe tokke leinang.

³Nange tümpu taitamlan Youngwanpate tüohtüoh, hüyange tüolan linge taiwante okpu ngelak.

⁴Youngwanpawe lingpu lamphe li me wongpong ngohnang, hüyange ümenglan nehoi shangshih nyih jingne ling.

⁵Aoyin jamloi nang khongkümpute Youngwanpawe nunang; Iye imante ütuh yephape yetüohlak.

⁶Monghümlakpa ne hüyange ütinglak tüoh, hüyange Kahwange nang ünu winphalak. Youngwanpa ngao jaitüoh hüyange nangte hang ümengo yengai lak.

⁷Aope kahtalan-e Youngwanpa mongmei ne tamlakei, Iye wepalan nehoi shümpa ne lingtampu oklak.

⁸Yeshupe linge küw üngang tüopu phei-a, khakshuwe linge üjingha nangpu shemei.

⁹Kahta mongjange taitam tümne ok, hüpoi Youngwanpawe I ya-kai lan woinang.

¹⁰Ahngpa jupen-e üjaopawe henge tampu me ngaonang; I juwe ngaophün phapu me ünu ye-om.

¹¹Tokke heipu hüyange itte shempu khakshuwe hüyange yüowe leihpu meiye lingpu Youngwanpawe yah hunang.

¹²Ahngpawe ümengpa linglaka nulakpa, hangjingne ima-a ahngpa shotjinga khakshupuwe linge ngai.

¹³Ngaoting ngaopu ahngpa jawe jaihu nang, hüyange aoyinne tüopa ngao tüolan te monghah nang.

¹⁴Kentamongtingpu kahta jawe ahngpa mongmei me anglak jingne nganglak; ahngpa mongshih ngaima-a, ütam ja li ne ok.

¹⁵Ahngpawe monghahpuwa, lümlei hipak me wangphom me wai yah peipukih ngoh nang, tüo me üyin ngoh nang.

¹⁶Konjong tüolaka hon phei nehoi hangke meipu! Eihyang khüm phei-a üpongtüowe okpupa lelak.

¹⁷Aoyin meinang iman-a ünu yeneckpu lam me kemnang; tüokhei ümeken me nang tainang leitüoh, tüowe nang üyin yinlak.

¹⁸Otapuwe ümengpate woinang, hüyange jamloipu yahawe yeitampu ngainang.

¹⁹Jamloipu yo me ja ne omyange hüyange nyieyahpu iman meitam tüoleima, innenyaiye hüyange toiha ne menge ngohpupa shemei.

²⁰Nangte hanghe nyüo tüote mong phatüoh, hüyange nang okpu ngelak; Youngwanpate ütinglak tüoh hüyange nang mongmei lak.

²¹Kentamongtingpu mongjang nyimpu kahta-a üpong tüowe okpu jingne shingnang. I ngao hangshin mei, teshinne Ime naiyahpu ngoh nang.

²²Konjonga kentamongtingpa jingne üyin yengpeiwo, hüpoi ükhulante shinge manne tamlak jingne ngangpuwa hipak hei winpu.

²³Deitahpu kahtalan-e iman-e ngaoshao me teih leinang; iman-e jupen-e hanghe i yohkahpu phei shenyei.

²⁴Yayeng ngaolan-a zahtai nok kih-e jüppe nyüopute meiye hüyange nang üyin püm tangta jingne mei nang.

²⁵Kahta-e tingnangpu kih-e teihpu tailam ja ngoh nang, hüpoi tüopa tepu üküm ne hatüowa lipu te woinang.

²⁶Toilingpa ja hahying meipuwe Ite toi ngange lingne muh tamnang, hangjingne Ite hahying meipu jingne yelakpe yunang.

²⁷Kahta ümenglan-e eihate yemeilak lam leinang, iman ngaowe nehoi ümeng ngai tamnang.

²⁸Ngaopapa ngaowa kahta ümenglan-e yannang; iman-e mopngai tam nang hüyange shümpa yanne tamnang.

²⁹Yakphei lükpu kahtalan-e iman shümpa lowe tamnang, hüyange mahlakpa te iman woinang.

³⁰Yemeipe nyipu hüyange müktok pheakke leipu kahtalan jingne yomyah; iman-e jupen me ümeng linglak ütam teih tepu.

³¹Khakshuwe ngohpupa jing hünghaowa jinlaopu! Shang shaoteiye ngohpuwa müktishiwapu shaoshaoh.

³²Wong nange yongpa ne mengleima nünne okpu shemei. Chingnyu ja nopu phei-a nang üyin tangme wanglam lamne naowe okpu shemei.

³³Phongyengpu-a yungkeng tangme tüoh, hüpoi ngaophün phalak-a Youngwanpa shaha.