Read Konyak Naga DETNGAO 17 Bible Online

DETNGAO 17 - Konyak Naga bible

DETNGAO 17

¹Teelapuwe maapu nok ja me mongmei mo ngohleima, toloimei kenmong phei eawahpu hahying hahpu shemei.

²Ühak yekohpu ha tangme yakleih me konnange jonpu shaoshanpawe I tangme wanglam lamlak, hüyange mothlei meitam tüolak.

³Hon hei khüm-a vün kaiye tokke leinang, hüyange kahta ja mongjanga Youngwanpawe tokke leinang.

⁴Ümeng kahtalan-e ümengpa juteih yahhunang, hüyange tahleih ipalan-e tahleih ngaote jai nang.

⁵Aoyinne toihalante nyiye tamnang, iman linge ngaipa Kahwangte yaole nang. Aoyinne yatuhshaomengpu tangme mongmei-e hüolakeih shangne yetampe yetüohlak.

⁶Huyimlan-a wupalan jingne ahngpa shaoshaoh, hüyange hayimlan müktishiwa-a iman nyupalan.

⁷Wangshüm pheipu kahta üyonglan-e ngaoleih ye i, hüyange üngapalan-e ümeipa ilak hango yenang.

⁸Kahta ütam-e yakjai toishaowa yepahipa toishao kih-e teih nang; hatüowe shemin lamphe lingpu oklak she iman-e ütinglak nang.

⁹Nange kahtalan-e nangte kenne tamhuma-a, aope iman-e nangte ümeng linglakei, ümeng wintam tüoh. Yeshupe lingpuwe shümpa yantam nang she teih tüoh.

¹⁰Üngapate ghoja me shüt tüoh me shinge yahpu phei-a deitahpu kahta jate ja me teetampu me shinge yahpu shenyeipu.

¹¹Kahta ümenglan aoyinne hipak phe me mop ngaiye tamnang tüolan tangte mengshipu ngaolan kipa pei tamlak.

¹²Üngapa toishao me nan yenangpe ngohpu ükhupa phei hüolei ma, yoi üha nyieyah tepu shapnyu ünyu phei hüopu shemei.

¹³Ümeipa jingne ümengpa phawe yema-a, nange nenok mepu ümengpa phei aope-o nang yanne yengoh oklak.

¹⁴Ngao teila ne wangpuwa yengtük üwangne phüppe wangpu kih ngoh nang; ülute hatüo mantaipe laktüoh.

¹⁵Hango üshingpupa yeitampu hei ümengpa yeinetampu moi ni Youngwanpa sheshao me nulak pa.

¹⁶Üngapawe shinge manlak jingne ngin winpu me ümei hango yenang, hangjingne I me shinge yahpu juteih yenang.

¹⁷Shümpalan-e hipak phe me iman teikenpu hüo nang. Shange pongpu te teiyeleilak jeihei naolan hangkih pu?

¹⁸Juteih yenangpu kahta jawe hei ütamja pheei-sea jingne metpa ne menglak jan nang.

¹⁹Ünute lenge teihpuwa mop ngaitamlak te kenpu. Hipak phe me nange nenok moth hüopu ne mengma-a, nange moplakte nyikpu ne mengnang.

²⁰Aoyinne ümengpa teih hüyange ngaonang, iman-e ümeipa tüolak monghümlak yenang, aohepa yee lolam mahshupu shaha tüolak.

²¹Ao ühawe ngawoopu toi ling tüopa payong jingne mongshang hei mongmeng tokte kaiye hango yenang.

²²Mongmeiye ngohpuwe nang püm tangta meiye angnang; hipak phe me mongshange ngohpuwe monglaowe li ne tamnang.

²³Lowelampu kahphünpawe lowe phapu yakjai yah nang; hüyange ngaotingpa linge yetam.

²⁴Deitahpu kahtawe kentamongtingpu toishao te leinang, hüpoi üngapa mük-a kahtok üküm ngoi-e ngohnang.

²⁵Ngawoopu hawe yoipa te mong shang mongmeng hüyange yoinyute khah-e mongte takke teihpu peitam nang.

²⁶Hango yeshingpu kahtate tang yulaka yeshu, aope kahta ümeilan te shangne tamlakei, ütingpa-a pienne jonnang.

²⁷Kahta ütam yoi jeng mei meiye shingpulan-e hipak phe me ngaowe yengoh. Jünge ngohpu kahtalan me ütingpa juteih ngoh nang.

²⁸Tüophei ma-a, üngapa ja-o I jünge hüyange yoi jupong ye eppe ngohma-a, kentamongtingpu hüyange deitahpu kahta she teihlak.