Read Konyak Naga DETNGAO 18 Bible Online

DETNGAO 18 - Konyak Naga bible

DETNGAO 18

¹Aoyin kahta eiha phei yepang ok iman-e yoi shaha jingne teih nang; kahta liliye shunang she teihpute iman-e mong menge teih nang.

²Üngapawe üpong tüohuwe teihpu hango yenang; hüpoi Iye linghupu khongkümpu ne-a I hangshin deitah tüopa hüo hunang.

³Aope ünu peilakeih, wüotüopu-o jamme woinang. Hüyange wangshüm mah-e wüotüopu nge nang.

⁴Kahta ja ngaowa konjong üjüng ne yengching shinne luwe, yengpeiwo me ngaipu yeng shin jaowe ngoh ne ok.

⁵Püohpupa yinne tamyange hüyange hango yeshingpu kahtapahi ütingne ye-i-tampuwa yeshu.

⁶Aope üngapalan ngao la ne wanglakei, Iye hanti yupu ne meng nang.

⁷Üngapawe ngaopuwe, Iye yoi nying nyingke püohpin nang; I yoi ngao tünme I muh pho nang.

⁸Ngaopapa ngaowa jamloi meinang, hatüo lünge tailak te teman-e hangshin ken!

⁹Jookpu kahta ja-a ümeng juteih pheipu kahta ütam shinne meng nang.

¹⁰Youngwanpa min-a wongnangpu yomtep. Khakshupalan-a tüopate phet ongnang hüyange yin-e ngohnang.

¹¹Tüoyangpoi hakpa lan-e iman moth kaiye wongnangpu hüyange daopu chingnyu jantpenyu kih-e iman yinne angnang she teih nang.

¹²I innenyaipu yenangma-a aowe-o yihnoonpu yenang; jamloipu kahtalan-a menge tailak lam yekao me ngoh nang.

¹³Janshao me jai yahtüoh. Hüke yelingma-a nanga ükhupa ne hüyange teetampu hüolak.

¹⁴Aope daklakei nang yinpu oklak she monghüm-e teihpuwe tükke ngohpu oklak, hüpoi nang monghümpu mahyah küma-a, nang monghümpu mahkülak.

¹⁵Jelo pheipu kenmonge juteih konjong tüonang; hüyange deitahpu na-e juteihkonjong yamnang.

¹⁶Hünghao yakjai-e taküp eptam nang, hüyange üyih-üyonglan tangte woi peinang.

¹⁷I phei laa-e yongpawe ngaowe ükong manwang manwang hipak phe me gho me üwangne ngao ine yongpa tingpu kih jai nang.

¹⁸Ja kih kihpu wong nangpu kahta ni hüopu ne mengma-a, lai toonne leipu kaiye moppuwa sholak.

¹⁹Nang jeihei naote jamtüoh hüyange Iye wongnangpu chingnyu jantpenyu kih-e nangte yinpha lak, hüyange nang Iphei teelama-a, Iye nangte taküp küp phalak.

²⁰Kahta seanyu-a yoi ju ülick-e maalak; I jupen nahlangpuwe I ümok-hümlak.

²¹Yee me lilak hei yanglak üngan wong ngoh nang, hüyange aoyinne tüopa te ken tüopa ülick hahlak.

²²Aoheye shekonyu yam tüopu ok, Iye toimei ja tüonang; tüokaiye Youngwanpawe nangte meinang she hüonang.

²³Toiha kahtawe deitahpu phei yoppe tongnang, hüpoi hakpawe shushupu kih jan nang.

²⁴Shümpa tampu ütam-a hipak yelao, hüpoi shümpa ütam-a jeiheinaolan phei nehoi shemongpu.