Read Konyak Naga DETNGAO 2 Bible Online

DETNGAO 2 - Konyak Naga bible

DETNGAO 2

¹Üha, nange ü-ngao jai yahma-a, hüyange ü-ngaokenglan nange toinyu ne menge nang me angma-a,

²nang na shongyange konjongte mongpha ma-a, hüyange tüopate üpongtüowe yahlak jingne nang mongjang hoonglima-a,

³hüyange ümongpa shingyahlak jingne nange nyik ma-a, hüyange shing yahlak jingne nange üngwün ma-a;

⁴Khüm yampu kih-e nange tüopa yam ma-a; hüyange lowe angpu toinyu jingne yampukih yamma-a,

⁵hüma-a nange Youngwanpate nyamlelak shinglak hüyange Kahwang shing okpu tüolak.

⁶Hangjingne Youngwanpawe konjong pha nang, hüyange I ju mepu shingmanpu hei shing okpu peinang.

⁷Iye khakwangpalan jingne konjong ümei tük-angnang; tah yetüope kempalan jingne I-a ree;

⁸hangjingne Iye ütingpalan lamnyu yomnang hüyange Ijing ütingpalan lamnyu yinne angnang.

⁹Hüma-a hanghe üting hüyange shunang hüyange meipu hei meipu yalam lili nange shinge peilak.

¹⁰Hangjingne nang mongjang te konjong onglak, hüyange shingemanpuwe nang üyin yahate nyimmeipu peilak.

¹¹Yihnoonpuwe nangte jongwanlak, hüyange shingeyahpuwe nangte yomlak.

¹²Konjonge püoh-e linglak mepu nang tüklak. Aoyinne mopngaiye leihkheih-e tamnang tüolan kahta mepu nang yanne anglak,

¹³aoyinne wangnyak lamnyu me ngohlak jingne üjaopa üyin lam winne tüoh;

¹⁴aoyinne ümeng linglakte mongmei hüyange aoyinne ühak yenangpu ünute mongmei,

¹⁵aoyin yalamlan komküyak, hüyange aoyin iman lamnyu me konpak-e kem tüolan mepu yinlak.

¹⁶Nange iymei pheipu sheko aowe yoi ngao meipume nang yoh ne ngangnang tüopa mepu yinpu oklak.

¹⁷Aowe yoi naoyawantepu netanpa tüoh hüyange Kahwang sheshao me yhawe jiengyangpu pemei;

¹⁸Hangjingne yha nokte taima-a, nang lilak yimlamte kemnang. Tüote taipuwa yimchingte yalokpu ne mengnang.

¹⁹Aoyin yha tangte tai leih üye. I aope-o üyin lamnyute leih üye.

²⁰Tüokhei nanga kahta ümeilan nyoingoh wanglam pheite woilak yang hüyange khakshupu üyin me ngohlak yang.

²¹Hangjingne khakwangpu kahtalan kahmük me nyoipu oklak; hüyange tahyetüopalan tüopa me nyoi ngohlak.

²²Hüpoi ümeng kahtalan kahmük mepu langwinlak hüyange tüopa mepu ünulan-a kahtok mepu üphao yahpu kih-e bhei winlak.