Read Konyak Naga DETNGAO 20 Bible Online

DETNGAO 20 - Konyak Naga bible

DETNGAO 20

¹Wuwüngti-a wenkapa, wongnange yingpa-a shihkhahpa; hüyange tüopawe aoyin ünyong yete woi deitahpa ne yeje.

²Ahngpa mongshih ngaipu-a yengkong mailang waopu kih-e ngohnang. Aowe I mongshih ngaine tamlakeih, Iye yoi üyin me ünu omnang.

³Teelapu mepu yan-e ngoh okpuwa kahta ja jingne wangshüm üyong ngohnang. Hüpoi üngapa lili-a teelalak jingne mamnang.

⁴Kah hampa ja aowe hipak khakshuwe yoi kah hamlak jingne jamloi jooklakei, Iye yahlak tah hango yenanglak.

⁵Kahta ja juteih-a yengnung ülu mepu yeng le nang, hüpoi ümongpa juteih shelu she ngohpalan-e hatüo shaowe yahpu ok.

⁶Moilan-e I hangshin okkeshang hüyange ütingpa me ngoh I jeng ngaonang, hüpoi ütingpa me ngohpu kahta aowe tüolak?

⁷Khakshupu kahtawe tahtüopu yenangpu üyin ja ne woinang. Iphei te woipu hayimlan moimanpupa.

⁸Aope Ahngpa jawe ngaophünlak jingne yoi ahngpa shotjing me shotlakeih, yoi mük-e ümeng lili itshemleipu oknang.

⁹Ü-juteih mongjang khakshuwe ngoh nang, tüokhei üme ünu yenang she kahta aowe ipu oklak?

¹⁰Aoyin kahtawe toklak hüyange sheamlak khakshuwe yejon tüolante Youngwanpawe nunang.

¹¹Naha ja-e nehoi Iye hanghe ling, I nyoingoh-a jaoya hüyange shupu jeya, Iye shingnang.

¹²Ngelak jingne mük hüyange jailak jingne na Youngwanpawe moini lingengai.

¹³Shilak te tahken, nang toiha ne meng phalak. Nan yengaipe ngohtüoh hüyange hahlak üngang tüolak.

¹⁴“Hatüowa yemei, hatüowa yemei!” she shakpupawe inang; tüoyangpoi I yan-e taiyang phei me shak ok yahpute I ota nang.

¹⁵Hon hei pheeiwanpu toinyu long üngang ngohnang; hüpoi shinge okke ngaopu jupen-a toinyu long phei shenyei.

¹⁶Kahta ühüng ja jingne ngaoting janpu nyemo yahtüoh; hüyange kahta ühüng ngaoting janpu-a teijanpu me ongtam tüoh.

¹⁷Lüplowe yahpeipu hahyinge kahta te meinang. Hüpoi shonne yengohpe hatüowe ju me pheih ne ponglak.

¹⁸Hengpu yahyange ülam-a tümtüoh; deitahpu jongit-lamshempa woipu phei nange wehok tüoh.

¹⁹Ngaopapa ngaopulan-e aope-o ngaolowe angpu ye-ok; jamloi langman-e ngaopalan mepu yanne ngoh yah.

²⁰Nange nangnyu nangpa te phoiwüm ma-a, wangnyak me mei-e mahpu vüntük kih-e nang üyin üküm ngoilak.

²¹Nange nang moth hangshin owe tüoyapeih, teshinne nange ümeipa-o pawang she lingnang.

²²Nang nying nyingke ümeng linge yelak she tah i. Youngwanpate tantüoh Iye tüopa-a tinge tamlak.

²³Toklak hüyange sheampu yeshupe jonpute Youngwanpawe nunang.

²⁴Kahta ja kemyongpu-a Youngwanpa mepu; hüma-a hangke kahta jawe yoi lamnyu shing oklak?

²⁵“Hatüowa üjaopa ngohnang,” she mamtam-e ngaolak, hüyange jiengjep yang phei me ngao ngailak-a kahta jingne tün ja.

²⁶Kentamongtingpu ahngpawe ünulan-a tepwin nang; hüyange tahnoipu tongtoi-a iman tang me toiloi ne tam nang.

²⁷Kahta yaha-a Youngwanpa vüntük, tüowe ümong lilite pom-e yamnang.

²⁸Ahngpa ja I wanglam lampu mongphawe, ütingpa me, hüyange khakshuwe ngohma-a I wongnange ngohpu oklak.

²⁹Naoshewan wongte teman-e monghah-e leinang, hüyange shangshaopu wupate wangshüm hüo nang.

³⁰Shütpu makowe ümengpa-a jaotam nang; hüyange heappuwe ümongpa te ngoi-e jaotam nang.