Read Konyak Naga DETNGAO 21 Bible Online

DETNGAO 21 - Konyak Naga bible

DETNGAO 21

¹Youngwanpawe ahngpa ja kenmonga Iye yengpeiwo yünne ngaitampu kih-e oloh-e woinang.

²Nange lingpu shemin lamphe-a shunang she nange teihne ok, hüpoi teih tüoyah Youngwanpawe nang nyoingoh wanglamte toknang.

³Khakshupupa hüyange ütingpa lingtüoh, hatüowe Ite dopu yah peipu phei shenyei she Youngwanpa monghah tam nang.

⁴Loipoipu mük, hüyange otapu mongjang, ümenglan jing vüntük-a ünu ngohnang.

⁵Kenting shakke tümtapuwe wangman-e tüolak; nange jamloi mamme moktak ma-a, nang me aope-o wangpu shinne yengoh oklak.

⁶Tahleih yee-e tüopu moth-a leihkheih-e neikonpu üshem; aoyinne tüolan yamnang iman-e lipupa yamnang.

⁷Ümenglan-a iman yoi yak phei lükpu kaiye mah nang; hanghepa üting tüopa linglak jingne iman-e yemong.

⁸Püohpinpu kahtalan lamkon lampakte kemnang; hüpoi noknga kahtalan-e hanghe pa üting tüopa lingnang.

⁹Shihkhahpu sheko phei nok ja me jamme ngohleima noktok ünuk ja me nyoipupa shemeilak.

¹⁰Ünulan üyin-e ümengpate lahnyiknang; iman yupilan-e iman mükshao me shüpshe ye-nge.

¹¹Aope naoyimpalante shaoshi phalakeih, lanta-akpulan-e konjong tüonang; aope deitahpu kahta jate nyüolei tamlakeih, Iye shinge okpu tüonang.

¹²Khakshuwe ngohpupawe ümenglan noksa me hanghe ngai nang shingnang; hüyange ümengpa te Iye mahpu yah peinang.

¹³Nange toihalan-e üngwünpute yejai hupe tüohküma-a, jamlak yamme nange üngwünpute-o yejai phalak.

¹⁴Kahta ütam-e nangte mongshih ngaipu ne mengma-a, lowe hünghao ja phapu kaiye I mongshih ngaipu wünglak.

¹⁵Aope ütingpa me ngaophün lakei, khakshupulan-a mongmei nang, hüpoi ümeng kahtalan-a moplak ne yah peinang.

¹⁶Ümeipa juteih mepu aoyin yanne taiye waanang, tüolan kahta jünge lipupawe tannang.

¹⁷Aowe jajang japu mongmeite kenlakeih, tüopa kahta-a toiha ne menglak. Aoyinne wuwüngti hüyange minnga te kennang iman hakpa ne yemenglak.

¹⁸Ümeng kahtalan-e iman nying nyingke shaoshi yah pei nang iman-e kahta ümeilan te-o ngaine tamhu nang.

¹⁹Teelapu hüyange mop ngaipu shekonyu phei ngohleima-a, pheih kahtok me nyoipu shemei.

²⁰Kentamongtingpu kahtalan nok me toinyu nanha tangme nyoi nang, hüpoi kahta ükhu lan-e iman ngin winne küm nang.

²¹Aowe khakshupu hüyange kenpu pheite woinang, üyin, jalunpu hüyange yihnoonpu tüonang.

²²Kentamongtingpu kahtawe wongnangpu chingnyute itte shemme leipu oknang, hüyange hanghepa me iman mong nyengpu jantpenyu ngohnang tüopa menge winnang.

²³Aoyinne yoi ju hüyange yee tükke ok, shangpongpu mepu yoi üyin tük ok nang.

²⁴Otapu hüyange loipoipu kahta, I min-a “Nanghahpu”. Iye otapu loipoipu phei lingnang.

²⁵Jookpa-a Iye yah-hupuwe I toitam nang. Hangjingne I yakke toi yemokh.

²⁶Nyihlao hipak yahhuwe waopuwe pongnang; hüpoi khakshupulan-e phahunang, hüyange tükke ye-ang.

²⁷Ünulan-e dopu-a nulakpa; ünyei ne iman-e ünu mongjang phei yah peiwante hangshin nulak!

²⁸Ngaoleih ipa saki-a mahlak, hüpoi kahta ütam ngao aowe tüopa jeng teih leinang tüopa-a yah oknang.

²⁹Khakshupu kahtalan-e iman ütingpa-a shing nang; ümenglan-e pa-a iman-e okpu shinne tiennang.

³⁰Youngwanpa phei tüi-e ngohpu ne mengma-a kahtanyuha konhei ngao, jelo okkeshangpu, nyüoleipulan-e hango yejamlak.

³¹Shapju jingne koiponglan tümyange ngohne ok, hüpoi okpu phapupa-a Youngwanpa ngoh nang.