Read Konyak Naga DETNGAO 22 Bible Online

DETNGAO 22 - Konyak Naga bible

DETNGAO 22

¹Moth üyong phei-a min mei pahi lelakpa; hon hei khüm phei-a monghahpu shemeipupa.

²Hakpa hüyange toiha moiniye tüopa-a jakih muh ngoh nang; Youngwanpa iman khongküm linge ngaipa.

³Juteih pheipu kahtawe wengtuh peipu nge oknang hüyange tüopa mepu yanne oknang, hüpoi teih yenyüopu kahta tüopate tingkhakke kemme peinang hüyange shaoshi nang.

⁴Youngwanpate nyamle yah, innenyai yah, hüyange nange hakke oklak, yihnoonpu, hüyange jinlaopu tüolak.

⁵Nushakpalan lamnyu me huh hei tün ngohnang; aoyinne yoi üyin tük-e ok, tüolan mepu yeonge jai-e ngohlak.

⁶Naha jate I hangke ngohlak nyüotam tüoh, hüyange aope I lwngmei ne menglakeih Iye tüopa teih tüolak.

⁷Hakpawe toihalan tangme wanglam lamnang; ngin sea yahpa-a nginseaye tampupa rha.

⁸Aowe ngaoting ye-ipu deilakeih wengtuh peilak; hüyange I mengshipu shengshaoh-a jajang japu ne menglak.

⁹Phahupu kenmong ngohpalan moimanlak; hangjingne Iye yoi hahying toihalan phei tamhan nang.

¹⁰Yoi shaha ne she teihpu kahta yanne tamtüoh, hüyange tüophei me nakshih moppu, teelapu, yejema-a, min toonne teinyikpu laklak.

¹¹Aowe jaoshepu mongjang phei hüyange shüpshe phei ngaopute kennang, ahngpa shümpa ne menglak.

¹²Shinge okpu juteih ngohpu tangme Youngwanpa mük-e yomleinang; hüpoi lolampalan ngao Iye wintüohnang.

¹³Jookpawe inang, nokshao me yengkong mailang ngohnang! Chingyang me tao toiphalak!

¹⁴Phwngngamnyu lan ju-a tünkam ja hatüo me aoyinte Youngwanpawe mongshih ngainang iman pho nang.

¹⁵Nahalan wanglam me hüke ngayounpu, kenyetingpu toi ling nang; hüpoi meiye shom aipu kaiye iman nyoingoh wanglam hangke ngohlak nyüowe tamnang.

¹⁶Nange hakpalante hünghao pha, yejema-a haklak jingne toihalante shangne tamma-a, nange nang nying nyingke toiha ne menge yelak.

¹⁷Kentamongtingpawe iye angpu jaiyah, hüyange mong phayah; taowe hanghe nyüolei nang mongjange yahtüoh.

¹⁸hangjingne nange tüolan teih okma-a hüyange nang jupen me iye okma-a nang mongmeilak.

¹⁹Taowe nanga Youngwanpate ütinglakpu angne tamhu nang; tüokhei taowe tüolan-a nangte sha-a ngaowe tam pha ning;

²⁰Taowe nangjingne nyüowe tampu delüm ngoiye nyanne tüohteki. Tüolan me manlam hüyange hengpu ümei ngoh nang.

²¹Hüyange ütingpa-a hanghe shi nangte nyüopha lak. Tüophei me aope tüopa yamme tüolak jingne nang shonlakei, nange ütingpa janpu yahyelak.

²²Nange oklak ne ngohtepuwe she teihyange toihalante tahshüng tahnam; ngaophün jing me jamlak yenangpe yonge ngohpalante tahshüng tahnam.

²³Hangjingne Youngwanpawe iman nanleiye ngaolak hüyange aoyinne imante nyamshao tüolan üyinte Iye nyamshao lak.

²⁴Shihkhahpu hüyange yak phei lükke mongshihpu kahtalan phei shümpa tahtam,

²⁵tamyahma-a iman nyoingoh wanglam shinge yahne ok hüyange jeileipu ye-okpe nang palak.

²⁶Kahta ütam pheeisea jingne nange hepa ne menglak tah jan.

²⁷Nange yepha okma-a, iman-e nang shinleng nehoi yah tai phalak.

²⁸Pajeiyonglan-e linge angpu yikeng ülangte nange aope-o tah po.

²⁹Nange toishao mok-okpu kahta ja nge okpu ngohya? Iye Ahngpalan shaoshanlak; Iye bangnyuha shao yeshanlak.