Read Konyak Naga DETNGAO 23 Bible Online

DETNGAO 23 - Konyak Naga bible

DETNGAO 23

¹Aope nang kahta üyong phei hahlak jingne shotlakei, nang sheshao me hangheyin ngoh kentinge leiyah.

²Hüyange nange moh-hahyahma-a nang üngsa me nyit ja angtüoh.

³Iye nangte uhyingpu hahying jingne nange hahnyakke tah teih; Iye nang lowe tam ne ngangne ok.

⁴Hakpa ne mengne nganglak mepu nang nying nyingke yanne ngohlak jingne wangman-e kentamongtingyah.

⁵Nang moth-a mük met pongme üyango nyimyange ngohpu kih hüyange yingphang awlan puwe taipu kih taine oklak.

⁶Kheihpa phei khaome tah hah tahying, yejema-a Iye phapu hahying ümei jingne hahnyakke tahteih.

⁷Iye inang, “Kei, üne-o jüpaowe hahyah,” hüpoi Iye hüpake ipu ne yeje. Iye yoi mongjang me ülam ja teihpu angyange nang phei ngaonang.

⁸Nange hanghe hahying yangki nange faiye winlak, hüyange nange meimayangpu khongkümpuwa jajang japu ne menglak.

⁹Üngapa phei juteih ngao ine tah ngang; hangjingne Iye hatüo shunang ja she ye-i-külak.

¹⁰Yikeng ülangte aope-o tahpo yejema-a khahhalan jing kahtok tah yah;

¹¹hangjingne Youngwanpa-a iman jingne wongnange shaoyinpa, hüyange iman jing ngaowa Iye nang phei ngaokülak.

¹²Nangte konnyüopawe nyüopute mong phayah hüyange nange okpu shinne konheingao na-e jai yahtüoh.

¹³Naha ja te winneshailak jingne tahning nei. Nange Ite hantiye shetpuwe I minli ja.

¹⁴Nange hanti phei Ite shetpu kaiye I üyin mahlak mepu yinlak.

¹⁵Ü-ha, nang kentamongtingpu ne mengma-a, ümongjang-o yeonge mongmeilak.

¹⁶Aope nang ju me konjong pheipu ngao ngaowe jailakei, tao yeonge mongmeilak.

¹⁷Ünu kahtalan nange waowe tahteih; hüpoi hipak üshei me Youngwanpate nyammelepu yelakpe ngoh tüoh.

¹⁸Hüke ngohpu ne mengma-a, nang jingne ngoikülak hipak-a monghümlak ngoh nang.

¹⁹Jaiyah, üha, kentamongtingyah hüyange nang hangke nyoi yeonge juteih tüoh.

²⁰Kahta aoyinne jamloi wuwüngti yingnang yejema-a iman nying nyingke hahloi hahnang tüolan phei tahpang.

²¹Yu jokpalan hüyange jamloi hahyingpalan toiha ne menge shonlak. Nange lingpu khongkümpu ne hahyinge shima-a, nange mamshe inkhek ümeng inlak.

²²Nangpa ngao jaiyah; I yenangpe nanga yengailak. Aope nangnyu wunyu ne menglakei, yha te nange monghahpu hüotüoh.

²³Ngaotingpa, konjong, shingeyahpu, hüyange meiye teihpu tüolan shaktüoh, hüpoi nange tüolan yüowe tahwin.

²⁴Khakshupu kahta üpa-a mongmeilak saki ümei ngoh nang. Kentamongting ha jingne nang ota ne ok.

²⁵Nang jingne nangnyu hei nangpa maohe ne tamtüoh; hatüo mongmei nangnyute pha tüoh.

²⁶Üha, nang mongjang üte yahkei, hüyange ü-üyin-a nang jingne leppu ja ne yah tüoh.

²⁷Üshoyüonyulan hüyange yejao yeshapu shekolan-a tünkam ümeng.

²⁸Nang jingne iman-e kuhpalan kih-e tannang hüyange kahta üngang mong yehümlak ne linge tamnang.

²⁹Ao mongmeng? Ao mongshang? Ao teela? Aowe ngao ngaine tamnang? Tüopa jingne she yeshingpute ao me üko sha? Ao me mük taakke ngaiyange ngoh?

³⁰Aoyinne üne-o wuwüngti jingne yoonge teih, aoyinne wuwüngti phei nyeih toiloi tailak jingne ngang nang, üte hüopha.

³¹Wangman-e taakke ngoh yahpoi, wan me linglei yapoi, hüyange tüopa jünge hümme tayapoi, yuwe nangte tok ne tah tam.

³²Ünenap soihüng pheipu pujam-e jot yangpu kih nangte jint-ne pei phalak.

³³Nang mük woomahlak, hüyange nange meimei-e juteihpu ye-oklak meimei-e yengao oklak.

³⁴Nanga yengching yenglin tangme jhot yange lüngleipu kih ling phalak.

³⁵Nange ilak, “Tao mayah hah shepu;” “Üte shütyange ngoh ne-o ok, hüpoi taowe tüopa yeteih tüo. Tao hangne yelüolak shi? Taowe üne-o jam yinglak yamlak.”