Read Konyak Naga DETNGAO 24 Bible Online

DETNGAO 24 - Konyak Naga bible

DETNGAO 24

¹Ümeng kahtalan tahwau, hüyange iman phei shümpa ne mengne tah ngang;

²hangjingne iman-e hanghe teih khongkümpuwa mop ngaitamlak teihnang; iman-e ju eppu lep iye ütam ja-a mayah ne tamlak.

³Konjonge nok-a we-nang hüyange shinge okpu tangme tüopa-a lingnang.

⁴Ümeken me manlam ngoh, tüoken mepu nokmonglan-a toinyu nanha hei shemei yaomapu toilan-e linge wangyange ngohnang.

⁵Kentamongtingpu kahta ja-a wongnangpu kahta phei wong shenangpupa; hüyange manlam pheipu kahta-a wong pheipupa phei sheyong pupa.

⁶Tüophei ma-a, nang shapju me pongshao me yeonge kentinge ülam linglak yang; hüyange nange hangshin me hengpu yah, okpu ngelak.

⁷Üngapa jingne konjonga jamloi daonang; aope ngaonyu ngaolakei hüwante Iye janlak hango yengai.

⁸Aowe ümeng linglak tüm tüopa shange mopngai tampa minmeng tüolak.

⁹Üngapa kon linglak jingne juteih puwa ünu, hüyange yaoletampu-a kahtalan sheshao me nulakpa.

¹⁰Moppu ütuh ja me nang wong yenangma-a, üting me nanga wong yenangpa.

¹¹Kahta ütam shaaji ütingpa me ngao yephün tampe patoi she angnang yinne tamlak jingne tah ning nei.

¹²Hatüowa ao jing toishao-o yeje she numan-e ine ok, hüpoi Kahwange shing nang hüyange nang wanglamte Iye toknang. Iye nangte yomme leinang; Iye shingnang. Hüyange nange lingpu toishao phei phinne Iye moimanlak.

¹³Üha, zahtai jelo hahtüoh; hangjingne hatüowa meinang; zahnok mepu zahtai hahlak jingne wüngwük-e meinang;

¹⁴yaha jingne konjonga meinang she nange ütingme shinglak. Konjong tüoyah hüyange nang shaomeiye ngohlak.

¹⁵Ümeng kahta aowe khakshupu kahta nok kuh teilak jingne ülam tümnang tüo kih-e tahnang. Khakshupu kahta ngohjing tahmeng.

¹⁶Hangjingne khakshupu kahtalan nyit me yeinang yeipu lep iye I lüo muh lüonang; hüpoi ümenglan-a lipu wengtuh-e mahtam nang.

¹⁷Aope nang wepa mahshangpu ngelakei mong tahmei, hüyange aope I yashah hüopu ngelakei mongmeiye tah teih.

¹⁸Nange mongmeiye leipu ne mengma-a Youngwanpawe shinglak, hüyange Iye hatüo yeleng külak; hüyange Iye Ite shaoshi ne yetam ne ok.

¹⁹Ünu kahtalan-e nang mongshang ne tahtam; imante waowe tah teih.

²⁰Hangjingne ümeng kahta ja jingne hipak ümei yenang shaoyekao me shaomeipu hango yenang.

²¹Üha, Youngwanpate nyamyah, hüyange ahngpate wangshüm hüotüoh. Iman phei hokke wepu kahtalan phei tah jam;

²²hangjingne iman mepu mahshangpu mokhshe iman tangme peitam nang; hüyange aowe shingpu hangkihpu mahshanglak iman-e peitamlak?

²³Kentamongtingpu kahtalan-e üne-o tüolan iyangki; Ngaophünpa jawe sheta leiye ngaophünlaka yeshu.

²⁴Püohpu kahta te nang me ümeng yenang she Iye ngaowe tamma-a, Ite phoiwümlak hüyange moilan-e Ite nulak.

²⁵Hüpoi kahphünpa aoyinne püohpupate shangne tamlakei, hüke lingyapoi jaalunpu hüyange toishao ümei jingne mongmeipu ngohlak.

²⁶Khakshuwe janpu-a jupen te hüppukih ngohnang.

²⁷Nang toishao ü-at hüng lingtüoh, hüyange nang jingne kah me sheminlamphe tümtayah; tüophei me nenok we-lingtüoh.

²⁸Meimei-e yeshingpu te yupipa phei tüi-e saki tahpha, yejema-a I jingne ünyongyete woilak ju me tah i.

²⁹“Iye üte hanghe ling tüokih-e Ite-o taowe linglak! Tao Ite nehoi yak yulak!” she tah i.

³⁰Tao jookpa hüyange kahta ükhu jing kah hüyange wuwünglick kah kaiye linne tai.

³¹Tüolan me ühuh pheipu hüng hüyange phümha loongteiye ngoh. Tüolan neikonne ngohpu long pesha toita teiye ngoh.

³²Taowe tüopate lei, tüopa jeng meimeiye teih lei, hüyange tüopa mepu shinge yahpu ja ngoh yangki.

³³Üjingha nyailüm meiyah hüyange shiyah. Nang yak pak yah hüyange üten ja toloimei yah;

³⁴hüpoi aope nang shiye ngohlakei, yonglah pheipu kuhpalan kih-e toinanpuwe nangte shüm phalak.