Read Konyak Naga DETNGAO 25 Bible Online

DETNGAO 25 - Konyak Naga bible

DETNGAO 25

¹Hatüo me üne-o Solomon mepu detngao Judah Ahngpa Hezekia gho me ngohpu kahtawe nyanpu ngoh nang.

²Iye hanghe jüowe tam tüopa jingne teman-e Kahwang te yihnoon nang; hüpoi iman-e hanghepa khoih itamnang tüopa jingne teman-e ahnglante yihnoon nang.

³Ahngpa jawe hanghe teih nang nange aope-o yeshing; I juteihlan-a teman phei shenyei, wang daopu shinne yejema-a yengching lupu shinne ngoh nang.

⁴Khüm mepu nuwe shakpu lili wintüoh hüyange yaopawe toi-a shemei yaomawe linge ngailak.

⁵Ünu henge tampulan-a ahngpa mepu yanne angtüoh hüyange khakshupu me wanglam lampu jingne I ahngchinga shinge peilak.

⁶Aope nang ahngpa sheshao me yongyalakei, Ite kün ne tahlük hüyange üyih üyong ja leye tah hüo.

⁷Nang phei sheyongpu ütam ja te nang nyoijing phatüoh she ine tampu phei-a, kei shedaopupa shotjing yayah she nangte tongpu shemeilak.

⁸Nange ngepu ülam ja jingne gho te tailak tahmam. Phei mepu sakipawe nang yeshu ja she meimei-e saki phama-a, hüma-a nange hanghe linglak?

⁹Nang yupipa hüyange nang nipa me juteih yoi yoi ne ngohma-a, nangnipa me ngaowe shoyah hüyange ngaolo hango tah ngai.

¹⁰Hüke yeling yahma-a nange ngaolo jüowe ye-ang ok she moilan-e shinglak, hüyange wüopuwe nang yenyoi oklak.

¹¹Juteih khakshuwe ngaowe tampuwa khüm tangme hon ai inne tampukih ngoh nang.

¹²Jaihuwe mong phawe teihpu kahta jate üpong tüoyangpu kahta jawe deingao phapuwa shemeipupa hon phei lingpu hon shüptet yejema-a jupeng phei-o sheyongpu.

¹³Tah yah-e wanglüm wantepu yengwüng kih-e, monghüm-e shonne teipu ngaolan kipa-a I shonne teipa jingne mengnang. Iye yoi nokpu yaha toloimei tamnang.

¹⁴Kahta aoyinne toilam phalak jingne janyange aope-o iman-e yepha tüolan-a wai yah yepeipu wangphom hei wangyang kih-e ngoh nang.

¹⁵Nünne okke yohkahpu kaiye wong shenangpupa-o khüw oknang hüyange innyaipu yee kaiye wanglam lampa nehoi yoh oknang.

¹⁶Nange hahlak tokte nyeiye aope-o zahtai jelo tah hah; loi she hahpuwe nang fai ne ok.

¹⁷Nenok yupi tangte jamloi tahpei; Iye nangte eangne ok hüyange nangte nu ne ok.

¹⁸Tahleih ngaoling leipa-a ünah pheipu yanglow, peshüm, yejema-a jüpkülüppu lahhan phei shemengpu.

¹⁹Moppu ütuh hipak me mong yehümlak kahtate monghüm yahpuwa fa yenangpute shaine ngangpu yejema-a faitepu ya phei kempu kih ngoh nang.

²⁰Mongshang mongmenge ngohpu kahta ja te hem lokke tampuwa wangshüm wante I inkhek khokke tampu kih yejema-a mako te hümme fupu kih ngoh nang.

²¹Nang wepa seanyaowe ngohma-a, Ite uhying tamtüoh; I yenglema-a, Ite yinglak yeng phatüoh;

²²Hangjingne nange I shangtang me vün oun phei wüopuwa jakke winlak, hüyange Youngwanpawe nangte moimanlak.

²³Apyekao wangyange üting me wai yah peipu kih-e ngaopapa ngaopuwe mongshih yah peinang.

²⁴Teelapu shekonyu phei nok ja me ngohleima-a noktok ünuk ja me ngohpu shemei.

²⁵Kahmük üjai mepu ngaolan ümei jaipuwa yengle wante yeng wüng yingpu kih ngohnang.

²⁶Khakshupu kahta ja ümengpate phawe tampuwa wookke tampu yengpeiwo yejema-a soihüng hüngyangpu yengnung le nang.

²⁷Zahtai jelo jamloi hahpu yemei, hüyange tüokih-e jamloi minyong minpha kei she teihpuwa ngoh nang.

²⁸Nange nang mongshih ngaipu yetük okma-a, chingnyu ja jantpenyu yenangpe hah oklak ne epyange ngohpukih nanga yinlak lam yenang.