Read Konyak Naga DETNGAO 26 Bible Online

DETNGAO 26 - Konyak Naga bible

DETNGAO 26

¹Jüo mepu yi yejema-a tahyah wante keipu wai kih-e üngapalante minyong phapuwa ngoh nang.

²Aohow yangsaapu kih-e, longlieng pak-o lingleipu kih-e, hangne-o üjepute phoiwümpu-a yengai ja.

³Nange koipong ja-a shütwu phei, gado ja-a sheamwu phei woinang, hüyange üngapa tok shanlak jingne-a hanti.

⁴Üngapa wanglam kih-e nange-o ngangao tah jan, hüke jan yahma-a nango nang nying nyingke I kih ngohlak.

⁵Üngapa ngao tongma-a üngapa ngao kih jantam tüoh, hüyange aowe tüopa nangte tongyangki Iye I teihpu shinne deitah-e yetong yangpu yang she teih peilak.

⁶Üngapate ngaolan shonne teiyangpu ne mengma-a, nange nang ya-o lange winyange ngoh ne ok; nange shanghah shaoshi nyikpu ne mengnang.

⁷Üngapawe detngao jonpuwa, yafaipawe I ya wongpong yenangpe jhot yange ngohpu kih ngoh nang.

⁸Kahta ükhute minyong phayahpu-a nyeilah me long jhot yah pukih ngohnang.

⁹Üngapawe nangte detngao ngaowe tampuwa yu jokpawe I yak mepu huh winne ngangpu kih ngoh nang.

¹⁰Aohipawe üngapa yejema-a yujokpa linne taipu nan shaklakei, meikeppawe moilante mayah tampukih ngoh nang.

¹¹Üngapawe nishe ngawoopu toi lingma-a kuihawe yoi faiyangpute nishe leih yepu kih ngoh nang.

¹²I me hango yenangpute kahta ütam-e I-a kentamongtingpa she teihpu phei-a, jamloi ngawoopu üngapa shemeipupa.

¹³Jookpa kahtawe inang, “Lamnyu me mailang ja ngoh nang! Lamko me mailang ja ngohnang!”

¹⁴Jookpa kahta I shinleng me hei lüppe shüpnang. Pongkhüp (Küpja) shayange taküp küppe eppe popu phei nyeiye I yeling lei ok.

¹⁵Jookpawe yoi yak hahsheng me pan nang; I jute yah inne nehoi I jamloi jook.

¹⁶Jookpa kahta jawe kahta she nyit aoyinne iman juteih ümei phanang tüolan phei ünyei I jelo deitah nang she teih nang.

¹⁷Nang toishao-ne üjepu eiha ngao moppute omyapuwa chingkeng lamnyute ngaiye kuiha ja na me shükyange nopu kih ngoh nang.

¹⁸Ngapa aowe ayeng, hei lahhan shüpne tamme li ne tampu kihwe,

¹⁹kahta aowe yoi yupipa lo ne tamyange “Taowe hei wonpu weih!” she ipuwa ngoh nang.

²⁰Han yenangma-a vün yepah; ngaopapa ngaopu yenangma-a, teelapu-a laknang.

²¹Vünhan-e vün pah angnang, hanne vün loonge angnang, hüyange mopshakke tampalan-e tokteipu ngaowa yelakpe angtam nang.

²²Ngaopapa ngaopuwa jüppe nyüolak jingne loishe mei! Hatüo lünge tailak jingne teman-e hangshin lengpu!

²³Nange hanghe ütingpa teih tüopa lowe angyange innyaipu yenangpe ngaopuwa kümptük me shinne manlingpu khüm phopu kih ngoh nang.

²⁴Jutok meipawe Iye yelengpe teihpuwa lüppe lowe ngaopu ngaopa me lo nang.

²⁵Ngaopulan-a meiye jai ne ok, hüpoi Ite üting tahlak, hangjingne I mongjanga nyit me aohüngpuwe maa ngoh nang.

²⁶Iye nuwe teihpuwa Iye yehüope angne ok, hüpoi Iye lingpu ünu toi-a moilan-e ngelak.

²⁷Aoyin kahtawe eiha jingne tün tünnang iman nying nyingke li nang. Kahta aoyinne waklempu kih-e ükong wang, li shon nang.

²⁸Ngaoleih yee-e Ite mayah-e tamhupu nanjingne nange kahta ütamte nunang. Ye-innyaipu ngaowe hango yepeitam, hüpoi menglak pa.