Read Konyak Naga DETNGAO 27 Bible Online

DETNGAO 27 - Konyak Naga bible

DETNGAO 27

¹Ngainyihpu jingne aope-o yongelüowe tah teih. Hangjingne phei me hanghe ngaikülak nange yeshing.

²Ülao kahtawe hüyange yinpalan-e nangte minyong ne tamtüoh; nang nying nyingke aope-o min tahyong.

³Long yihnang hüyange pheih tok ongnang; hüpoi üngapa mengshipu-a moi ni phei sheyihpu.

⁴Mongshih ngaipuwa mengnang hüyange ümeng ngai nang, hüpoi aohüng puphei phintüoh ma-a hatüo hangne-o yeje.

⁵Lowe kenpu phei-a, ngaiphaih-e teetampu shemeipu.

⁶Iye nangte maayah ne tampoi shümpa ja-a shemeipupa. Hüpoi aope wepa jawe nang phaktang me künphalakei kenting yah!

⁷Aope nang seamoh ngohlakei, nange zahtai nehoi yehah hulak, hüpoi aope nang seanyaowe ngohlakei, hahying ükhah nehoi mei phalak.

⁸Kahta ja yoi nok mepu yanne taiye ngohpuwa ülüp mepu yanne taiye ngohpu awha ja le nang.

⁹Minnga hüyange üpe ümeiye kenmeimongma ne tam nang, hüpoi shangshih-e üyin yaha khaine tamnang.

¹⁰Nang shümpalan hüyange nangpa shümpalan yeteih tüope tahngoh. Nang shangshih me ngohpu ne mengma-a, jamlak jingne nang jeihei naolan yamme tah tai; üjai me ngohpu nang jeiheinao ja phei-a nang shong me ngohpu yupipawe nangte jampu oklak.

¹¹Üha, kentamongting yah, hüyange ümong meine tamtüoh; aoyinne üte ngu-nga nang tüolante taowe janne okpu ngohlak.

¹²Juteih pheipu kahtalan-e shangshih peipu nge oknang hüyange tüopa linne teipu oknang, hüpoi juteih-e yenyüopu kahta tüopate tingkhakke kemme peinang hüyange phei me mongmenge teih nang.

¹³Aoyin khakwange üngapa ne menge yinpalan pheeisea te sakipa ne menglak jingne jannang, janyangpu pheeisea jingne I jing toinan tüklak-a shunang.

¹⁴Aoyinne napning shonge shinlüo yange yoi yupipa te moiman phapuweih she üngwünnang, hatüowa phoiwüm nang she ipu oklak.

¹⁵Teeteelapu shekonyuwa waikei wante yelakpe shehpu waiyeng kih ngohnang.

¹⁶Nange hangke yha jünge angpu oklak? Nange hangkih tingme-o wangyang tüklak jingne ngangya ei? Yejema-a yakfa mongme minnga shanpu okya?

¹⁷Yanne yanmuh yeetampu kih-e kahtalan-e shejawe sheja mepu tei shinge yah nang.

¹⁸Phukpeete namnoyah hüyange nange hahlak jingne phuklick tüolak. Shaoshanpa aowe yoi nokpupate namno nang Iye yihnoonpu tüolak.

¹⁹Nang jing sheta muh nange yeng me ngenang hüyange tüokih-e nang mongjange nang jeng-a ngenang.

²⁰Yimshon hüyange Abaddon aope-o wangteki she ye-i; hüyange kahtanyuha mük aope-o yemoh.

²¹Hon hei khümte vünne tokke leinang; hüke muh kahta ja nyoingoh wanglam-o tokke leipu oklak.

²²I pali she manta manta she nange üngapate shetyapoi, I me ngohpu ngawoopu nange shette jange yetei ok.

²³Nange okpu shinne kentinge nenok nyee hüyange mahulante paotüoh.

²⁴Hangjingne toinyu nanha-a jinjintepu jingne yeje. Jat hei lilan nehoi jintepu jingne yengoh ok.

²⁵Numan-e heei wetnang hüyange üne-o aope heei üla ngailakei, numan-e kahtang ye me phümha-a wetnang.

²⁶Numan-e numan nyeelan mepu matte inkhek tak nang hüyange numan jing youn yüopu me tüopu ngin phei kahtok shaknang.

²⁷Topulan youn-e nang hüyange nenok jingne düamyeng phakülak, hüyange nenok shaoshannyulan jingne-o menglak.