Read Konyak Naga DETNGAO 28 Bible Online

DETNGAO 28 - Konyak Naga bible

DETNGAO 28

¹Aowe-o imante yejangpute ümeng kahtalan-a phette tainang, hüpoi khakshupu kahta-a yengkong mailang shinne mongyong nang.

²Aope Kahmük jawe hokwe yonglakei, yemeipu wanglam lampalan pangnang. Hüpoi aope deitahpu, lahnyikpu woipalan-e toi lingpu ngohlakei wongnang lak.

³Wanglam lampu shotjing mepu kahta ja aowe toihalante shangne tamnang I-a deihaliha menge tam-e yahteipu wai le nang.

⁴Aoyinne ngaokhüm wintüoh ümenglante yihnoon nang, hüpoi aoyinne ngaokhüm tük-ang iman phei tüi-e yongnang.

⁵Ümeng kahtalan-e ütingpa-a hanghe yeshing, hüpoi aoyinne Youngwanpate yoppe khüm nang ütingpa-a meimei-e shing nang.

⁶Hakpa ne mengyange ye-i-yeshepe ngohpu phei-a toiha ne mengyange yihnoon ngohpu shemeilak.

⁷Naosheha aowe ngaokhüm jonnang I-a deitahpupa. Hüpoi hanghe jingne-o yemeipulan phei aowe shümpa tamlakei Ipa jingne mongmeng peitam nang.

⁸Aohe-e kahtalante shompu kange yuwe tüopate lahnyikke hakpa ne meng, aowe toihalante yayeng nang iman tangte taiye kümlak.

⁹Nange ngaokhüm yejonma-a, Kahwange nange yoppuwa jamloi nuwe jailak.

¹⁰Aoyinne ngaoting ipa jate lowe lamme ünu lingne tam, iman-a iman-e lingpu yoi tün me yeilak. Hüpoi hango ümeng yenangpu kahtate hünghao ümei phalak.

¹¹Hakpa lanne hipak phe me iman-a kentamongtingpu phei ngohnang she teih nang; hüpoi toiha kahta ao me nyoingoh shelu she ngoh nang Iye shemei she shingnang.

¹²Aope khakshupu kahtawe wong tüowe ngailakei, moilan-e poonne I mongmei nang, hüpoi aope kahta ümenge wanglam lamlakei, kahtalan lowe mahnang.

¹³Nange nang ünu lowe angne ngangma-a nang üyin me aope-o okpu ye-ngelak. Tüolan-a jantüoh hüyange tüolan-a angtüoh; hüma-a Kahwange nangte shüpshe hüolak.

¹⁴Hipak phe me Youngwanpa ngao jaitüoh hüyange nang mongmei lak. Nang üngei ne mengyahma-a nang mahpu ngelak.

¹⁵Waowe ngohpu yengkong mailang yejema-a, hook-e ngohpu shapnyu kih-e toihalan tangme wanglamlampa ümeng-a ngohnang.

¹⁶Juteih ümei yenangpu wanglam lampa-a mengshiye shaoshi tam-e wanglam lampa ne menglak. Ngaoting ye-i-pute aowe nuyapeih hipak laowe wanglam lamlak.

¹⁷Kahta jawe kahta toipu me ümeng ne mengma-a Iye okpu shinne mam-e yoi mangjong shao nang. I lakke tamlak jingne tah ngang.

¹⁸Inne nyaipu phei ngohyah hüyange nang yinlak. Nang ye-innyai yahma-a, nang mokh she yeilak.

¹⁹Toi ngange kahhampa me hahlak üngang ngoh nang. Aoyin kahtalan-e hipak jajang jawe winnang hipak phe me toiha ne menglak.

²⁰Ngaoting pheipu kahtalan wangngoiye hüyange mongmei me ngoh oklak. Hüpoi haklak jingne mamyah ma-a, nang shaoshi ponglak.

²¹Yemeipe teihpuwa yeshu. Hüpoi kahphünpa ütam-e üjinghapu yakjai tüolak jingne yeshupe lingnang.

²²Kheihpalan iman shongte toinanpuwe pa-ngoi she ngohpu yeshingpe haklak jingne yeonge mahnang.

²³Ütamja te tinge tamtüoh, hüyange phei me lüppe lowe tampu yee phei shenyei she Iye tüopate mongmeiye teihlak.

²⁴Aoyinne yoi nyupaheilan mepu kuhpuwa püohpu ne yeje she teih yapeih iman-a kuhpalan phei hanghe yoi yoi-o yeje.

²⁵Ünyei yah-hupuwe shangshih hei ngai tamnang. Youngwanpa te monghüm yahma-a nang jingne jaja phei-o shemeipupa.

²⁶Aoyinne yoite hei monghüm üngapalan, hüpoi aoyin konjong nange kem yinpu oklak.

²⁷Aoyin-e toihalante pha aope-o toinanne yengohlak; Hüpoi toihalante nange nang mük büangyange ngohma-a, kahta maapuwe nangte phoilak.

²⁸Aope kahta ümenglan wanglam lam-e ngailakei, kahtalan lowe mahnang. Hüpoi aope iman yeilakei, khakshupu kahtalan-e üne-o wanglam lamnang.