Read Konyak Naga DETNGAO 29 Bible Online

DETNGAO 29 - Konyak Naga bible

DETNGAO 29

¹Tinge tampu hipak phe me aohepa ünyei üngei ne menglakeih, nyih ja mahtam phalak hüyange meipu ye-oklak.

²Aope khakshupu kahtalan-e wanglam lamlakei kahtalan mongmei nang; hüpoi aope ümenglan-e wanglam lamlakei, kahtalan wao ea nang.

³Naha ja aowe konjongte kennang, nyupalan mongmeine tamnang; hüpoi üshoyüonyulan phei püangpuwe I moth kümtam nang.

⁴Aope ahngpawe ütingpa jingne mong phalakei, jat-a wong nanglak, hüpoi aope Iye nginte hei mong phalakei, Iye yoi kahmük-a menge tamnang.

⁵Aoheye yupipate lowe lamnang, yupipa yashong me tün tünnang.

⁶Ümeng kahtalan-e iman yoi ünu tün me yütnang, hüpoi khakshupu kahtalan jaoshe-e hüyange mongmei nang.

⁷Khakshupu kahtawe toihalan ütingpa shingnang, hüpoi kahta ümenglan-e tüopa jeng shinge ye-ok.

⁸Jenanghahpa-e chingnyulan nopu po ne tamnang. Hüpoi kentamongtingpa-e lamphe li jünge angnang.

⁹Deitahpu kahtawe üngapa phei tüi-e ngaokhüm yahpeima-a, üngapawe nyi-hei nyinang hüyange wennekawe toloi yemeipe ngoh nang.

¹⁰Ngaoting phei ngohpalante iy yinghupu kahtalan-e nunang; hüyange ngaoting ipalan toihu nang.

¹¹Kahta ü-ngapalan-e iman mongshih ngaipu ngaiye inang, hüpoi juteih pheipu kahtalan-e nün ok nang hüyange hatüo tükke angnang.

¹²Wanglam lampa jawe üting yejepu ngaolante mong phama-a, I shaoshanpalan khongkümpu tahleih palan-e menglak.

¹³Toiha kahta ja hüyange Ite shangne tampa imni janpu ja ngoh nang; Youngwanpawe moinite mükke leinang.

¹⁴Ahngpa jawe toihalan ütingpa yinne angma-a, Iye hipak laowe wanglam lamlak.

¹⁵Nahalan jingne tinge tampu hüyange winjaine tampuwa meinang. Hüpoi Naha ja Iye hangke teih hüke shaha kemne tamma-a, I kaiye Iye yoi nyu wüotüone tamlak.

¹⁶Aope ümeng kahtalan-e wanglam lamlakei, toilangpu jalun nang. Hüpoi khakshupulan-a hükihpu kahtalan yeipu te leine üyin ngohlak.

¹⁷Nanghate winjaine tamtüoh hüyange nanga I jingne hipak phe me otalak. Iye nangte wüotüo tamlak ülam hango yephalak.

¹⁸Ümeken me hi-ngao yenanglakeih kahtalan mahnang, hüpoi aowe ngaokhüm jon oknang, I mongmei lak.

¹⁹Ngaopu lili ne ngaopuwe nange shaoshanpa ja tinge tampu ye-ok; Iye nangte jaine ok, hüpoi Iye mong yephalak.

²⁰Teihnyüopu yenangpe ngaopu kahta phei-a ükhu ne mengte phei üngapa me ünyei monghümlak ngoh nang.

²¹Nange rhapate Iye lengpu shemin lamphe phawe ngohyahma-a, nyih ja nang jing khongküm Iye yahtepha lak.

²²Mongshih ngaine o-pu kahtalan-e teelapu hüyange shangshih üngang ngai tamnang.

²³Jamloipuwe kahta ja-a üphangte yeitamnang, hüpoi innyaipawe yihnoonpu tüolak.

²⁴Aoyinne kuhpa phei mongjamlakeih, Iye yoi üyinte nunang; Iye ütuh me yeipupawe phoiwümpu jai nang hüpoi hang ngao-o yengai.

²⁵Kahtate nyampuwe tün yahpeinang; hüpoi aowe Youngwanpate monghümlak yinpu oklak.

²⁶Moilan-e wanglam lampa mepu monghahtampu lengnang, hüpoi Youngwanpa shaha mepu nange ütingpa-a tüolak.

²⁷Khakshupulan-e ümenglante nunang, hüyange ümengpawe khakshupupate nunang.