Read Konyak Naga DETNGAO 3 Bible Online

DETNGAO 3 - Konyak Naga bible

DETNGAO 3

¹Ü-ha, taowe nangte hanghe nyüo tahpe. Hüpoi Taowe nangte hanghe linglak ngaokeng pha mongme teih tüoyah;

²hangjingne tüolan-e nangte jaalunne jinlao shangshaopu üyin yahphalak.

³Nang me ngohpu wangshüm hüyange ütingpa aope-o taine tahtam. Tüolan-a nang üng me yüktam tüoh; tüolan-a nang mongjang me nyantamtüoh.

⁴Hüwante, Kahwang hei kahta moini mepu nange moiman tüolak.

⁵Nang mongjang üsheiye Youngwanpate ütinglak tüoh. Nange shingnang she teihpu me aope-o mong tahhüm.

⁶Nange lingpu sheminlam phe me Youngwanpa teih tüotüoh, hüyange Iye nangte ütingpa lam hüophalak.

⁷Nang phei-a nang muh deipa she nang nying nyingke aope-o teihne tahtam; Youngwanpa shahate ngao jaiyah hüyange yeshupu tah ling.

⁸Nange hüke ngoh okma-a hatüowa muli ümei kih-e ngohlak, nang mako meitamlak hüyange nangte jeihdakpu meitamlak.

⁹Numan kahtok me ngaipu üshei yo me shemeipupawe Ite dopu phei Youngwanpate yihnoon tüoh.

¹⁰Hüke lingma-a, nenok bunga ülickke maalak hüyange wuwüngti tük me maawe ange oklak ne nange tüolak.

¹¹Ü-ha, aope Youngwanpawe nangte tinge tampha lakei kentinge jaiyah hüyange hatüowa deingao she yahtüoh.

¹²Hangjingne payong jawe yoi nyakkenne teihpu ha te tinge tampu kih-e, Youngwanpawe aoyinte Iye ken, tinge tamnang.

¹³Aoyin kentamongting nang, aowe shinge yahpu oknang tüopa kahta mongmeilak.

¹⁴Hangjingne hatüo me khüm tüopu phei shenyei she tüopa me küw ngohnang; hatüowa nangjingne hon phei shenyeipu.

¹⁵Konjonga toinyu long phei sheyihpu; nange yah hupu hanghe phei-o tüopa phinne nyüone ye-ok;

¹⁶Jinlao shangshaopu-a yha yakjah yeme; yha jing yaknya ye me hak-hepu hüyange minyong ngampai ngohnang.

¹⁷Yhawe nang üyin lahnyikne tamnang hüyange tüopa kaiye nanga yinne tam-e woinang.

¹⁸Aoyinne yhate kenyapeih iman jingne yha-a üyin pee; aoyinne yhate mongjüonge tük, iman mongmeilak.

¹⁹Youngwanpawe yoi konjonge kahtoknyu linge ngai; yoi manlam-e Iye wangdanga nyoijing ja me ang.

²⁰I konjonge yengyinlan yünne tam hüyange kahtokte wai keiye tamlak jingne wangphom ngaitam.

²¹Ü-ha, nang konjong hüyange üpongtüowe okpu tükke angtüoh. Nang mepu tüolan aope-o taine tahtam.

²²Tüolan-e nangte üyin yahphalak, lahnyikpu hüyange mongmei üyin yahphalak.

²³Hüwante nang lamnyu me nang mayeyahpe taipu oklak hüyange yashah nehoi aope-o yehüolak.

²⁴Nang aope shinleng te onglakeih nang ye-nyamlak, hüyange nang wangnyak phapan shin nyaiye shipu oklak.

²⁵Mokhshe mahlakpa peipu, hüke ümenglante wangyang wangyi kih-e peipute nang mong yeshanglak.

²⁶Hangjingne Youngwanpawe nang yinne anglak. Iye nang tün me yeine yetamlak.

²⁷Hangkih tingme nange oklakne ngoh, aoyinte wongpongne mengnang tüolante toimei linglak mepu tükke tah-ang.

²⁸Nange sha-a janpu oklak ne ngohyang pheite nang yupipate ngainyihpu jingne tankei she aope-o tah i.

²⁹Nang yupipate yemeilak hango lingne tah teih; I nangphin me, nangte monghüm-e nyoi nang.

³⁰Iye nangte hang ümengo yelingpute kahta ütam ja phei hango üjepu te ngao tah mop.

³¹Yakphei lükpu kahtalante mük tah tak yejema-a iman-e hangke ling hüke lingne tah yong;

³²hangjingne kahta aoyinne ümeng ling imante Youngwanpawe nunang, hüpoi khakshupu kahtalan-a Iye monghah-e yah nang.

³³Ümeng kahtalan noksate Youngwanpawe phoiwümpu pha nang, hüpoi khakshupu noksalante Iye moiman nang.

³⁴Yoi me ülamja nangpu she teihpu kahtalan Iye yejon, hüpoi aoyin innenyai nang tüolante monghahpu hüonang.

³⁵Kentamongtingpu kahtalan-e yihnoonpu mothlei tüolak, hüpoi ükhulan-e yoi mongmengpu hei paolak.