Read Konyak Naga DETNGAO 30 Bible Online

DETNGAO 30 - Konyak Naga bible

DETNGAO 30

¹Jakeh üha Agur lahnyik mongkopu ngaolan: Kahwang ü-phei yenang, Kahwang ü-phei yenang, hüyange taowa pateki.

²Ütingme taowa jamloi kahta ükhu ne mengteki; kahta ja me ngohlak juteih üme yenang.

³Taowe aope-o konjong shinge yeyah, yejema-a taowe Kahwang jeng hango yeshing.

⁴Aowe wangdangte ong hüyange yu ei? Aowe I yak mongme wangyang phoyang ei? Aowe inkhek üpha ja me yeng shop yang ei? Aowe kahtoknyu üküm ngoi-e lingngai yang ei? Kahta min-a hangshi? Hüyange Iha min hangshi? Nange shingma-a üte ipha!

⁵“Iye janyangpu lili Kahwange angnang. Aoyinne Iye yintampu yamnang khongkümpu jingne I-a ree kih-e ngohnang.

⁶I ngaote nange tahpao; yejema-a Iye nangte menge teelak hüyange nanga tahleih ipa she hüolak.”

⁷Kahwang, tao lishao me üte ülam ni yahkei she taowe nangte tong:

⁸Ngaoleih ilak mepu tao tüktüoh, hüyange taowa hakpa ne-o toiha ne-o tahmeng tampha. Tüophei ma-a, taowe wongpong ne mengpu shinne hahying hei yahkei.

⁹Üme loishe ngohma-a, taowe nang wongpong ne üje she taowe ikülak. Hüpoi tao üne-o toiha ne mengma-a, taowe kuhkülak hüyange ü-Kahwang tangme mongmengpu yah peilak.

¹⁰Yoi nokpupate shaoshanpa jawe aope-o ümeng ngaone tahtam. Nangte Iye phoiwümlak hüyange tüopa jingne shanglak.

¹¹Kahta ütam ngohnang aoyinne yoi payimlante phoinang hüyange iman ünyulante iman-e monghahpu yehüo.

¹²Iman okpu shinne püohpinpu ngohyange iman jaowe ngohnang she teihpu kahtalan ngohnang.

¹³Iman jamloi meinang she teihpu kahtalan ngohnang, oh, iman hangshin meipu she iman-e teih!

¹⁴Ütam ngohnang, aoyin fa-a yanglow, aoyin fa-a nyit-ha; kahtok mepu toihalan hangko kahta yo mepu toinanpalan lünge tai ne.

¹⁵Üat jawe yhala ni ngoh nang, “Yahkei, yahkei,” she iman-e üngwün. ülam lüm ngohnang aope-o mongtehuteki she yenang; peli, aope-o “wangteki she ye i!”

¹⁶Yimshon, heelang sheko, wai yampu kahtok üwan, hüyange tükpu ye-okpe loongpu vün.

¹⁷Aowe yoipate haiholakei, yejema-a yha wunyu ne mengwante yoinyute nuwe teihlakei, I-a pongkon ne hahtamlak; yejema-a phao khawanglan-e I mük yokke yahlak.

¹⁸Üjingne shinglak jamloi wanpu yashanpu ülam lüm ngoh nang: Taowe yeshing pu peli:

¹⁹Wang me pupu awlan ja wanglam, longnyu tangme popu pu ja wanglam, yengching me yoi tailam tüowe okpu yenglin ja wanglam, hüyange netan ja hüyange sheko ja nyakkenpu wanglam.

²⁰Phwngngampu shekonyu jawe hüke lingnang: Yhawe hah, hüyange ju shit jao, hüyange inang; “Hüpoi taowe püohpinpu hango yeling!”

²¹Kahtoknyu ülam lüm jingne ninnang; hüyange peli jingne tüowe yenün ok.

²²Rhapa ja aope ahngpa ja ne menglakei, hüyange Üngapa ja aowe Iye hahhupu khongküm ngohlakei,

²³nunushepu sheko ja aowe netanpa tüolakei, hüyange rhanyu ja aowe yoi nokpu nyu shotjing leilakei.

²⁴Shoipu ülam peli kahtoknyu me, tüoyangpoi iman-a loishe deitah:

²⁵Tewolan: iman wong yenang, hüpoi iman-e iman hahying jüo hipak me yonang.

²⁶Aolelan: iman-a wongnangpu ne-o yeje, hüpoi iman-e iman nyoi longnyu yo me ling nang.

²⁷Dukhlan: iman me ahngpa yenang, hüpoi iman khüng lenge yayong nang.

²⁸Yaalan: nang yak phei nange ja pho ne ok, hüpoi nange iman-a ahngnok yinme ngelak.

²⁹“Kemwante wangshüm nange ngepu toilam lüm ngohnang; Eihyang, lingleiwante wangshüm nange leipu peli ngohnang.

³⁰Yengkong mailang, yinmok üshei yo me wong shenangpupa hüyange ao te-o hangko yeteihpe kempu:

³¹Ngüm ngok ngok she kempu younpong, awpong, hüyange yoi kahtalan sheshao me yawin mong a-pu yenangpe yongpu ahngpa.”

³²Jamloilak ne hüyange ümeng linglak tümpu me nang wangman-e ngawoo yangpu ne mengma-a, nang ju me nang yakke yimtüoh!

³³Hangjingne düamyeng leihkheih tüoma-a, düamkeen tüonang. Nange kahta ütam na-teangte tüpma-a, teangtan yunang. Mongshih powe ngaiyahma-a, shaoshi pongnang.