Read Konyak Naga DETNGAO 4 Bible Online

DETNGAO 4 - Konyak Naga bible

DETNGAO 4

¹Ü-ha, nangpawe nangte hanghe nyüonang tüopate jaiyah. Mong phatüoh, hüyange nange shinge yahpu oklak.

²Taowe nangte hanghe nyüonang, tüopa-a meinang, tüokhei tüolan win ne tah ang.

³Aope tao naha ja ne, ünyu üpalan hayim ja ne hei ngoh,

⁴üpawe üte nyüopu ngohyangki. Iye hüke i, “Taowe hanghe i teih tüoyah hüyange tüopa aope-o tahpe. Taowe nangte hangke i hüke lingtüoh, hüyange nang nyoipu oklak.

⁵Konjong tüoyah hüyange üpongtüowe oktüoh! Taowe hanghe iyangki tahpe yejema-a ye-i-yeshepe tahling.

⁶Konjong tahwintüoh, yhawe nang yinne tamphalak; Yhate kentüoh, hüyange yhawe nanga yinne anglak.

⁷Nange linge oklak wongpongne mengpu Konjong tüopu. Nange hangheyin tüonang, üpong tüowe tüoyah.

⁸Konjongte kentüoh, hüyange yhawe nang yonge tampha lak. Yha te kentüoh, hüyange yhawe nangte yihnoonpu yah peilak.

⁹Yhawe nang shang me shüpshe jupeng yüktamlak, hüyange shemeiyaoma shaoshaoh nangte shaohtamlak.”

¹⁰Ü-ha, üte jaiyah. Taowe nangte hanghe inang shangnyakke yahtüoh, hüyange nang jinlaowe ngohlak.

¹¹Taowe nangte Konjong hüyange üyin ngohlak jingne ütingpa lam nyüoyangki.

¹²Aope nang kemlakeih, nang ya-kai me nüngneipu yengohlak; hüyange aope nang phetlakei yashah yehüolak.

¹³Nange hanghe shinge yahyangki jinte tüktüoh. Nange shingemanpuwa nang üyin, tüopa meimeiye yomtüoh.

¹⁴Ümeken me ünu kahtalan tai tüokente tah tai. Ümenglan kon pheite tah woi.

¹⁵Tüopa tahling! Ünupa mepu yanne ngohyah! Tüopa te min she iyah hüyange nang lamnyute taitüoh.

¹⁶Hangjingne ümeng kahtalan-a iman ülamja ümeng manling manling iman-e shi ne ye-ok. Iman-e ütam ja te ma manpha manpha iman pha-yang nang.

¹⁷Hangjingne pa sapu hüyange yakphei lükpuwa iman jingne hahying kih-e ngohnang.

¹⁸Hüpoi khakshupulan kemyongpu lamnyuwa wanghe ongyange nyihning manngoi manngoi: she-ngai she-ngai she ngaipu kih-e ngohnang.

¹⁹Tüoyangpoi ümenglan lamnyuwa wangnyak ünyu shinne nyak nang. Iman yeinang, hüpoi hanghe me iman yei ye-nge ok.

²⁰Ü-ha, taowe hanghe i, tüopate mong pha yah. Ü-ngaolante na shonge jaiyah.

²¹Nang mepu tüolan aope-o yanne tahtam. Tüolan teih tüoyah hüyange tüolan-a nang mongjang me angtüoh.

²²Hangjingne aoyinne tüolan meimei-e shing, tüolan-e üyin hüyange püm nopu mei-e tamlak.

²³Nang mongjang kentinge tük angyah; nang üyin-a nang juteih hei linge ngainang.

²⁴Shushupukih ngaoshaopu mepu yan-e ngohtüoh; Nang jupen-a ngaomeng mepu jai-e angtüoh.

²⁵Lahnyik mongongpu phei tingkhakke sheshao yete leitüoh; wüopuwe nang shang jhotne tahtam.

²⁶Nang ya jingne lamnyu tingkhak-e angtüoh, hüyange nange hangheyin linglakei khakshuwe ngaikülak.

²⁷Yaknya yakjah yete tahlüpshüp, nangya-a ünu-ümeng mepu yan angtüoh.