Read Konyak Naga DETNGAO 6 Bible Online

DETNGAO 6 - Konyak Naga bible

DETNGAO 6

¹Ü-ha, nange nang yupipa pheeisea jingne nokpu ne mengyange ngohma-a, nange yinpa ja phei yak teilükke ngohma-a;

²Nanga nang ngao leihkheihpuwe photam-e ngohnang, nang ju mepu ngaowe muh photam nang.

³Hüma-a, üha, nanga tüopa kahta wong phang me ngohnang, hüpoi hatüo mepu yanne oklak-a hüke ngohnang: I tangte mamtüoh, hüyange nang lanne tamlak jingne Ite yoppe tongtüoh.

⁴Nang nying nyingke shi ne tahtam yejema-a nang müktok shepne tahtam.

⁵Tün mepu awha yinpu kih-e yejema-a meitoipa mepu meishi yinpu kih-e nang nying nyingke yintüoh.

⁶O jookke woopa, nang tewo tangte taitüoh; I hangke nyoi, shinge yahtüoh, hüyange kentamongting yah.

⁷Iman me woipa, ahngpa, yejema-a wanglam lampa yenang;

⁸hüpoi iman-e iman hahying jüo hipak me yo nang, eanyu jingne tümme tannang.

⁹Hangshin laowe nang jookke woopa shinleng me lamyange ngohlak? Shipu mepu aope nang lüolak?

¹⁰“Taowe shohkünoh-e ütenja shilakei;” “Taowe ü-yak paklakeih hüyange tenja toloimei lakeih.”

¹¹Hüpoi aope nang shiyapeih, yonglah pheipu kuhpalan kih-e toinanpuwe nangte shümlak.

¹²Ühak yekohpu, ümeng kahtalan ngaoleih iye neikonne kemnang.

¹³Iman-e mükshüoh-e leinang hüyange nang lolamlak jingne potangpute leinang;

¹⁴iman nanghupu kih-e nangpu mongjang me ümeng khongküm tümme shoyange, kenphe me leihkheih-e mopngai tamnang.

¹⁵Tüokaiye, deingao yepha pe imante mahtampupawe shahlak, hüyange iman linge yene ye-okpe mayahlak.

¹⁶Hanghepate Youngwanpawe jamloi nunang ülam wok, hüyange Ite nuweshak tampu ülam nyit ngohnang:

¹⁷Otawe leipu, tahleih ipu yee, hüyange ümeng yenangpu kahtalan iy shaipu yak;

¹⁸ünu toi linglak jingne teihpu kenhei mong, ünu linglak jingne mampu ya,

¹⁹aowe ja phei me ja she ngaoleih iye saki pha, hüyange shümpa mongjümlan yo me mopngaiye leihkheih-e tampu kahtalan.

²⁰Ü-ha, nangpawe nangte hanghe i tüopa lingtüoh, hüyange nangnyuwe hanghe nyüowe tam aope-o tahpe.

²¹Tüolan-a nang mongjang me hipak phe me shayange angtüoh; tüolan-a nang üng me yükyange angtüoh.

²²Aope nang kem ngohlakei, iman-e nang woiphalak; aope nang shilakeih, iman-e nang yom phalak; aope nang shinlaolakeih, iman-e nang phei ngao phalak.

²³Hangjingne iman-e nyüoweleipu lan-a wangngai ütee; iman-e tinge tampuwe nang hangke ngohlak nyüowe tamnang.

²⁴Tüolan-e sheko ümeng mepu nang yinne angphalak, ülao kahta jing shekolan-e nahnaipu ngao mepu tükke angphalak.

²⁵Iman naoyha meipuwe nang lo ne tahtam; iman-e naipu mük-e nangte tüntünne tahtam.

²⁶Hangjingne kahta jawe phwngngampu sheko ja-a anbung ü-oun ja phei nanne ok, hüpoi phwngngampu lingpuwe I me nangpu khongküm mahne tamlak.

²⁷Nange nang jakuh me nang nyemo hahne yetampe vün angpu oklak a?

²⁸Yejema-a nang ya shu ne yetampe vün pheipu vünoun tangme nang kempu oklak a?

²⁹Hatüo meimei kih-e ülao kahta ja jing sheko phei shipu-a wengtuh ne ngohlak. Aohipawe hüke linglakei shaoshi yetampe yengohlak.

³⁰Kuhpa jawe aope I seanyao yapeih hüwante hahying kuhma-a kahtalan-e Ite yephoi.

³¹Tüoyangpoi I kuh yüoma-a, Iye üphong nyit nyeiye shümme yelak I me ngohpu khongküm phawe teilak.

³²Hüpoi kahta ja aowe phwngngampu ling Ime juteih hango yenang. Iye yoi nying nyingke menge tamnang.

³³Ite ye-i-yeshe lak hüyange üko shalak, hüyange I wüokhüwpu phutte winpu ye-oklak.

³⁴Hangjingne netan ja-a mongshih ngaiye müktakke, ngohlak-a aope-o yeshailak; Iye phuh hahlak ityange yengohlak.

³⁵Iye ümee phapu hango yeyahkülak; jaja shinpu yakjai phayapoi I mongshih ngaipuwa yelanlak.