Read Konyak Naga DETNGAO 7 Bible Online

DETNGAO 7 - Konyak Naga bible

DETNGAO 7

¹Ü-ha, taowe hanghe i teih tüoyah, hüyange taowe nangte hanghe lingne i, nange tükke angtüoh.

²Taowe hanghe i lingtüoh, hüyange nang üyin ngohlak. Taowe nyüopute nang mük yinlak jingne hangke kenting hüke kenting tüoh.

³Hipak üshei me taowe nyüopu nang me angtüoh; hatüo nang mongjang me nyantüoh.

⁴Konjongte nangnya kih-e, hüyange üpongtüowe okpute nang mongken jumai kih-e teihtüoh.

⁵Tüolan-e ülao kahta shekonyulan mepu, hüyange shangnai ngao pheipu shekolan mepu nang yinphalak.

⁶Tenok tawo me, tawo jan kaiye taowe lei,

⁷hüyange meiyange mandei mantahpu naoshelan maawe taowe nge, hüpoi ünyei ne ngawoopa ja taowe lei ok;

⁸I chingkeng lamnyu me yha nok ünuk pongme tinge ümmeken me sheko ja nyoi tüome kem. I-a yha nok phei owe linne,

⁹ünpong wangnyak phei me nyak-e peipu hipak me tai.

¹⁰Hüwante sheko ja I shaote pei; yha-a phwngngamnyulan oleng yahyange hüyange ülam tüm.

¹¹Yha-a hangko yeteihpu hüyange yewüopu chingkeng lamnyu me kempu sheko ja,

¹²yejema-a ünuk ja me tanne, hipak ja ja ma-a lam ang me, hipak ja ja ma-a pheeihleih nyoi me yonge ngohpu sheko ja.

¹³Yhawe naoshepate mongjüonge ken, Ite omhüp, mükte khak ange lei, hüyange Ite i;

¹⁴“Taowe tenyih dopu pha hüyange toidopu mepu mei ngohnangki.

¹⁵Tüokhei taowa nang yamme ngaiyangki. Taowe nang hüohuwe teih, hüyange hatüo me nang ngohnang!

¹⁶Taowe ü-shinglenga Egypt mepu nyekhai hase üngang pheipuwe nyamyange ngohnang.

¹⁷Taowe hatüome üpe meipu yingwangti, alopeti, hüyange longkhok üpe lanne photeki .

¹⁸Kei yayonghah, wangnyak phapan teikenpu ngohhah. Teman-e shejawe sheja phaktang me tei-nyeng yange mongmei hah.

¹⁹Ü-netanpa-a nok me yenangja. I yinlaote taitepu.

²⁰Iye ngin nangjange I phei yahteitepu hüyange hatmong ni jingne minyeja.”

²¹Hükih-e yha üngan phei yhawe I lolam, hüyange yhawe naipu ngaote I pha ne ngai.

²²Mokhshe I-a yha phei toine teipu mahu üpong kih-e, tünkam te onge toongpu meishi kih-e I woitai.

²³Ümeken me lahhan-e I mongjangte peilei honglak yeshing. I-a shaante ongpu awha kih-e I üyin ütuh me ngohnang she Iye yeshing.

²⁴Sha-a hüma-a, ü-halan, üte jaiyah. Taowe hanghe i, tüote mong phayah.

²⁵Hükihpu shekowe nang mongjang okne tahtam; yha lamnyu me waa-e tahkem.

²⁶Yhawe kahta üngang menge tamyangpu hüyange ipu yekümpe li ne tamyangpu.

²⁷Nang yha nokte taima-a, nanga yimching kahtok lamte kemnang. Hatüowa lilak jingne ünunglangpu lam.