Read Konyak Naga DETNGAO 8 Bible Online

DETNGAO 8 - Konyak Naga bible

DETNGAO 8

¹Konjonge üngwünpu a? Shinge okpupawe yha ngaowüng yengaipu a?

²Lamnah kahmüoh tang me hüyange lampong me yha yong nang.

³Chingnyute ongpu lamten me, peten pongme yhawe üngwün nang.

⁴“O kahtalan, taowe numante nyiknang; hüyange ü-ngaowünga kahtanyuha üsheite.

⁵Numan kahta ne manmeng okpu a? Kahta ne menglak shingyah. Numan ngawoopa a? Juteih ngohlak shingyah.

⁶Taowe shemeipupa ne ngaopulan jaiyah; taowe numante ngaopu lili-a üting ngohnang.

⁷Ü-juwe hanghe pa ütingpa, hatüo ngaonang, tahleihlan-a üjingne nulakpa.

⁸Ü-ju me ngaopu lili-a üting, hanghe-o yeshupu yejema-a püoh-e woipu yenang.

⁹Üpong tüowe okpu kahtate, hatüo khongkümpuwa tingkhakke; meimei-e shinge okpa te, hatüo khongkümpuwa shunang.

¹⁰Khüm nanleiye taowe nyüoweleipu leyah; shemeipupa hon nanleiye manlam leyah.”

¹¹Hangjingne konjonga, toinyu long phei shemeipupa; nange lengpu hanghe-o tüophei phinne ye-ok.

¹²Taowa konjong, hüyange taowe üpongtüowe okpu ngohnang; üme manlam hüyange meiye itteshem-e okpu ngohnang.

¹³Youngwanpate yihnoonpuwa ünupate nupu; Otapu hüyange jamloipute, ünulan hüyange tahleih ngaolante taowe nunang.

¹⁴Taowe ülamlan tümnang hüyange tüolan linge tainang. Üme shinge yah okpu ngohnang, hüyange taowa wongnang nang.

¹⁵Ü-kaiye ahngpalan-e wanglam lamnang, hüyange wanglam lampalan-e ngaotingpa ngaokhüm lingnang.

¹⁶Ü-kaiye wanglam lampalan-e, hüyange üjeng üshanglan hüyange üyih üyonglan-e wanglam lamnang.

¹⁷Aoyinne üte ken taowe imante kennang. Aoyinne mongphawe tao yam iman-e tao tüolak.

¹⁸Üme hakke hepu, hüyange yihnoonpu, jalunpu hüyange okkeshangpu ngohnang.

¹⁹Ü-mepu hanghe tüo hatüowa shemeipupa hon phei shemeipu, shejaopupa khüm phei shemeipu!

²⁰Taowa khakshupu lamme kemnang; taowa ütingpa lam me woinang;

²¹aoyinne üte ken imante moth pha nang, sheng-ngin-e iman nok maatam nang.

²²“Youngwanpawe tao üshei yo me üwangne linge ngai, hipak yeonge taiteki, I toishaolan yo me üwangne.

²³Taowa ükong wangwante üwangne, kahtoknyu ngaishao me linge ngai.

²⁴Aope yengpeiwo man nangpe ngoh, tao puhtam, hüyange yengchinglan ngaishao me taowa puh;

²⁵Yoi yoi nyoi me kahtanglan man ang pe, kahmüohlan ngaishao me taowa puh;

²⁶Kahwange kahtoknyu hüyange kahkolan linge ngaishao me, yejema-a üwangpa kahtok ü-oun ha ja nehoi lingshao me taowa puh.

²⁷Aope Iye wangdang yoi nyoi me ang, aope Iye yengching kaiye kah hei wangnipa eppe ngai, tüo shao memuh tao ngoh.

²⁸Aope Iye wangme wangphom angetam, aope Iye yengching yenglok eppetam;

²⁹hüyange yengching yengte Iye ngaoyangpu tokte ye-onglak jingne ngaokeng pha. Aope Iye kahtoknyu linge ükongwang, tao tüoken me ngohyangki.

³⁰Nok shenge tümpa kih-e tao I shongme ngoh, taowa I jingne nyihjeih mongmei phapa ne ngoh, I shongme nyihjeih mongmei,

³¹kahtoknyu phei mongmei hüyange hangkonyuha te moimantam.”

³²“Sha-a, naoshelan, üte jaiyah. Taowe hangke i hüke lingtüoh, hüyange nang mongmeilak.

³³Numante hanghe nyüo tüopate jaiyah kentamongting yah, tüopate mong yephape tah ngoh,

³⁴Üte jaiyahpu kahta, ü-tafün shongme nyihjeih ngohpu kahta, tenok te onglak jingne tafün shong me tanne ngohpu kahta mongmeilak.

³⁵Hangjingne kahta aowe tao tüowe ok üyin tüonang; hüyange Youngwanpawe Ite moimanlak.

³⁶Hüpoi kahta aowe tao yetüo ok I nying nyingke mayah nang; üte nupu liliye lipute kennang.”