Read Konyak Naga KONNYÜONGAOLAI 1 Bible Online

KONNYÜONGAOLAI 1 - Konyak Naga bible

KONNYÜONGAOLAI 1

¹Hatüowa David üha, ao Jerusalem me ahngne ngoh, konheingaopa ngaolan.

²Hatüowa jajang japu, jajang japu konheingaopawe inang. Üyin-a jajang japu, khongküm jajang japu.

³Wanghenyu phang me Iye hanghe ling, lingeyahpu khongkümpu jingne kahtawe hanghe küw tüonangki?

⁴Jin ja peinang hüyange jinja linne tainang, hüpoi kahtoknyuwa hüke muh jakih-e ngohnang.

⁵Wanghe hüke muh ongnang, hüyange yelakpe muh nyüpnang, ongpu nyoi temuh leih yelak jingne towenyaiteiye nyüp nang.

⁶Wangyang heyekao te leinang, hüyange apyekao te wangyang neikonne leinang. Wangyang neikon neikonne leinang, hüyange tüopa ükam mongme wangyang leihmuh yenang.

⁷Yengyin lili yengching te yünne ta-nang; hüpoi yengchinga ye-ma ok. Yengyin ümeken mepu ükong wang tüoken temuh yeng leih yenang, hüyange khongkümpu üne-o tüoken me ükong wangnang.

⁸Khongkümpuwa mongshangpuwe maangoh nang; mongshangpu ngao me khoih ilak jingne jamloi nang. Ngepu lilite mük yemoh, yejema-a jaipu lilite nawe wangteki she yengoh ok.

⁹Üshongpe hanghe ngai tüomuh üne-o ngaikülak. Üshongpe hanghe lingyangki tüomuh üne-o linglak. Wanghenyu phangme üla hango yenang.

¹⁰Iman-e inang, “Leihuyah,” “Hatüome ülam ja üla!” Hüpoi yeje, teman puhshao memuh üshongpe hatüolan khongkümpu ngaiyangki.

¹¹Lintepu hipak me hanghe ngaiyangki aowe-o yeteihtüo, hüyange sha-a me peiye ngoikülak hipak me hanghe ngaikülak aowe-o yeteihtüo.

¹²Tao, konheingaopa, Israellan tangme Jerusalem me ahngne ngoh.

¹³Tüopa kahtoknyu me lingyangpu toishaolan khongkümpute taowe tokke leilak hüyange teih leilak jingne taowe mongeteih. Kahwange teman tangme ngoikülak hipak me hanghe jumeng wanteng peilak teman me tüoh.

¹⁴Tüopa kahtoknyu me lingpu sheminlamphe taowe ngeyangki, hüyange taowe iphaning, tüolan khongkümpuwa jajang japu. Hatüowa wangyangte jangpu kih hei ngohnang.

¹⁵Hanghe koomteiye ngoh nange tinge yepu ye-oklak; tüoken me yenangpu toilamlan nange ipu ye-ok lak.

¹⁶Taowe ü-nying nyingte i, “Tao kahta üyongne meng, ü-sheshao me aoyinne Jerusalem me wanglam lam üshei phei kentamongtingpa ne meng. Ütingpa me konjong hei manlam hanghe taowe shing.”

¹⁷Taowe manlam hei ngawoopa ni, konjong hei ngapa ni pa me hanghe yoi yoi shinge yahlak jingne ngang. Hüpoi tüopa-o taowe wangyangte hei jangpu she taowe nge-ok.

¹⁸Nang hangshin kentamongting, teshinne nang mongshanglak ngohnang; nange hangshin shing, teshinne tüopawe nangte maa pha nang.