Read Konyak Naga KONNYÜONGAOLAI 10 Bible Online

KONNYÜONGAOLAI 10 - Konyak Naga bible

KONNYÜONGAOLAI 10

¹Hoi ümang jawe üpeameipu minnga nam ne tamnang; hüyange üjingha woowapu jawe konjong üyong mahtam nang.

²Kentamongtingpu mongjange yoi yakjah yeme tainang, hüpoi woopu mongjange yaknya yeme tainang.

³Üne-o aope woopa lamnyu me kemyapeih, Iye yeshingok, hüyange hüopu lilite taowa woopa she inang.

⁴Wanglamlampawe nang phei tüi-e mongshih ngaima-a, nang toishao tahtüoh, hangjingne jünge ngohpuwe püohpinpu üyong-o min-eima she tüohlak.

⁵Hatüo me ngaoting ye ipu ja taowe wanghenyu phang me ngeyangki, hatüowa wanglam lampalan-e ngaoting ye-ipu.

⁶Hakpa kahtalante ye-i-yeshepe tüohyange woopalante pahi wanglamlampu, shotjing phanang.

⁷Üyih üyonglan rhapalan kih-e ya me kemwante rhapalan koipong tokme ongyange taowe ngeyangki.

⁸Aoyinne kahsa shao iman tüopa me yütlak; hüyange aoyinne jan menge ong, puwe imante jotlak.

⁹Nange long khüw-e toilingpu ne mengma-a, longe nangte mayah tamnang. Nange hantatpu ne mengma-a, tüopa tingpuwe nang mayah nang.

¹⁰Nang wa yepah hüyange tüo yeyiema-a, tüopa jonlak nanjingne nange ngange toi linglak ne ngainang. Shaotanne tümme tapu ünyei juteih wangngoi nang.

¹¹Puwe nangte üwangne jot ne tamyang pheima-a, pu hangke ngei-e yahlak wongpongne yemeng.

¹²Kentamongtingpu jawe ngaopuwe Ite minyong ngampai yah pei, hüpoi woopawe yoi ngaowe yoi nying nyingke menge tamnang.

¹³Iye ngayounpu ngao phei ngaowe wangnang hüyange ütingpa me nga-e shonnang.

¹⁴Woopawe ngaokhan ngao nang. Ünepa me hanghe ngaikülakei aowe-o yeshing ok, hüyange kahta liphei me hanghe ngaikülak aowe-o temante ye-i-oklak.

¹⁵Woopa toishaowe iman moilan mongshangne tamnang, hangjingne chingnyute hangke yelak Iye shinge yenang.

¹⁶Nangtepu Ahngpa-a shelaha, hüyange nangtepu wanglam lampalan-e phayange napningte ngoishe mo hahying, O kahtok, nang jingne onyukei!

¹⁷Hüpoi kahmük ja-a ao ahngpawe yoi nying nyingke wanglam lamme ok hüyange woipalan aoyinne hipak khakshuwe hahying, aoyinne iman nying nyingke tükke ok hüyange jokke nga ne yetam yatuhshao meipu.

¹⁸Kahta jawe Inok sheplak jingne nehoi ye-okpe jamloi jookma-a, wai onglak, hüyange nok-a toitalak.

¹⁹Momopuwe nang mongmei tamnang hüyange wuwüngtiye nang hoongline tamnang, hüpoi ngin yenangma-a nange hanghepa-o ngohne ye-oklak.

²⁰Nang juteih me nehoi ahngpate ngao tahnyei, hüyange lowe ngaojing nang shinjing tüp me nehoi hakpate ngao tahnyei. Awha jawe ngaolan-a yah taine ok hüyange nange hanghe ngaoyangki imante ilak.