Read Konyak Naga KONNYÜONGAOLAI 11 Bible Online

KONNYÜONGAOLAI 11 - Konyak Naga bible

KONNYÜONGAOLAI 11

¹Nang hahyinga yeng tangme shon tamtüoh; hangjingne nange nyih nangjange ngohyange tüopa-a leih tüolak.

²Nange leihtüolaka üken nyit yejema-a tet me nehoi angtüoh, hangjingne hatüo kahtoknyu me hangkihpu yatuhshao ümeng nange hüolakei nange, aope-o shinge yenang.

³Aope wangphom nyeihlakei, waikei nang. Ümpehe yekao heye heiya apye me pee-a toiye talakei hangne-o yeje, üpüken yekao me yei tüoken me toitayange ngohlak.

⁴Aoyinne wangmeipu tan ngohlakeih, deilipu ye-oklak; hüyange aoyinne wangphomte lei-e ngohlakei tah yahpu ye-oklak.

⁵Nange wangyang lam yeshingpu kih-e, yejema-a nyuyong naonyoi me naha waan-a hangke jong yeshingpu kih-e; tüokih-e Kahwang aoheye khongkümpu linge ngai I toishao nange yeshing oklak.

⁶Nange üli-a shomme-o hüyange ünpong me-o deitüoh. Tüolan khongkümpu meiye phaowe jonglak heiya yejema-a japa hipak me deipupa japa hipak me deipupa phei shemeilak nange aope-o shinge yenang.

⁷Wangngai-a nyaishüm-e, hüyange mük-e wanghete leilak-a lahnyiklakpa ngohnang.

⁸Nang ngoh-e okpu wangpeng lili jingne monghah tüoh. Nang hangshin jin laowe ngohlakei hangne-o üje; tüoyangpoi liyange wangnyak me ngohlak hipakpa shelao she ngohnang she teihne tamtüoh. Hanghe peikülak leiye tanlak-o jajang japu.

⁹Tangshimlan, nang tangshimwan mongong tüoh. Nang tangshim wante mongmei yah. Nange hanghe linghuwe teih lingtüoh, hüyange nang mongjange lahnyikpute woitüoh. Hüpoi teihtüoyah nange hangheyin linglakei tüopa jingne Kahwange nangte ngaophün phalak.

¹⁰Hanghe-o nangte mongshangne tahtam yejema-a nangte dak-e peine tahtam. Nange hipak laowe tangshim ne yengoh oklak.