Read Konyak Naga KONNYÜONGAOLAI 12 Bible Online

KONNYÜONGAOLAI 12 - Konyak Naga bible

KONNYÜONGAOLAI 12

¹Hipak ümengpa manpeipe nang tangshim hipak me nang Lingengaipupa teih tüoyah; hüyange aope wangpeng ümenglan owe peilakeih nange ilak, “Tüolan me ümong meipu hango yenang.”

²Wanghe ütee hei wangngai hüyange linnyu hei shanhalan yui-e mantape, hüyange wai phei wangphom leih yelak.

³Aope nok yompalan ninlakei, hüyange wongnangpu kahtalan khaimahlakei, hüyange sheko iman ütamja hei topu jingne shüm shupalan laklakei, hüyange aoyinne tawo kaiye leinang iman yui mahlakei;

⁴aope chingkeng lamnyu mepu taküplan latyange ngohlakei; hüyange aope shümshupu wüng jowe laklakei, aope awhalan ngaowünge nang loine tampha lakei, hüyange yhalalan-e lokpu hemwüng yejaipe jowe laklakei;

⁵üne-o ütangye me hanghe ngai tüolante iman nyamlak, hüyange ümeng lingpalan-a tailam lanme; almond pee me üpeng ngai, hüyange tüolan tangme dukhlan pah hüyange lahnyikpu yenangpe mah; hangjingne kahta-a jintepu yoi nokte taiye mah, hüyange chingkeng lamnyulan paowe mangshappalan kem.

⁶Khüm wu manphünpe yejema-a hon tük manpaipe, yejema-a yengnung me yenglei manpaipe; yejema-a yengtük shongme üya mankhaipe;

⁷hüyange I ngohyangpu kih-e kahmak-a kahtok ne leih yewante, hüyange yaha-a phapupa Kahwang tangte leih yewante nange teih tüoyah.

⁸Jajang japuwa jajang japu she Konheingaopawe inang: khongkümpuwa jajang japu.

⁹Konheingaopa-a kentamongtingpa ne mengpu jingne shaha ne yeje, Iye hanghe shing kahtalante yelakpe tüopa nyüowe tam. Iye detngaolan yam hüyange yihnoonpu phei tüolan tepu ütingpate tokke lei.

¹⁰Konheingaopawe toloimeitampu ngaolan tüolak jingne ngang, hüyange Iye nyanpu ngaolan-a ütingpa.

¹¹Kentamongtingpa lan-e ngaowe angpulan-a nyeelan woilak jingne nyeeyompawe jonpu jüpkülüppu shengshaoh kih-e, hüyange shaijempu deitahpu konlan-a mongjüonge takketaipu lag mongpu shinne mongnang.

¹²Ü-ha, tüolan kaiye üne-o kentinglak jingne ülam ja ngohnang. Laiteplan maawe nyanlingpu me üküm ngoipu yenang; hüyange jamloi lai yampuwe iy mei me nang towenyailak.

¹³Tüolan khongküm phei me, ilak ülam ja hei ngohnang: Kahwangte nyamtüoh, hüyange I ngaokenglan jaitüoh, hangjingne tüolan jingne hei kahta-a linge ngaiyangki.

¹⁴Hangjingne lingyangpu sheminlamphe jingne, ümeng jeyah ümei jeyah, hüyange lowe lingyangpu lili jingne Kahwange ngaophün phalak.