Read Konyak Naga KONNYÜONGAOLAI 2 Bible Online

KONNYÜONGAOLAI 2 - Konyak Naga bible

KONNYÜONGAOLAI 2

¹Taowe ü-nying nyingke hoongli mong ongpu hei mongmei-a hanghe shinglak jingne tüm. Hüpoi, hatüo-o jajang japu she taowe nge ok.

²Wennekapuwa üngapa, hoongli mongmeipuwe nangte hang ümei-o yeling she taowe nge ok.

³Konjong jingne taowe lahnyik mongkopu phei jange, taowe ü-nying nyingke wuwüngti kaiye mongmeine tamme hüyange hipak ümei me ngohlak jingne taowe monge tüm. Kahtoknyu me hipak shohkünoh-e ngohwante hükih-e ngoh-e lilakpa shemeipupa lam she taowe teih.

⁴Taowe toinyu üyonglan linge sho. Taowe ü-nying nyingke noklan we hüyange wuwünglick kah hamme dei.

⁵Taowe pelick ülam lili pheipu deiyange pesha hüyange pelickjong ham;

⁶tüolan me yeng shokke tamlak jingne taowe yengnunglan shao.

⁷Taowe rhapalan üngang peiye ang, hüyange tenok noksa me rhalan puhpaipu ngohyangki. Jerusalem me aoyin ngohyangki tüolan üshei phei shenyei she taowe yinmoklan ngohyangki.

⁸Taowe wanglam lampu kahmük lwnglan mepu hon hei khümlan-o taowe shaijüm. Tao mongmei tüolak jingne sheko hei netan hemlokpalan-e hemlok, hüyange kahta jawe yahhupulan shinne taowe shekolan ang.

⁹Üting, taowa üyongne ngoh, Jerusalem me aoyin üyonglan ngohyangki tüolan üshei phei sheyongpupa ne, hüyange ü-konjonge üte aope-o ye-okpu ye-nge tam.

¹⁰Hangheyin taowe yahhu, taowe tüo. Lengpu lilite taowe ü-nying nyingke min she ye-i. Taowe lingyangpu shemin lamphe toishao jingne tao otapu ngoh, hüyange tüolan khongkümpuwa ü-hünghao ne ngoh.

¹¹Tüophei me taowe lingyangpu khongkümpu jingne hüyange tüolan lingwante taowe hangshin wanne ling taowe teih, hüyange hatüowa hanghe toi ja ne nehoi yemeng jajang japu she taowe teihtüo. Hatüowa wangyangte jangpu kih hei wanghenyu phangme lanshe hanghe ne-o yemeng.

¹²Tüophei ma-a, üwangpa ahngpalan-e hanghe linge tüoh ahngpa jawe-a tüo hei lingpu oklak. Tüokhei konjongpa yejema-a hommetükpa yejema-a üngapate leppuwa hanghe she taowe teihne ükong wang.

¹³“Wangngai-a wangnyak phei shemeipu kih-e, konjonga üngapa phei shemeipupa she taowe nge ok.

¹⁴Kentamongtingpa kahtawe yoi ümekente tainang ngepu oknang, hüpoi üngapa-a wangnyak me kemnang.” Hüpoi jakihpu yatuhshaowe muh teman, moilan jingne tamnang she taowe shingnang.

¹⁵Taowe ü-nying nyingke teih, “Üngapalan-e hangkihpu yatuhshao hüo jakihpuwe muh tao shanglak. Tüokhei tao kentamongtingpa ne mengpuwe hanghe ünyei küw tüopu?” “Hango yetüo,” taowe jan, “Ja nehoi yetüo.”

¹⁶Kentamongtingpalan aowe-o yeteihtüolak, hüyange üngapalan-o aowe-o yeteihtüolak. Ngoikülak hipak me teman khongkümpu pemah teiye ngohkülak. Kentamongtingpa hei üngapalan moini, teman khongkümpu lilak.

¹⁷Tüokhei üyin peipuwa üjingne hanghe ne-o yeje, hangjingne ima-a tüomepu hanghe-o üte ümei yah yepeitam hüpoi shangshih shaha. Tüolan khongküm wanghenyu phangme jajang japu yang; taowe wangyangte jange ngohyangpu yang.

¹⁸Taowe hanghe jingne lingyangki hüyange wanghenyu phangme nanshang yangki üjingne ja nehoi wongpongne yeje, hangjingne taowe shingnang hatüo lili-a ü-nanleipate tüohlak ne ngainang;

¹⁹hüyange I-a kentamongtingpa ne mengne ok, yejema-a üngapa ne mengne ok, aowe shing? Tüoyangpoi, taowe wanghenyu phangme shangyangpu khongküm, hatüo kahtok nyu me ü-konjong kaiye üjingne lingeyah yangpu khongküm I jingne menglak. Hatüo lili-a jajang japu.

²⁰Tüokhei taowe wanghenyu phangme teshinne shange lingyangpu jingne tao mongmenge teih nang.

²¹Nange ülam ja jingne nang konjong hei manlam hüyange wong üsheiye toiling, hüyange nange hatüo lili-a kahta ütam aowe tüolan jingne shange yeling Ite tüohlak. Hatüowa jajang japu, hüyange hatüo ütingne yejelak a!

²²Nange wanghenyu phangme toiling hüyange nang üyin jin kümme mongshang, hüyange tüopa jingne nange hüolak hanghe ngoh nangki?

²³Nang üyin me ngohpu mongme, nange lingyangpu liliye hango yah yepeilak, hüpoi mongshangpu hei mong nüngneipu hei peilak. Yaning nehoi nang kenmong toloi yemei oklak. Hatüolan-a khongküm jajang japu.

²⁴Kahta jawe linge oklak shemeipupa-a hahlak hüyange yinglak hüyange Iye hanghe lingeyah yangki tüopa me mongmeilak. Tüoyangpoi tüolan-a Kahwang mepu she taowe shingeok.

²⁵Nang nying nyingke hahying yange mongmeiye ngohlak-a hüma-a hang ngoh nangki?

²⁶Aoyinne Kahwangte minyong phanang tüolante Iye konjong hei manlam, hüyange mongmei phanang; hüpoi Iye ünulante toilingne, nan-yatne hüyange yowe angne tamnang, hümme nakshih hangheyin iman-e tüo tüolan-a aoyinne Ite minyong pha tüolante phalak. Tüolan khongküm jajang japu. Hatüowa wangyangte jangpu ja le nang.