Read Konyak Naga KONNYÜONGAOLAI 3 Bible Online

KONNYÜONGAOLAI 3 - Konyak Naga bible

KONNYÜONGAOLAI 3

¹Sheminlamphe jingne juwan ngohnang; hüyange wangphang me ülam lili jingne hipak japong itshemyange ngohnang.

²Puhlak jingne hipak ja hüyange lilak jingne hipak ja; deilak jingne hipak ja hüyange hanghe deiyangki bhei winlak jingne hipak ja;

³toilak jingne hipak ja hüyange meiye tamlak jingne hipak ja, mengewinlak jingne hipak ja hüyange linge yelak jingne hipak ja;

⁴shaplak hipak ja hüyange nyilak jingne hipak ja, mang shaplak jingne hipak ja hüyange poloklak jingne hipak ja;

⁵long bheiwinlak hipak ja, hüyange long shomme yelak hipak ja; om teihüppe kenlak hipak ja hüyange teikenpu lanlak jingne hipak ja;

⁶yamlak jingne hipak ja hüyange mahtamlak jingne hipak ja, yowe anglak jingne hipak ja hüyange winlak jingne hipak ja;

⁷hitte kaklak jingne hipak ja hüyange sünge yelak jingne hipak ja, jünge ngohlak jingne hipak ja hüyange ngaolak jingne hipak ja;

⁸kenlak jingne hipak ja hüyange nulak jingne hipak ja, hoklak jingne hipak ja hüyange chingmeilak jingne hipak ja.

⁹Toilingpa jawe toi linge shangyangpu mepu Iye hanghe küw tüopu?

¹⁰Kahwange kahta ühate kiye tampu hangki yih-taowe ngeyangki.

¹¹Sheminlam phe jingne Iye khakshupu hipak itte tam. Ngoikülak hipak jeng shinge oklak jingne Iye kahtate lahnyikpu pha, hüpoi Kahwange hanghe lingyangki khongkümpu mongte onge shinge yahlak Ite aope-o yepha.

¹²Tüokhei iman-e linglak khongkümpu ne-a üyin me ngohwante mongmeiye ngohlak hüyange iman-e okpu shinne shemeipupa linglak yang she taowe teihtüo nang.

¹³Teman lili-e hahlakyang hüyange yinglak yang hüyange teman-e hanghe jingne toi lingyangki mongmeilak yang. Hatüowa Kahwang hünghao.

¹⁴Kahwange lingyangpu sheminlamphe-a jintepu jingne ngohlak she taowe shingnang. Tüopate nange hango paone ye-ok yejema-a tüopa mepu hango yahteipu ye-oklak. Hüyange Kahwange lingpu ülam ja-a Ite kahtawe nyamme tamlak jingne lingetam.

¹⁵Hangheyin ngaiyangki yejema-a ngailakei khongkümpu üshongwante muh ngaiyangki. Kahwange tüoja muh yelakpe ngaitam nang.

¹⁶Tüote paowe, taowe wangphang me hatüopa-o leiye okyangki, ngaotingpa nyoi me-o ümengpa, hüyange khakshuwe ngohpu nyoi me-o ümengpa ngohyangki.

¹⁷Taowe ümongjangte i, “Kahwange khakshupu hei ümengpa moinite ngao phünlak, hangjingne Iye sheminlamphe jingne hipak japong hüyange ngaipu lili yoi itpu hipak me ngailak jingne ling.”

¹⁸Taowe kahta ühalan jingne ü-mongjang me hüke ngaowe i, hüke kahta ühalan-a yinmoklan phei shemeipupa ne yeje ja she hüolak jingne Kahwange tokke leinang.

¹⁹Tüopheima-a, kahta hei yinmok moinite jakihpu yatuhshaowe tannang. Ülao japa hangke li tüokih-e japa-o linang. Iman moilan jakihpu yinmoknyuha. Kahtanyuha-a yinmok ja phei hanghe yoi yoi ne-o yeje, hangjingne ümpehepa jingne-o üyin ngohpu-a yahlak yenang.

²⁰Iman moilan nyoijing jatemuh tainang, kahmak ne! Moini tüomepu pei, iman moilan tüopa te muh leih yenang.

²¹Hangke aowe kahta yaha-a ütang yete ongnang hüyange yinmok yaha kahtok ümongte ta nang she ütingpa me ipu oklak?

²²Tüokhei hüwante taowe teihtüopuwa, teman-e linglak shemeipupa-a hanghe jingne teman-e lingyangki tüome mongmeilak hei ngohnang. Teman-e linge oklak hango yenang. Teman phei me temante hanghe ngaikülak teman-e shinglak ülam yenang.