Read Konyak Naga KONNYÜONGAOLAI 4 Bible Online

KONNYÜONGAOLAI 4 - Konyak Naga bible

KONNYÜONGAOLAI 4

¹Tüophei me üne-o taowe hatüo wanghenyu phang me ngaotingpa yenangpe taipu lilite lei. Shaoshine tampalan mükphi, hüyange shejawe nehoi imante yejam. Aowe-o imante jampu ye-ok, hangjingne ima-a shaoshi phapalan iman me wong ngoh yangki.

²Aoyin ümang hüyange liteki imante taowe waowe leinang; aoyin üyin me ngoh tüolan phei-a iman shemeipupa.

³Hüpoi moini phei shemeipupa ne-a aoyin lanshe yepuh tüolanpa! Aoyinne tüopa wanghenyu phang me ngaotingpa yenangpu lanshe ye-nge tüolan shemeipupa.

⁴Taowe üne-o hangne kahtalan-e okpu ngelak jingne teshinne ngange toi ling shinge yah: hatüo hangne ima-a iman-e iman yupilan waowe leipu jingne! Hüpoi hatüo-o jajang japu. Hatüowa wangyangte jangpu kih hei ngohnang.

⁵Kahta ja üngapa ne menge I yakpaklak hüyange I nying nyingke nyaoweleye linang she iman-e inang.

⁶Tüopa je ne ok, hüpoi wangyang pho ne ngange, moini yak phei hipak yengaipe toi lingpu phei-a üjingha ngohyange chingmei mongjang me ngohpu shemei.

⁷Üne-o wangphang me jajang japu ülam ja taowe nge ok.

⁸Hatüo me I shaha nyoipu kahta ja ngoh nang. I me hayim yenang, jeiheinao yenang, tüoyangpoi I hipak phe me toiling, Ime nangpu mothte aope-o wangteki she yeteih. Ao jingne Iye teshinne ngange toi ling hüyange I nying nyingke mong yemeihupu? Hatüo-o jajang japu muh, hüyange yeonge mongyemeipe nyoipu wanglam ja.

⁹Palom phei-a she ni shemeipu, hangjingne ima-a moini jamyange ünyei shemei she linge oklak.

¹⁰Imnipa mepu sheja yeita ma-a, shejawe Ite jamme yiengpailak. Hüpoi ütamja I shaha ngohyange yeima-a, hatüowa loishe yemeipupa, hangjingne Ite jamlak ao-o yenang.

¹¹Üne-o she ni jamme shi ma-a, imni üsheam teipong nang, hüpoi sheja shaha shima-a, hangke üsheam tüolak?

¹²Kahta jawe shümme taine ngohpuwa kahta niye jange teipu oklak. Ülah lüm phei lüpyangpu wu-a phünlak jingne wannang.

¹³Üngapa wupa ahngpa, aowe hengtampu shaaji yeyah ok, tüopa phei-a toinan yapoi hüpoi deitahpu naosheha shemeipu.

¹⁴Naosheha küpnok mepu ahngpa shotjing te peine ok, yejema-a I ahngching mongme toinanpa ja ne puh ne ok.

¹⁵Tüopa wangphang me aoyin kahtalan ngoh khongkümpu jingne taowe teihlei, hüyange iman yo me üken ja me naosheha ja aowe ahngpa shotjing leilak, ngohnang she taowe teihlei.

¹⁶Kahta lili jingne lakjing yenang; I-a üshei tangme ütahpane ngoh. Tüoyangpoi aoyin phei me peilakeih Iphei mongmeipu ye-oklak. Ütingme tüopa-o jajang japu hüyange wangyangte jangpu ne hei mengnang.