Read Konyak Naga KONNYÜONGAOLAI 5 Bible Online

KONNYÜONGAOLAI 5 - Konyak Naga bible

KONNYÜONGAOLAI 5

¹Nang aope Kahwang nokte tailakei, nang yakaipu kentingyah. Hangjingne üngapalan-e iman-e hanghe ünu toishao ling, yeshingpe toidopu phapu kih lingleima-a, jai yahlak jingne owe wenpu shemei.

²Nange ju me ngaoshao me teih leitüoh, hüyange Kahwangte jamloi mam-e hango tahjan. I-a wangdang me hüyange nanga kahtoknyu me ngohnang, tüokhei nange ilak tokte paowe hango tah i.

³Hangjingne hangshin mongshanglakei, teshinne nange mang ümeng mangnang. Tüokhei nange hangshin me ngao, teshinne nange ngayounpu ngao ngaone oklak.

⁴Aope nange Kahwangte jiengpu ja janlakei, okpu shinne mam-e lingtüoh; hangjingne üngapa jingne I mongmeiye yenang. Nange hanghe linglak jingne jieng phatüoh.

⁵Jiengyange nange yelingleima lanshe yejanpe ngohpupa shemeilak.

⁶Nang ju me ngaopu ngaowe nang ünu me yütne tahtam, hüyange nange wangdang shongmokpate püohpin hahki she tah i. Nange lingpu toishaote hangne Kahwang mongshih ngailak? Hüyange nang yakke lingpu toishaolan mahtamlak.

⁷Mang ümeng ümei üngang phei ühak yekohpu ngao maapu ngainang; hüpoi nange Kahwangte nyamletüoh.

⁸Nange aope sokaliye toihalante shangne tampu hüyange iman mepu ütingpa yejai hüyange iman tinge yelingtampu ngelakei yatah shan. Üyonglan lili iman tangme üyong japonge yomlei nang, hüyange iman moilan tangme yelakpe sheyongpupa üyong jawe yomlei nang.

⁹Hüpoi kahtoknyu küo-a moilan jingne ngohnang; Ahngpa-o kah-e hei uhying nang.

¹⁰Aoheye nginte kenyapeih, ngin-e aope-o mük yemohlak; aoheye moth te kenyapeih, moth-e mongte yehulak; tüo-o jajangjapu hei ngohnang.

¹¹Nang hangshin haklakei, teshinne muh pangpu ju nange uhyinglak. Nange tüopu küw khongkümpu ne-a nang hakpa ne ngohyangki shepu tüo hei ngohlak.

¹²Toilingpa kahta jawe hahyinglak wange ngohne ok yengoh ne ok, hüpoi yaningpa-a I yeonge shinnyaiye shinang. Tüoyangpoi hakpa kahta Ime jamloi ngohpu jingne mongtoitaiye shin nyaiye yeshi ok.

¹³Hatüome nyamlakpa toishao ja taowe wanghenyu phang me ngeyangki; wongpongne mengkülak she hipak ütenja jingne kahtalan-e ngin yowe angnang;

¹⁴hüyange yatuhshao yemeipu ülam ja jingne khongküm mahküm hüyange Ihayimlan te tüohlak jingne hango yetope kümme shon.

¹⁵Hango yeyahpe Inyu sea mepu hangke ükeng me pei tüokaiye kahtoknyu tüohwante hango yeyahpe tailak. Shangeponge linge yahyangpu khongkümpu ngohyange-o teman phei hango yah yetai oklak.

¹⁶Hatüowa üting jeyah! I hangke pei hüke I tailak. Iye nanne shangnang, wangyang pho ne ngange, hüyange Iye hang tüopu?

¹⁷Üyin me teman-a wangnyak me hüyange shappe yoonge, mongshange, mongshih ngaiye hüyange takke nyoilak ne ngainang.

¹⁸Hatüo hüke taowe tüowe okyangki. Ütam jawe shemeipupa ne linge oklak-a hahlak hüyange yinglak hüyange Kahwange üyin hipak ütenja phapu me Iye hanghe lingyangki tüopa jingne mongmeiye ngohlak; hatüowa kahtanyuha yatuhshao.

¹⁹Kahwange kahta jate moth hei toinyunanha hüyange tüolan tangme I mongmeine phapu ne mengma-a, I monghahlak yang hüyange hanghe jingne Iye toi, lingyangki mongmeilak yang. Hatüowa Kahwang mepu hünghao.

²⁰Shaaji Kahwange Ite mongmeilak jingne phayang pheima-a, üyin jin hangshin shoh tüo jingne I meiyange mongshanglak ne yeje.